ދިވެހި ޕްރިމިއާ ލީގުގައި ކުލަބު ވެލެންސިއާ އިން މިހާ ގިނަ ދުވަސް ވަންދެން ޕޮއިންޓެއް ނުހޯދައި އޮތުމަކީ އެ ޓީމަށް ދެރައެއް ކަމަށް އަޙުމަދު މުޖުތަބާ (ފެސްކޯ) ބުނެފި އެވެ.
ފެސްކޯ މިހެން ބުނީ ވެލެންސިއާގެ ތިން ވަނަ މެޗުގައި ބުރު ސްޕޯޓްސް ކުލަބާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުންނެވެ. އޭނާ ބުނީ މިހާރު އެންމެ ބޮޑު އަމާޒަކަށް އޮތީ މޮޅެއް ހޯދުމަށް މަސައްކަތް ކުރުން ކަމަށެވެ. އޭނާ ބުނީ ވެލެންސިއާގެ ނަމުގައި ނުކުންނަ ޓީމެއް ނަމަ، ލީގުގައި ޕޮއިންޓެއް ނުހޯދައި އޮތުމަކީ ދެރަކަމެއް ކަމަށެވެ. އެހެންކަމުން އެކަމުން އަރައިގަތުމަށްޓަކައި ކުރަން ޖެހޭ އެންމެހައި ކަންކަން ވެލެންސިއާގެ ޓެކްނިކަލް ޓީމާއި، ކުޅުންތެރިން ވެސް އަންނަނީ ކުރަމުން ކަމަށް ފެސްކޯ ފާހަގަ ކުރި އެވެ. ޚާއްސަކޮށް އެންމެ ފަހުން ވެލެންސިއާ އިން ކުޅުނު މެޗުގައި ދިމާވި މައްސަލަތަކަށް ހައްލު ހޯދުމަށް، އެންމެ ފަހުން ކުރިއަށް ގެންދިޔަ ދެ ފަރިތަކުރުމުގައި މަސައްކަތް ކޮށްފައިވާނެ ކަމަށް އޭނާ ބުންޏެވެ. އެއާއެކު ކުރިއަށް އޮތް ބުރު މެޗުގައި އެކަމަށް ހައްލެއް ލިބޭނެ ކަމަށް އުންމީދު ކުރާ ކަމަށް ފެސްކޯ ވަނީ ފާހަގަކޮށްފަ އެވެ.
ކުރިން ޕްރެސްގައި ފާހަގަ ކުރި ގޮތަށް މި ޕްރެސްގައި ވެސް ފެސްކޯ ވަނީ ވެލެންސިއާގެ ހާލަތު އޮތް ގޮތް ބުނެދީފަ އެވެ. އޭނާ ބުނީ މިއަދާ ހަމައަށް އައިއިރު ޓީމުގެ ހާލަތު ބަދަލުވެފައި ނުވާ ކަމަށެވެ. އެގޮތުން އޯލެވެލް އިމްތިހާނު އަދިވެސް ނުނިމޭ ކަމަށާއި، އިންޓަ ސްކޫލް އެތުލެޓިކްސް މުބާރާތް ވެސް ކުރިއަށް ދާ ކަމަށާއި، އެހެންކަމުން އެކަމުގެ ދަތި އަދި ވެސް އޮތް ކަމަށް ފެސްކޯ ބުންޏެވެ. ވެލެންސިއާ އިން އަބަދު ވެސް މަސައްކަތް ކުރަމުން އަންނަނީ އޭރަކު އޮންނަ ހާލަތަކުން އަރައިގަތުމަށްކަން ފާހަގަކުރަމުން ފެސްކޯ ބުނީ، އެންމެ ފަހުން ކުޅުނު މެޗުގައި ކުޅުންތެރިން ދެއްކި ކުޅުމަށް ތައުރީފު ކުރާ ކަމަށެވެ. ޚާއްސަކޮށް ވެލެންސިއާގައި އޮތް ޒުވާން ޓީމުން އެ މެޗުގައި ވަރަށް ރަނގަޅަށް ކުޅުނު ކަމަށާއި، ލަނޑު ޖަހާނެ ގިނަ ފުރުސަތުތަކެއް ލިބި، އެންމެ ބޭނުން ގޮތުގައި ކާމިޔާބު ނުކުރެވުނު ކަމަށެވެ. ނަމަވެސް ކުޅުންތެރިން ދެއްކި ކުޅުމަކީ އޭނާ އަށް އޮތް ވަރަށް ބޮޑު ހިތްހަމަ ޖެހުމެއްގެ ގޮތުގައި ފެސްކޯ ފާހަގަ ކުރި އެވެ.
އިދިކޮޅަށް ކުޅެން ޖެހޭ ބުރު ޓީމާ ގުޅޭ ގޮތުން އޭނާ ބުނީ، އެ ޓީމަކީ ފުރަތަމަ ޑިވިޝަަނަށް އައު ނަމެއް ކަމަށެވެ. އެހެން ނަމަވެސް އެ ޓީމުގެ ކުޅުންތެރިން ފުރަތަމަ ޑިވިޝަނަށް އައު ނޫން ކަމަށާއި، އެއީ ވަރަށް ތަޖުރިބާ ހުރި ކުޅުންތެރިންތަކެއް ކަމަށް އޭނާ ބުންޏެވެ. އެއާއެކު ބުރު ޓީމުގައި އޮތީ ވަރަށް ބެލެންސް ޓީމެއް ކަމަށާއި، އެ ޓީމުގެ ކޯޗިން ޓީމަކީ ވެސް ވަރަށް ރަނގަޅު ޓީމެއް ކަމަަށެވެ. އެހެންކަމުން ބުރު ޓީމާ ދެކޮޅަށް ކުޅުމަކީ ފަސޭހަކަމަކަށް ނުވާނެ ކަމަށާއި، އެ ޓީމަކީ ވަރަށް ހައިރާން ނަތީޖާތަކެއް ނެރެފައިވާ ޓީމެއް ކަމަށް އޭނާ ބުންޏެވެ. ވެލެންސިއާ އިން ބުރު ޓީމާ ދެކޮޅަށް ނިކުންނާނީ އެ ހުރިހާ ކަމަކަށް ތައްޔާރުވެގެން ކަމަށް އޭނާ ވަނީ ބުނެފަ އެވެ.
ބުރު ސްޕޯޓްސް ކުލަބަކީ ފަސްޓް ޑިވިޝަނަށް އައު ނަމެއް. ކުޅުންތެރިންނަކީ އައު ކުޅުންތެރިންނެއް ނޫން. ކުޅުންތެރިންނަކީ ހަމަ ތަޖުރިބާ ކާރު ކުޅުންތެރިންތަކެއް. ދެން އެގޮތުން އެ ޓީމަކީ ވަރަށް ރަނގަޅު، ވަރަށް ބެލެންސް ސްކޮޑެއް އޮތް ޓީމެއް. ރަނގަޅު ކޯޗިން ޓީމެއް އޮތް ޓީމެއް. އެހެންވީމާ ހުރިހާ ގޮތަކުން ބަލާ ނަމަ އެ ޓީމަކީ ވަރަށް މެޗުއާޑް ޓީމެކޭ އަޅުގަނޑު ދަންނަވާނީ.އަޙުމަދު މުޖުތަބާ (ފެސްކޯ) / ވެލެންސިއާގެ ކޯޗު
މީގެ އިތުރުން ފެސްކޯ ބުނީ މެޗުތަކުގައި ލަނޑު ނުޖެހުމަކީ ކުޅުންތެރިންނާއި އަދި ކޯޗިން ޓީމުގެ ވެސް ހިތްހަމަ ނުޖެހުން އޮންނާނެ ކަމެއް ކަމަށެވެ. ނަމަވެސް އެއީ ކުޅުންތެރިން އެމީހުންގެ ހިތްވަރު ދޫކޮށްލަން ޖެހޭ ސަބަބެއް ނޫންކަން ފާހަގަކޮށް ފެސްކޯ ބުނީ، އެކަން އެގޮތަށް ނުވާ ކަމުގެ ހެއްކަކީ ކޮންމެ މެޗަކަށްފަހު ދެން އަންނަ މެޗެއްގެ ކުޅުން ފެންނަނީ ރަނގަޅުވުން ކަމަށެވެ. އެކަމަށް އިޝާރާތް ކުރަމުން ފެސްކޯ ބުނީ، ލީގުގައި އެންމެ ފުރަތަމަ ކުޅުނު މެޗާ، އެންމެ ފަހުން ކުޅުނު މެޗު ވަރަށް ތަފާތު ކަމަށެވެ. އެހެންކަމުން ޓެކްނިކަލް ޓީމުގެ އެންމެ އިސް މީހާގެ ހައިސިއްޔަތުން އޭނާ އަށް ލިބޭ އެންމެ ބޮޑު ހިތްހަމަ ޖެހުމަކީ ޒުވާން ކުޅުންތެރިންތަކެއް ކުރިއަރަމުން އަންނަ މަންޒަރު ފެނުން ކަމަށް ފެސްކޯ ވަނީ ބުނެފަ އެވެ.
ވެެލެންސިއާ އިން މި ސީޒަނަށް ކުރިމަތިލީ ޒުވާން ޓީމަކާއެކު އެވެ. އެ ޓީމުގައި ގިނައިން ހިމެނެނީ އިންޓަ ސްކޫލް މުބާރާތުގައި ވިދާލި ކުޅުންތެެރިންނެވެ. ޕްރެޒިޑެންޓްސް ކަޕުން ފެށިގެން ލީގުގެ މިހާ ހިސާބަށް އައިއިރު، ވެލެންސިއާ އެއްވެސް މެޗަކުން މޮޅިވެފައެއް ނުވެ އެވެ. ވެލެންސިއާ އިން ބުރާއި ދެކޮޅަށް ނުކުންނާނީ ބުރާސްފަތި ދުވަހުގެ ރޭ 21:00 ގައެވެ.
