ހުސްވެފައިވާ ބާސެލޯނާގެ އައު ޓްރާންސްފާ ޗީފްގެ މަގާމަށް ގެނައުން އެންމެ ގާތީ އެކުލަބުގެ ކުރީގެ މިޑްފީލްޑަރު ޕޯޗުގަލްގެ ޑެކޯ ކަން ގާތްގަނޑަކަށް ޔަގީންވެއްޖެ އެވެ.
ޑެކޯ އަކީ މިހާރުގެ ކޯޗު ޒަވީ ހަނާންޑޭޒްއާއެކު ކުޅުނު ކުރީގެ މޮޅު މިޑްފީލްޑަރެކެވެ. އޭނާ މިހާރު އަދާކުރަނ ފުޓްބޯޅަ އެޖެންޓެއްގެ މަގާމެވެ. ބާސެލޯނާގެ ޓްރާންސްޕާ ޗީފްކަމާ ހަވާލުވުމަށް އޭނާ އެޖެންޓްކަން ކުރާ ކުންފުންޏާއެކު ހަދާފައިވާ ކޮންޓްރެކްޓް އުވާލުމުގެ މަސައްކަތް ޑެކޯ މިހާރު ވަނީ ފަށައިފަ އެވެ.
ޑެކޯ މި މަގާމަށް ގެންނަނީ ކޯޗު ޒަވީ އާއި ކުލަބުގެ ރައީސް ޖޯން ލަޕޯޓާ ވެސް ބޭނުންވެގެންނެވެ. ސަބަބަކީ އެމީހުން ބޭނުންވާ ގޮތަކަށް ޑެކޯ މަސައްކަތް ކުރާނެ ކަމުގެ ޔަގީންކަން އޮތުމެވެ.
ބާސެލޯނާގެ ޓްރާންސްފާ ޗީފްގެ މަގާމު ހުސްވީ އެ މަގާމުގައި މިދިޔަ ދެ އަހަރު ހުރި ތަޖުރިބާކާރު މެތިއު އަލެމްނީ އެސްޓަން ވިލާ އަށް ބަދަލުވާން ނިންމުމުންނެވެ. ސްޕޭނުގެ ކޯޗު އުނާއީ އެމެރާ ކޯޗުކޮށްދޭ ވިލާއިން އަލެމްނީ އަށް ހުށަހެޅީ ބާސެލޯނާ އަށް ދެވޭ ވަރަށްވުރެ މާބޮޑު މުސާރައެއް ކަމަށް ލަޕޯޓާ ވަނީ ބުނެފަ އެވެ. އަލެމްނީ އާއި ކުލަބުގެ ސްޕޯޓިން ޑައިރެކްޓަރު ޖޯޑީ ކްރައިފް ވެސް ވަނީ މި ސީޒަނަށް ފަހު ބާސެލޯނާގއި އަދާކުރި ޒިންމާތަކުން ވަގުތީ ގޮތުން އެކަހެރިވާން ނިންމައިފަ އެވެ.
ސްޕޭނުގެ ތަޖުރިބާކާރު ބައެއް ނޫސްވެރިން ބުނަނީ އަލެމްނީ އާއި ކްރައިފް ވަކިވާން ނިންމި އެއް ސަބަބަކީ ކުލަބަށް ގެންނަ ކުޅުންތެރިންނާމެދު މެނޭޖްމަންޓާ ހިޔާލުތަފާތުވުން އުފެދުމެވެ. މި ގޮތުން ކުރީގެ ލެޕްޓަން ލަޔޮނަލް މެސީ އަލުން ގެނައުމަށް އަލެމްނީ އަކީ ތާއީދު ކުރާ މީހަކަށްނުވެ އެވެ.
