އަހުނާ އަދި އިސްއާގު ޔުއާބަށް ފުރިހަމަ ކާމިޔާބެއް
17 މެއި 2023 | ބުދަ 10:28އަހުނާ ވަނީ ކުރިން އޭނާ ހެދި ރެކޯޑަށްވުރެ އަވަހަށް ނިންމާފަ
އިންޓަރ ސްކޫލް އެތުލެޓިކްސް މުބާރާތުގެ ތެރެއިން
އިންޓަރ ސްކޫލް އެތުލެޓިކްސް މުބާރާތުގެ 17 އަހަރުން ދަށުގެ 100 މީޓަރު ދުވުމުގެ ޗެމްޕިއަންކަން އަހުނާ އަދި އިސްއާގު ޔުއާބު ހަސަން ހޯދައިފިއެވެ.
ޖަލާލުއްދީން ސްކޫލުގެ އަހުނާ ނިޒާރު ރޭސް ކާމިޔާބުކުރީ މި މުބާރާތުގެ ޕްރިލިމިނަރީ ހީޓުގައި އޭނާ ހެދި އިންޓަރ ސްކޫލް މުބާރާތުގެ ރެކޯޑް މުގުރާލުމަށްފަހުއެވެ. އަހުނާ ރެކޯޑް ހެދީ 12.72 ސިކުންތުން ރޭސް ނިންމައިގެނެވެ. ދެވަނައަށް ޝަރަފުއްދީން ސްކޫލްގެ މަރިޔަމް އުލްޔާ ނަސީމް ނިންމާފައިވާއިރު، ތިން ވަނައަށް ނިންމީ އަފީފުއްދީން ސްކޫލްގެ އައިޝަތު ހަނާން ހުސައިން އެވެ.
17 އަހަރުން ދަށުގެ 100 މީޓަރު ދުވުމުން ގިޔާސުއްދީން އިންޓަނޭޝަނަލް ސްކޫލްގެ އިސްއާގު ޔުއާބު ހަސަން އެއްވަނަ ހޯދިއިރު، ދެވަނައަށް ނިންމީ އިސްކަންދަރު ސްކޫލްގެ ޔޫސުފް އަޔާން އާމިރެވެ. މި ބައިން ތިން ވަނައަށް ގޮސްފައިވަނީ އިސްކަންދަރު ސްކޫލްގެ އަހުމަދު ކައިން ގަޔާޝްއެވެ.
އާދިއްތަ ދުވަހު ފެށި އިންޓަރ ސްކޫލް އެތުލެޓިކްސް މުބާރާތުގައި ރާއްޖެތެރޭގެ ގިނަ ސްކޫލްތަކަކުން ވަނީ ބައިވެރިވެފައެވެ. މުބާރާތް ނިންމުމުގެ ރަސްމިއްޔާތު އޮންނާނީ ހުކުރު ދުވަހުއެވެ.
