ރާއްޖޭގެ ހުރިހާ ހިސާބެއްގައި ތައުލީމީ ދާއިރާ ކުރިއެރުވުމަށް އުމްރާނީ ތަރައްގީގެ މަސައްކަތް ކުރިއަށްދޭ: ސަރުކާރު

ރާއްޖޭގެ ހުރިހާ ހިސާބެއްގައި ތައުލީމީ ދާއިރާ ކުރިއެރުވުމަށް އުމްރާނީ ތަރައްގީގެ މަސައްކަތްތައް ކުރިއަށްދާކަމަށް ސަރުކާރުން ބުނެފިއެވެ.

ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ، ރާއްޖޭގެ ހުރިހާ ހިސާބެއްގައި ތައުލީމީ ދާއިރާގެ ތަރައްގީއަށް ގިނަ މަސައްކަތްތައް ކުރަމުންދާ ކަމަށެވެ. އެގޮތުން އުމްރާނީ އަދި އިންސާނީ ވަސީލަތްތައް ތަރައްގީކުރުމުގެ މަސައްކަތް ކޮންމެވެސް ސިފައެއްގައި މިހާރު ފެންނަމުންދާނެކަމަށް މިއުވާން ވިދާޅުވިއެވެ.

ރާއްޖޭގެ ހުރިހާ ހިސާބެއްގެ ސްކޫލުތަކުގައި މަޝްރޫއުތައް ކުރިއަށްދާއިރު، ބައެއް މަޝްރޫއުތައް ވަނީ ޓެންޑަރިންގ މަރުހަލާގައެވެ. އއ އަތޮޅާއި އދ އަތޮޅަށް އިޝާރަތްކުރައްވައި މިއުވާން ވިދާޅުވީ، މި ދެ އަތޮޅުގެ ރަށްރަށުގެ ސްކޫލުތަކުގައިވެސް ގިނަ މަޝްރޫއުތައް ކުރިއަށްދާކަމަށެވެ.

އެގޮތުން އއ އަތޮޅަށް ބަލާއިރު، މަތިވެރީ ސްކޫލުގެ މަލްޓި ޕަރޕަސް ހޯލް އަދި 12 ކްލާސްރޫމްގެ 3 ބުރި އިމާރާތް އެޅުމުގެ މަސައްކަތާއި، ބޮޑުފޮޅުދޫ ސްކޫލުގެ 6 ކްލާސްރޫމް އަދި މަލްޓިޕަރޕަސް ހޯލް އެޅުމުގެ މަސައްކަތާއި، ފެރިދޫ ސްކޫލުގެ 4 ކްލާސްރޫމާއި މަލްޓިޕަރޕަސް ހޯލް އެޅުމުގެ މަސައްކަތާއި، މާޅޮހުގައި 4 ކްލާސްރޫމް އަދި މަލްޓިޕަރޕަސް ހޯލް އިމާރާތްކުރުމުގެ މަސައްކަތާއި، ހިމަންދޫ ސްކޫލުގެ 12 ކްލާސްރޫމް 3 ބުރި އިމާރާތާއި މަލްޓިޕަރޕަސް ހޯލް އެޅުމުގެ މަސައްކަތްތައް ކުރިއަށްދެއެވެ. މީގެ އިތުރުން ތޮއްޑޫގައި 12 ކްލާސްރޫމާއި މަލްޓިޕަރޕަސް ހޯލް އިމާރާތުގެ މަސައްކަތް ނިމިފައިވާއިރު، ރަސްދޫގައި، އއ އަތޮޅުތައުލީމީ މަރުކަޒުގެ 12 ކްލާސްރޫމް އަދި މަލްޓިޕަރޕަސް ހޯލް އިމާރާތް މަސައްކަތާއި، އުކުޅަހު ސްކޫލުގެ 12 ކްލާސްރޫމް އަދި މަލްޓިޕަރޕަސް ހޯލްގެ މަސައްކަތް ކުރިއަށްދެއެވެ.

އދ އަތޮޅަށް ބަލާއިރު، މަންދޫ ސްކޫލުގެ 6 ކްލާސްރޫމް އެޅުމުގެ މަސައްކަތާއި، އދ. ފެންފުށީ ސްކޫލުގެ 4 ކްލާސްރޫމް އެޅުމުގެ މަސައްކަތާއި، މާމިނގިލީ, އދ އަތޮޅު މަދަރުސާގެ އައު އިމާރާތް (ކްލާސްރޫމް، މަލްޓިޕަރޕަސް ހޯލް، އޭވީ ރޫމް) އިމާރާތްކުރުމުގެ މަސައްކަތް ކުރިއަށްދެއެވެ. މަހިބަދޫ ސްކޫލުގެ 12 ކްލާސްރޫމް އިމާރާތް ނިމިފައިވާއިރު، ދަނގެތީ ސްކޫލް އަޕްގްރޭޑްކުރުމާއި މަލްޓިޕަރޕަސް ހޯލް އިމާރާތް ކުރުމާއި، ދިގުރަށު ސްކޫލުގެ 3 ބުރި އިމާރާތުގެ މަސައްކަތް ކުރުމަށްވެސް ވަނީ ނިންމާފައެވެ.

މިއުވާން ވިދާޅުވީ ތައުލީމީ ދާއިރާއަށް ގިނަ އިންވެސްޓްތައް ކުރެވޭ ކަމަށާއި، މިއަދު ކުރެވޭ އިންވެސްޓްތަކުގެ ނަތީޖާ ނެރޭނީ މި ތަރައްގީގައި ތައުލީމު ހާސިލްކުރާ ދަރިވަރުން ގައުމަށް ކޮށްދޭ ޚިދުމަތުން ކަމަށެވެ.

މިއުވާން ވިދާޅުވީ މިސަރުކާރުން ތައުލީމީ ދާއިރާއަށް އިންގިލާބީ ބޮޑު ބަދަލެއް ގެނެސްފައިވާ ކަމަށެވެ.