މިއަހަރުގެ ފުރަތަމަ ކުއާޓަރގައި 103 ސައިކަލު ވަގަށް ނަގައިގެން ދިވެހި ފުލުހުންގެ ޚިދުމަތަށް ރިޕޯޓު ކޮށްފައިވާކަމަށް އެ މުއައްސަސާއިން ބުނެފިއެވެ.

ދިވެހި ފުލުހުންގެ ޚިދުމަތުން ވަނީ މިއަހަރުގެ ފުރަތަމަ ކުއާޓަރ ގެ ތަފާސްހިސާބުތައް އާންމުކޮށްފައެވެ. އެގޮތުން ފުރަތަމަ ކުއާޓަރ ގައި ވައްކަމާއި، ފޭރުމާއި، ހުއްދަނެތި ތަންތަނަށް ވަނުމާ ގުޅޭ 2079 މައްސަލައެއް ފުލުހުންނަށް ރިޕޯޓު ކޮށްފައިވާއިރު، އޭގެ ތެރެެއިން 964 މައްސަލައެއް ފުލުހުން ތަހުގީގު ކޮށްފައިވެއެވެ.

އަދި 25 މައްސަލައެއްގައި ދައުވާކޮށްދިނުން އެދި ޕްރޮސެކިއުޓަރ ޖެނެރަލް އޮފީހަށް ފޮނުވާފައިވާއިރު، 153 މީހުން އެފަދަ މައްސަލަތަކާއި ގުޅިގެން ބަންދުކޮށްފައިވެއެވެ.

ތަފާސްހިސާބުތައް ދައްކާ ގޮތުގައި ފުލުހުން ތަހުގީގު ކޮށްފައިވާ ވައްކަމާއި ފޭރުމުގެ މައްސަލަތަކުގެ ތެރެއިން 759 މައްސަލައަކީ މާލޭގައި ހިނގި ޙާދިސާތަކާ ގުޅޭ މައްސަލަތަކެވެ.

އޭގެ އިތުރުން، އައްޑޫ ސިޓީން 24 މައްސަލަ، ފުވައްމުލަކު ސިޓީން 32 މައްސަލަ އަދި ކުޅުދުއްފުށި ސިޓީން 12 މައްސަލައާއި، އެހެނިހެން އަތޮޅުތަކުންވެސް ވައްކަމާއި ފޭރުމާ ގުޅޭ 137 މައްސަލަ ފުލުހުން ވަނީ ތަހުގީގުކޮށްފައެވެ.

ފުލުހުންގެ ތަފާސްހިސާބުތައް ދައްކާގޮތުން މިފަދަ މައްސަލަތަކުގެ ތެރެއިން އެންމެ ބޮޑު ހިއްސާއެއް އަދާކުރަނީ އުޅަނދުފަހަރު ވަގަށް ނެގުމުގެ މައްސަލަތަކެވެ. އެފަދަ 39% މައްސަލަ ހުށަހެޅިފައިވެއެވެ. އޭގެ ތެރެއިން 103 މައްސަލައަކީ ސައިކަލު ވަގަށް ނަގާފައިވާކަމަށް ބުނެ ރިޕޯޓު ކޮށްފައިވާ މައްސަލައެވެ.

ދެވަނައަށް އެންމެ ގިނައިން ވަަގަށް ނަގާފައިވަނީ މޯބައިލް ފޯނެވެ. އެގޮތުން މޯބައިލް ފޯނު ވަގަށް ނެގުމާއި، ފޭރުމާއި ގުޅޭ 34 އިންސައްތަ މައްސަލަ ހުށައެޅިފައިވެއެވެ.

އަދި ފައިސާ ވަގަށް ނަގައި ފޭރުމާއި ގުޅޭ 27 އިންސައްތަ މައްސަލަ ހުށަހެޅިފައިވެއެވެ.

ވަކިވަކި އަވަށްތަކަށް ބަލާއިރު، ވައްކަމާއި ފޭރުމުގެ މައްސަލަތައް އެންމެ ގިނައިން ރިޕޯޓު ކޮށްފައިވަނީ މާފަންނުންނެވެ. ދެން މިފަދަ މައްސަލަ ތައް އެންމެ ގިނައީ ހެންވޭރާއި ގަލޮޅުގައެވެ.

އޭގެ އިތުރުން ހުޅުމާލެއިންވެސް 150 މައްސަލަ އަދި ހުޅުލޭ އެއަރޕޯޓުން 6 މައްސަލަ ރިޕޯޓު ކޮށްފައިވެއެވެ.