ސީނިއަރ ޓީމު ސާފް ޗެމްޕިއަންޝިޕަށް ފޮނުވާނެކަމަށް އުއްމީދުކުރަން: އިންޑިޔާ

ސާފް ޗެމްޕިއަންޝިޕް ފުޓްބޯޅަ މުބާރާތުގައި ވާދަކުރާ ގައުމުތަކުން ސީނިއަރ ގައުމީ ޓީމު މުބާރާތަށް ފޮނުވާނެކަމަށް އުއްމީދުކުރާ ކަމަށް އިންޑިޔާއިން ބުނެފިއެވެ.

އަންނަ މަހުގެ 21ން ޖުލައި 4ށް އިންޑިޔާގެ ބެންގަލޫރުގައި ބާއްވާ މުބާރާތަކީ ސާފް ޗެމްޕިއަންޝިޕުގެ ތާރީޚުގައި ޚާއްސަ މުބާރާތެކެވެ. ސަބަބަކީ މިއީ މި މުބާރާތުގައި ސާކް ސަރަހައްދުން ބޭރުގެ ގައުމުތައް ބައިވެރިކުރާ ފުރަތަމަ ފަހަރަށް ވުމުންނެވެ. މިގޮތުން މި އަހަރުގެ މުބާރާތުގައި ވާދަކުރާނީ ކުވޭތާއި ލުބުނާނެވެ.

މި ގައުމުތައް މުބާރާތުގައި ބައިވެރިކުރި މައިގަނޑު ސަބަބަކީ އެކަމަށް އިންޑިޔާ ބޭނުންވުމެވެ. އެ ގައުމުން ބޭނުންވީ ސާފް ޗެމްޕިއަންޝިޕް، އިންޑިޔާ ބޭނުންވާވަރުގެ ވަރުގަދަ މެޗުތަކެއް ކުޅެންލިބޭ މުބާރާތަކަށް ބަދަލުކުރުމެވެ.

މުބާރާތުގެ ފެންވަރު އަހަރުން އަހަރަށް ދަށްވަމުން ދިއުމާއި، އިންޑިޔާއިން ކޮންމެ އަހަރަކުހެން މުބާރާތް ކާމިޔާބުކުރާތީ، މި ފަހަރުގެ މުބާރާތަށް ސީނިއަރ ޓީމުގެ ބަދަލުގައި އިންޑިޔާގެ 23 އަހަރުން ދަށުގެ ގައުމީ ޓީމު ފޮނުވުމަށް އެގައުމުން ވަނީ ވިސްނާފައެވެ.

ނަމަވެސް ގުރުނެގުމުގެ ރަސްމިއްޔާތަށްފަހު، އޭއެފްސީގެ އެގްޒެކްޓިވް ކޮމިޓީގައިވެސް ހިމެނިވަޑައިގަންނަވާ އިންޑިޔާގެ ފުޓްބޯޅަ ފެޑަރޭޝަނުގެ ސެކްރެޓަރީ ޖެނެރަލް ޝްރީ ޕްރަބާކަރަން ވިދާޅުވީ ހުރިހާ ގައުމަކުން ސީނިއަރ ޓީމު ފޮނުވާނެކަމުގެ އުއްމީދުކުރައްވާ ކަމަށެވެ.

ސާފް ޗެމްޕިއަންޝިޕުގެ ކޮންމެ ދެ މުބާރާތަކުން އެއް މުބާރާތް ބާއްވަން ނިންމާފައިވަނީ އިންޑިޔާގައެވެ. އެއީ އެގޮތަށް ސްޕޮންސަރުން ބޭނުންވާތީއެވެ. މި މުބާރާތް އެންމެ ފަހުން ބޭއްވީ 2021 ވަނަ އަހަރު، ދިވެހިރާއްޖޭގައެވެ. އެންމެ ފަހުގެ ޗެމްޕިއަނުންނަކީވެސް އިންޑިޔާއެވެ.