ދިވެހި ޕްރިމިއަރ ލީގުގައި ޔުނައިޓެޑް ވިކްޓްރީ (ޔޫވީ) ބަލިކޮށް ކްލަބް ގްރީން ސްޓްރީޓްސް އިން ފުރަތަމަ މޮޅު ހޯދައިފިއެވެ.
ހުކުރު ދުވަހު ހަވީރު ކުޅުނު މެޗުގައި ޔޫވީގެ މައްޗަށް ގްރީން ސްޓްރީޓްސްއިން ކުރިހޯދީ 3-1 ގެ ނަތީޖާއަކުންނެވެ. ދެ ޓީމުވެސް ލީގުގައި މިހާތަނަށް ކުޅުނު ދެ މެޗުން ބަލިވެފައިވުމާއެކު ދެ ޓީމުވެސް ނިކުތީ މޮޅެއް ހޯދުމުގެ އަޒުމުގައެވެ.
މެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް ފެނުނީ ހަމަހަމަ ކުޅުމެކެވެ. ނަމަވެސް، ފުރަތަމަ ހާފުގެ އިތުރު ވަގުތުގައި ގްރީން ސްޓްރީޓްސްގެ އިބްރާހިމް ހާމިދު ވަނީ ލަނޑެއް ޖަހައި އެ ޓީމަށް ކުރި ހޯދައިދީފައެވެ.
ފުރަތަމަ ހާފުގައި ލީޑު ނެގި ގްރީން ސްޓްރީޓްސް އިން ވަނީ އިތުރު ލަނޑެއްޖަހާ ލީޑު ފުޅާކޮށްފައެވެ. މެޗުގެ 62 ވަނަ މިނެޓުގައި ގްރީން ސްޓްރީޓްސްގެ ދެވަނަ ލަނޑުވެސް ކާމިޔާބުކޮށްދިނީ އިބްރާހިމް ހާމިދެވެ. މެޗުގެ 90 މިނެޓު ހަމަވެ، އިތުރު ވަގުތުގައި ގްރީން ސްޓްރީޓްސްގެ އަބްދު ﷲ އަނޫސް ވަނީ އިތުރު ލަނޑެއްޖަހާ ތިން ގޯލުގެ ލީޑެއް ހޯދަދީފައެވެ. އޭގެ މިނެޓެއް ފަހުން ޔޫވީގެ ހަމައެކަނި ލަނޑު ކާމިޔާބުކޮށްދިނީ މުހައްމަދު ހުސައިން އެވެ.
ލީގު ބްރޭކަށް ދިއުމުގެ ކުރިން ގްރީން ސްޓްރީޓްސް އަށް ލިބުނީ މުހިއްމު މޮޅެކެވެ. ތިން މެޗު ކުޅެވުނުއިރު އެއްވެސް މެޗަކުން މޮޅުނުވެ އޮތީ ޔޫވީ އާއި ވެލެންސިއާއެވެ.
