ސާފް ޗެމްޕިއަންޝިޕް ފުޓްބޯޅަ މުބާރާތުގައި ރާއްޖެ ވަރުގަދަ ގްރޫޕެއްގައި ލައްވާލައިފި އެވެ.
އިންޑިޔާގައި މިއަދު ބޭއްވި ގުރު ނެގުމުގެ ރަސްމިއްޔާތުގައި ރާއްޖެ ހިމެނުނީ ލުބުނާނާއި ބަނގްލަދޭޝް އަދި ބޫޓާނާއެކު ބީ ގްރޫޕުގަ އެވެ. މުބާރާތް ބާއްވާ އިންޑިޔާގެ އިތުރުން އޭ ގްރޫޕުގައި ހިމެނެނީ ކުވޭތު، ނޭޕާލް، އަދި ޕާކިސްތާނެވެ.
މުބާރާތުގައި ސީޑްކުރީ މުބާރާތް ބާއްވާ ގައުމުގެ ހައިސިއްޔަތުން އިންޑިޔާ އާއި ފީފާ ރޭންކިންގެ އެންމެ ކުރީގައިވާ ގައުމުގެ ގޮތުން ލުބުނާނެވެ. ރާއްޖެ ހިމެނުނީ ދެ ވަނަ ސީޑުގަ އެވެ.
ސާފް ޗެމްޕިއަންޝިޕް ފުޓްބޯޅަ މުބާރާތް މި ފަހަރު ކުރިއަށްދާނީ އަންނަ މަހުގެ 21 އިން ޖުލައި 3 އަށް ބެންގަލޫރުގަ އެވެ. މި މުބާރާތް މިހާތަނަށް ބާއްވަމުން އައީ ސާކް ގައުމުތަކަށް އެކަންޏެވެ. ނަމަވެސް މުބާރާތުގެ ފެންވަރު މަތިކުރުމުގެ ގޮތުން މި އަހަރުން ފެށިގެން ސާކުން ބޭރުގެ ގައުމުތައް ބައިވެރިކުރަން ވަނީ ނިންމާފަ އެވެ. މި ގޮތުން މި އަހަރުގެ މުބާރާތުގައި ވާދަކުރަނީ ކުވޭތާއި ލުބުނާނެވެ.
ސާފް ޗެމްޕިއަންޝިޕުގެ އެންމެ ކާމިޔާބު ގައުމަކީ އިންޑިޔާ އެވެ. އެ ގައުމުން 8 ފަހަރު ތަށި ހޯދާފައިވާއިރު ދެ ވަނަ އަށް އެންމެ ކާމިޔާބު ގައުމަކީ ދެ ފަހަރު ތަށި ހޯދާފައިވާ ދިވެހިރާއްޖެ އެވެ. ރާއްޖެ ތަށި ހޯދާފައިވަނީ 2008 އާއި 2018ގަ އެވެ.
މި މުބާރާތަށް ތައްޔާރުވުމަށް އަންނަ ހުކުރު އަދި ހޮނިހިރު ދުވަހު ކުޅޭ މެޗުތަކަށް ފަހު ދިވެހި ލީގު މެދުކަނޑާލައި ގައުމީ ޓީމުގެ ޕްރެކްޓިސް ފަށަން އެފްއޭއެމުން ވަނީ ނިންމާފަ އެވެ. އަދި ބޭރު ގައުމެއްގައި ގައުމީ ޓީމު ކޭމްޕްކުރާނެ އެވެ.
