ވެލެންސިއާ މެޗުގައި ވިނީޝިއަސް އަށް ދެއްކި ރަތް ކާޑު މާފުކޮށް، ވެލެންސިއާ އަށް ހަރުކަށި ފިޔަވަޅުތަކެއް އަޅަން ސްޕެނިޝް ފުޓުބޯޅަ ފެޑަރޭޝަނުން ނިންމައިފިއެވެ.

މުބާރާތުގެ ކޮމިޓީއިން ބުނީ، މެޗުގައި ހިނގާދިޔަ މައްސަލައާ ގުޅިގެން 10 މިނެޓަށް މެޗު މެދުކަނޑާލަން ޖެހުމުން ރެފްރީގެ ނިންމުންތަކަށް އަސަރުކުރިކަމަށެވެ. އަދި ރަތް ކާޑު ދެއްކީ ހިނގާދިޔަ ހުރިހާ ކަމެއް ރެފްރީއަށް ރަނގަޅަށް ނޭންގޭތީ ކަމަށެވެ. މިއާ އެކު، ވިނީޝިއަސް އަށް ކުރިޔަށް އޮތް މެޗު ކުޅެވޭނެއެވެ.

ވެލެންސިއާ އަށް އެޅި ފިޔަވަޅުތަކުގެ ތެރޭގައި، ވިނީޝިއަސް އަށް ފުރައްސާރަކުރި ސަޕޯޓަރުން ތިބި ސްޓޭންޑް ކަމަށްވާ މާރިއޯ ކެމްޕެސް ސްޓޭންޑް ފަސް މެޗަށް ބަންދުކުރުމަށް ވަނީ ނިންމާފައެވެ. މިގެ އިތުރުން އެ ޓީމު ވަނީ 45،000 ޔޫރޯ އިން ޖޫރިމަނާކޮށްފައެވެ.

ނަސްލީ ތަފާތުކުރުމުގެ މައްސަަލައަށް އިންސާފެއް ހޯދުމަށް ވިނީޝިއަސް ފެށި މަސައްކަތަށް މިހާރު ދަނީ ބޮޑެތި ކުރިއެރުންތަކެއް ލިބެމުންނެވެ.