ލޯފާން ކުދިންގެ ޙައްޤުގައި ހިލޭ ސާބަހަށް ޚިދުމަތް ކުރާ ލޯފާން މުދައްރިސަކީ 'ކުޅެދޭ' މީހުންނަށް ހުރި މިސާލެއް!

އަނެކާއަށް ހެވެއް އެދިގެން ކަމެއް ކޮށްދިނުމަށްޓަކާ، ތިބާގެ އަތުގައި ހުރިހާ ކަމެއް ފުރިހަމަ ވެފައި އޮންނާކަށް ނުޖެހެއެވެ. ގިނަ ފަހަރަށް، އަނެކާއަށް އެންމެ ދީލަތި މީހަކީވެސް، ދިރިއުޅުމުގައި ތަކުލީފުތަކެއް އުފުލަން ޖެހިފައި ވާ ނުވަތަ ދިރިއުޅުމުގެ ކޮންމެވެސް ހިސާބެއްގައި އެފަދަ ޙާލެއްގައި އުޅުނު މީހާއަށް އޮންނަނީ ވެފައެވެ.

ސޫރިޔާއަށް އުފަން، ވަސީމް ކަނަޤިރީއަށް، އޭނާގެ ލޮލުގެ ފެނުން މުޅިން ގެއްލުނު އިރު ޢުމުރަން އެންމެ އަދި އޭރު ވީ އެންމެ 12 އަހަރެވެ. ޖެހުނު ބައްޔެއްގެ ސަބަބުން ލޮލުގެ ނާރުތައް ހަލާކުވެ، ލޯ އަނދިރިވީއެވެ. އޭނާގެ ދިރިއުޅުންވެސް އެކީ އެކައްޗަކަށް ބަދަލުވީ އެހާ ހިސާބުންނެވެ.

ޅަ ޢުމުރުގައި އެންމެ ގަދައަށް ސަކަރާތް ޖަހާ، އެންމެ ޖޯޝުގައި ތަޢުލީމު ހާސިލު ކުރަން ވީ ދުވަހު، ކަނަޤިރީގެ ކަރުގައި އަޅުވާފައި އޮތީ ނުކުޅެދޭ ކުއްޖެއްގެ ޓެގެވެ. ނަމަވެސް، އޭނާ ޢުއްމީދު ނަގައެއް ނުލައެވެ. ތަޢުލީމު ހާސިލު ކުރުމަށް ގަދަ އަޅާ މަސައްކަތް ކުރިއެވެ. އިނގިރޭސި ޢަދަބިއްޔާތުގެ ރޮނގުން ތަޢުލީމު ފުރިހަމަކޮށް، ޓީޗަރަކަށް ވިއެވެ. ކަނަޤިރީއަކީ، އޭނާ ފަދަ، ލޯފާން ކުދިންނަށް، ދިރިއުޅުމުގެ ހުނަރުތަކާއި އުކުޅުތައް ދަސްކޮށްދޭ ޓީޗަރެކެވެ.

މީގެ 3 އަހަރު ކުރިއެވެ. "އައި ރީޑް ވިތު މައި އައީޒް" ނުވަތަ "އަހަރެން ކިޔަނީ އަހަރެންގެ ލޮލުން" ގެ ނަމުގައި، ކަނަޤިރީގެ މޭސްތިރިކަމުގެ ދަށުން ހާއްސަ ޓީމެއް އެކުލަވާލިއެވެ. އެ ޓީމު ހާއްސަ ވަނީ، ލޮލުގެ ފެނުމުން މަހްރޫމުވެފައި ވާ ކުދިންނަށް ހިންގާ "ސްކޫލް އޮފް ހޯޕް"ގައި، ބްރެއިލް ބޭނުންކޯށްގެން ލިޔެކިޔަން ދަސްކޮށްދިނުމަށެވެ.

ޢުމުރުން 41 އަހަރުގެ ކަނަޤިރީ ބުނި ގޮތުގައި އޭނާގެ ވިސްނުން އަމާޒު ކޮށްފައި ވަނީ ކުޑަކުދިންނަށެވެ. އެއީ މުނިފޫހިފިލުވާލާ ހަދާނެ މަގުތައް، އެފަދަ ކުދިންނަށް ނެތްކަން، ޚުދު އޭނާގެ އަމިއްލަ ނަފުސުވެސް ތަޖުރީބާ ކޮށްފައި ވީތީ ކަމަށް ކަނަޤިރީ ބުނެއެވެ.

ޓިކް-ޓެކް-ޓޯއާއި، ރޫބިކްސް ކިއުބްސް ރޭވުމާއި، ރާޒުވާ ކުޅުން ފަދަ ހުނަރުތައް، ކަނަޤިރީގެ ދަރިވަރުންނަށް ދަސްކޮށްދެއެވެ. މި ޚިދުމަތްތަކަކީ އެއްވެސް އަގަކާ ނުލާ، ކަނަޤިރީ ދޭ ޚިދުމަތެކެވެ.

ޢިލްމީ މަންހަޖުގެ ސެޝަންތަކުގެ އިތުރުން ކަނަޤިރީއާއި އޭނާގެ ޓީމުން ދަނީ ބްރެއިލް ނިޒާމު ބޭނުން ކޮށްގެންވެސް ލިޔެކިޔާ ހަދަން ދަތިވާ ކުދިންނާއި މީހުންނަށް ހާއްސަކޮށްގެން، ފޮތްފޮތާއި ޔުނިވަރސިޓީ ލެކްޗަރުތަކުގެ އޯޑިއޯ ރެކޯޑިންގްތައް ހަދާ، އޮންލައިން ޕްލެޓްފޯމްގައި އެ ޝާޢިއު ކުރަމުންނެވެ.