މި ވެރިކަން ދެމި އޮންނަ ކޮންމެ ސިކުންތަކީ ދިވެހި ރައްޔިތުންނަށް ބޮޑު ބުރައެއް: މެންބަރު އަރީފް
މި ދިމާވެގެން އުޅެނީ އިންސާނެއްގެ ފަރާތުން ދިމާވެގެން އުޅޭ ސުނާމީއެއް
ނޮޅިވަރަމް ދާއިރާގެ މެންބަރު ހުސެއިން އަރީފް
ރައީސް ޔާމީންގެ ވެރިކަން ދެމި އޮންނަ ކޮންމެ ސިކުންތެއް އަދި ކޮންމެ ދުވަހަކީ ދިވެހި ރައްޔިތުންނަށް ބޮޑު ބުރައެއް ކަމަށާއި، އަދި އެހާމެ ބޮޑު ގެއްލުމެއްކަމަށް ރައްޔިތުންގެ މަޖިލީހުގެ ނޮޅިވަރަމު ދާއިރާގެ މެންބަރު ހުސެއިން އަރީފް ވިދާޅުވެއްޖެއެވެ.
ގުޅިފައިވާ ޕާޓީތަކުން އާދިއްތަ ދުވަހުގެރޭ މާފަންނު ކުނޫޒްގައި ބޭއްވި ޖަލްސާގައި ވާހަކަދައްކަވަމުން އަރީފް ވިދާޅުވީ، މި ވެރިކަން ދެމި އޮންނަ ކޮންމެ ދުވަހަކީ ދިވެހިންނަށް ވަރަށް ބޮޑެތި ގެއްލުންތައް ލިބެމުންދާނެ ދުވަހެއްކަމަށެވެ.
އޭނާ ވިދާޅުވީ، މިހާރު ރާއްޖެއަށް ދިމާވެގެން އުޅެނީ އިންސާނެއްގެ ފަރާތުން ދިމާވެގެން އުޅޭ ސުނާމީއެއް ކަމަށާއި، ރައްޔިތުން މިކަމާއި ވިސްނަން ޖެހޭކަމަށެވެ.
މިގައުމުގެ ބޮޑެތި ބޭފުޅުން ތިއްބެވީ އެކިއެކި ބޮޑެތި ޙުކުމް ތަކުގައި ޖަލުގޮޅީގައި ނުހައްގުން ތާށިވެފައިކަން ފާހަގަކުރައްވައި އަރީފް ވިދާޅުވީ، މިގައުމުގެ އެތަށް ދަރީން ކަތިލެވި، އެތަށް ބަޔަކަށް ޖަލުގައި ނުހައްގުން އަނިޔާ ލިބެމުންދާ ކަމަށެވެ.
މީ ގައުމީ ބޮޑު މުސީބާތެއް ކަމަށާއި، މި މުސީބާތުން ސަލާމަތްވުމަށް އެންމެހާ ދިވެހިރައްޔިތުން މަސައްކަތްކޮށް ގައުމީ ވާޖިބެއްގެ ގޮތުގައި ދެކިގެން މަސައްކަތް ކުރުމަށް އަރީފް ވަނީ ގޮވާލައްވާފައެވެ.
"ކަރުން ނާރު ފުއްޕައި" ބިލިއަން ޑޮލަރުން ގައުމަށް އިންވެސްޓްމަންޓްތައް ގެންނަ ވާހަކަ ވިދާޅުވެފައި، މިހާރު އެ އިންވެސްޓްމެންޓްތައް ކޮބައިތޯ އޭނާވަނީ ސުވާލުކުރައްވާފައެވެ.
އޭގެ ބަދަލުގައި ފެނިގެންދަނީ، ބިލިއަން ޑޮލަރުން މިގައުމުގެ ޓްރެޜަރީން ބޮންޑް ވިއްކަން އުނގަށް އަޅައިގެން ނުކުތް މަންޒަރުކަމަށް އަރީފް ވިދާޅުވިއެވެ. އޭނާ ވިދާޅުވީ، ރައްޔިތުން މޯގޭޖްކޮށް މިގައުމު ވިއްކާލައި ދަރުވާލާފައިވާ ކަމަށެވެ.
" އެ ލޯނުތަކެއް އަޅުގަނޑުމެންނަކަށް ނުދެއްކޭނެ. އަޅުގަނޑުމެންގެ އެއްވެސް އެސެޓެއް މިގައުމުގައި ނެތް" އަރީފް ވިދާޅުވިއެވެ.
އެންމެ މީހަކަށްޓަކައި، ހުރިހާ ރައްޔިތުންގެ ހައްގުތައް ކޮށާލާ ގުރުބާން ކޮށްލާ މަންޒަރުބަލަން ތިބެވެން ނެތްކަމަށް އޭނާ ވިދާޅުވިއެވެ.
މިކަމުން ސަލާމަތްވުމަށް ސުކޫލް ކުއްޖެއް، މަސްވެރިއެއް، ދަނޑުވެރިއެއް، ފުލުހެއް، ފަނޑިޔާރެއް ތަފާތެއްނެތި މަޖިލީހުގެ މެންބަރުންނާއި އެއް ލެވަލްއެއްގައި މިއަދު މަސައްކަތް ކުރަން ޖެހިފައިވާކަމަށް އަރީފް ވިދާޅުވިއެވެ.
ކޮންމެ ދިވެހި ރައްޔިތަކީވެސް ގައުމީ ވާޖިބެއް އޮތް، ޒިންމާތަކެއްވެސް އޮތް ފަރާތެއްކަމުން ގައުމު ސަލާމަތުގެ އައްސޭރިއަކަށް ގެންދިއުމަށް މަސައްކަތް ކުރަންޖެހޭކަން އަރީފް ފާހަގަކުރެއްވިއެވެ.
އަޅުންނަށް ވެގެން ޤައުމުގައި ހިނގާ ކަންކަން ބަލަން ތިބެގެން ނުވާނެ ކަމަށާ، އިދިކޮޅު ފަރާތްތަކުން މިހާރު ކުރަމުންދާ މަސައްކަތުގައި ހޭވައްލާ ކިޔައި، އެއްނަރަކަށް ފޫގަޅައިގެން ރައްޔިތުން ނުކުމެ އެ މަސައްކަތުގައި އެއްބާރުލުން ދިނުމަށް އޭނާ ވަނީ ގޮވާލައްވާފައެވެ.
މިގައުމު މިގޮތަށް ދާން ދޫކޮށްލައިފިނަމަ، އަންނަން އޮތް ޖީލުތައް ވެގެންދާނީ "ދަރަނި ބޯތަކަކަށް" ކަމަށް އަރީފް ވަނީ ސިފަކުރައްވާފައެވެ.
ރައީސް ޔާމީންގެ އަރިހުގައި ތިއްބެވި ބޭފުޅުންނަށްވެސް އަރީފް ވަނީ އިލްތިމާސެއް ކުރައްވާފައެވެ. އޭނާ ވިދާޅުވީ، "ރައީސް ޔާމީންގެ އަރިހުގައި ތިޔަގޮތަށް އެނިމޭޓް ކޮށްފައިތިބި ތްރީޑީ މީހުންތަކެއްހެން" ނުތިއްބަވާ، އެބެފުޅެއްގެ ޒިންމާ ނަންގަވާ، އެ އޮޑިން ފުންމަވާލެއްވުމަށް އެދޭކަމަށެވެ.
އަރީފް ވިދާޅުވީ ރައީސް ޔާމީންގެ އަރިހުގައި ތިއްބެވި މެންބަރުން ފެތެމުންދާ އޮޑިއެއްގައި ތިއްބެވުމުން ބޮލުގައި ރިޔާގަނޑުއެޅި ގެއްލި މަރުވާނެ ކަމަށެވެ. އޭގެ ކުރިން ސަލާމަތުގެ އައްސޭރިއެއް ހޯދުމަށް އެ މެންބަރުންނަށް އަރީފް ވަނީ ގޮވާލައްވާފައެވެ.
