'ދަ ޑިމޮކްރެޓްސް' ޕާޓީ އުފައްދަން ހުށަހަޅައިފި
ޕާޓީގެ ކެންޑިޑޭޓަކު ރިޔާސީ އިންތިޚާބުގައި ވާދަކުރާނެ
'ދަ ޑިމޮކްރެޓްސް' ޕާޓީ އުފެއްދުމަށް ފޯމް ހުށަހެޅުން
'ދަ ޑިމޮކްރެޓްސް' ޕާޓީ އުފައްދަން ހުށަހަޅައިފިއެވެ.
އެ ޕާޓީ އުފެއްދުމުގެ ހުއްދައަށް އެދި އިލެކްޝަންސް ކޮމިޝަނަށް ހުށަހަޅާފައިވަނީ ހެންވޭރު ހުޅަނގު ދާއިރާގެ މެންބަރު ހަސަން ލަތީފުގެ ނަމުގައެވެ.
ހަސަން ލަތީފް ވިދާޅުވީ އެޕާޓީގެ ކެންޑިޑޭޓަކު ރިޔާސީ އިންތިޚާބުގައި ވާދަކުރާނެ ކަމަށާއި އެހެން ޕާޓީތަކާއެކު މަޝްވަރާ ކުރާނެ ކަމަށެވެ.
ހަސަން ލަތީފް އިތުރަށް ވިދާޅުވީ ޕާޓީއަށް ވަކި އަދަދަކަށް މެމްބަރު ހަމަ ކުރުމަށް އަދި މަސައްކަތް ނުކުރިނަމަވެސް މި ޕާޓީ އަކީ ވަރަށް ބޮޑު ޕާޓީއަކަށް ވެގެންދާނެ ކަމަށެވެ. އަދި ޕާޓީއަށް ވަނުމަށް ވަރަށް ގިނަ މީހުންގެ ތަރުހީބު ލިބެމުންދާ ކަމަށް ވެސް ވިދާޅުވިއެވެ.
ސިޔާސީ ޕާޓީ އުފެއްދުމުގެ ހުއްދައަށް އެދި އިލެކްޝަންސް ކޮމިޝަނަށް ފޯމު ހުށަހެޅުއްވުމަށް ފަހުގައި ނޫސްވެރިންނާ ވާހަކަދައްކަވަމުން އެ ޕާޓީގެ ތަރުޖަމާނު އަފްޝާން ލަތީފު ވިދާޅުވީ މި އަހަރުގެ ސެޕްޓެމްބަރު މަހުގެ ނުވަ ވަނަ ދުވަހު އޮންނަ ރިޔާސީ އިންތިޚާބުގައި އެ ޕާޓީގެ ކެންޑިޑޭޓެއް ވާދަކުރައްވާނެ ކަމަށެވެ.
އަފްޝަން ވިދާޅުވީ ޕާޓީގެ އަމާޒަކަށްވާނީ ވީހާވެސް ގިނަ މީހުން ބައިވެރިކުރުން ކަމަށެވެ. ފިކުރެއްގެ ދިރުމުގެ ފަރާތުން އުފައްދާ ޕާޓީއަށް ނަމަކާއި ލޯގޯއަކާއި ކުލަ ހުށަހެޅުމަށް ހުޅުވާލި ފުރުސަތު ވަރަށް ބޮޑު ތަރުހީބެއް ލިބިގެންދިޔައެވެ. މިކަމާއި ގުޅިގެން އަފްޝަން ވިދާޅުވީ 223 ނަން ލިބުނު ކަމަށާއި ނަން ކަނޑައެޅީ ވަރަށް ގިނަ ބޭފުޅުންގެ މަޝްވަރާއެކު ކަމަށެވެ.
ކުރީގެ ރައީސް މުހައްމަދު ނަޝީދަށް ތާއީދުކުރައްވާ މެންބަރުން ޕާޓީ އުފައްދަން ފޯމު ހުށަހެޅުއްވި ނަމަވެސް ނަޝީދު އަދިވެސް އެމްޑީޕީން ވަކިވެފައެއް ނުވެއެވެ. އެ މަނިކުފާނު އަދިވެސް ހުންނެވީ އެމްޑީޕީގެ ރައީސްގެ މަގާމުގައެވެ. އެމްޑީޕީގެ އެތެރޭގައި ހިޔާލުތަފާތުވުންތައް ހުރިނަމަވެސް ވަކިވި މެމްބަރުން އެމްޑީޕީއާއި ސަރުކާރާއި ދެކޮޅަށް ފާޅުގައި ފާޑުކިޔަން ފަށާފައިވަނީ އެމްޑީޕީގެ ރިޔާސީ ޕްރައިމަރީ ނަޝީދަށް ނާކާމިޔާބުވެވަޑައިގެންނެވި ހިސާބުން ފެށިގެންނެވެ. އެހާހިސާބުން މި މެމްބަރުން ވަނީ މަޖިލީހާއި މަޖިލީހުގެ ކޮމިޓީތަކުގެ އިތުރުން އެހެން ޕްލެޓްފޯމްތަކުގައިވެސް ސަރުކާރަށް ވަރަށް ބޮޑަށް ފާޑުކިޔަން ފަށާފައެވެ.
