ސާފް ޗެމްޕިއަންޝިޕުގައި ބިދޭސީ ގައުމުތައް ބައިވެރިކުރުމަކީ ރަނގަޅު ބަދަލެއް: ބުޓިޔާ
އޭނާ ބުނަނީ ކުވޭތާއި ލުބުނާން ފަދަ ގައުމުތަަކަށްވުރެ ވަރުގަދަ ގައުމުތައް ގެންނަން ޖެހޭ ކަމަށް
ބައިޗުން ބުޓިޔާ: ސާފް ޗެމްޕިއަންޝިޕަށް ގެނައި ބަދަލު ރަނގަޅު ކަމަށް ބުނޭ
އަންނަ މަހު އިންޑިޔާގައި ފަށާ ސާފް ޗެމްޕިއަންޝިޕް ފުޓްބޯޅަ މުބާރާތުގައި ސަރަހައްދުން ބޭރުގެ ގައުމުތައް ބައިވެރިކުރުމަކީ ވަރަށް ރަނގަޅު ބަދަލެއް ކަމަށް އިންޑިޔާގެ ކުރީގެ ކެޕްޓަން ބައިޗުން ބުޓިޔާ ބުނެފި އެވެ.
އިންޑީޔާ އުފެއްދި އެންމެ އެއް ފޯވަޑް ބުނީ މި ބަދަލަކާއެކު މުބާރާތުގެ ފެންވަރު ވަރަށް ބޮޑަށް މަތިވާނެ ކަމަށެވެ.
ޖޫން 21 އިން ޖުލައި 4 އަށް ބާއްވާ މުބާރާތުގައި މި ފަހަރު ސަރަހައްދުން ބޭރުން ބައިވެރިވަނީ ކުވޭތާއި ލުބުނާނެވެ. ބުޓިޔާ ބުނީ މި ގައުމަކީ ވެސް ރަނގަޅު ދެ ގައުމު ކަމަށާއި ނަމަވެސް ބައިވެރިކުރަންވީ މިއަށްވުރެ ވެސް ވަރުގަދަ ގައުމުތައް ކަމަށެވެ.
ސާފް ޗެމްޕިއަންޝިޕުގައި އިންޑިޔާ އޮތީ ޕާކިސްތާނާއި ކުވޭތާއި ނޭޕާލާއެކު ގްރޫޕް އޭގަ އެވެ.
މި މުބާރާތަށް ރާއްޖެ ވެސް މިހާރު ދަނީ ފަރިތަކުރަމުންނެވެ.
