ޓްރާންސްފާ ވިންޑޯ ބަންދުވުމުގެ ކުރިން ބާސެލޯނާއަށް އިތުރު ކުޅުންތެރިން ގެންނަން ޖެހޭ ކަމަށް އެޓީމުގެ މިޑްފިލްޑަރު ސާޖިއޯ ބުސްކެޓްސް ބުނެފި އެވެ.
މުންޑޯ ޑިޕޯޓިވޯ އަށް ދިން އިންޓަވިއުއެއްގައި ބުސްކެޓްސް ބުނީ އާ ކުޅުންތެރިން ގެންނަން ޖެހެނީ ރެއާލް މެޑްރިޑް އަތުން އަމިއްލަ ދަނޑުގައި ބާސާ ބަލިވުމުން ނޫން ކަމަށާއި، އެކަންތައް ކުރަންޖެހިފައި ވަނީ އިތުރަށް ޓީމު ތެރޭގައި ހުރި ކަންތައްތައް ރަނގަޅު ކުރުމަށް ކަމަށެވެ.
ބުސްކެޓްސް ބުނީ ރެއާލް އަތުން ފުރަތަމަ ލެގުގައި ބަލިވުމުން އެއްވެސް ބަހަނާއެއް ދައްކަން ބޭނުންނުވާ ކަމަށެވެ. އޭނާ ބުނީ ރެއާލް އަތުން ބަލިވުމުން ސަޕޯޓަރުން ވަރަށް މާޔޫސްވެފައިވާކަން އެނގޭ ކަމަށާއި، އެހެން ނަމަވެސް ރެއާލްގެ އަމިއްލަ ދަނޑުގައި ނަތީޖާ ބަދަލުކުރަން މަސައްކަތް ކުރާނެ ކަމަށެވެ.
މީގެއިތުރުން ބުސްކެޓްސް ބުނީ ރެއާލްއާ ދެކޮޅަށް ކުޅުނު މެޗުގެ ފުރަތަމަ ހާފްގައި ބާސާ އިން ވަރަށް ރަނގަޅު ކުޅުމެއް ދައްކާފައިވާ ކަމަށާއި، އެހެން ނަމަވެސް ބާސާގެ ޑިފެންޑަރު ޖެރާޑް ޕީކޭ އަތުން ބައިކޮޅަށް ވަން ލަނޑުން ވަރަށް ބޮޑަށް މެޗު ބަދަލުވެގެންދިޔަ ކަމަށެވެ.
ބާސާ އިން ވަނީ މި ޓްރާންސްފާ ވިންޑޯގައި އެޓީމުގެ އެންމެ މުހިންމު ކުޅުންތެރިން ތެރޭގައި ހިމެނޭ ބްރެޒިލްގެ ފޯވާޑް ނޭމާ ވޯލްޑް ރެކޯޑް ފީއެއްގެ ދަށުން ޕީއެސްޖީއަށް ވިއްކާލާފައެވެ. މިކަމާ ގުޅިގެން ބާސާ ސަޕޯޓަރުން އަންނަނީ އެޓީމަށް އަދި ނޭމާ އަށް ވެސް އެ ނިންމުން ނިންމުމުން ފާޑުކިޔަމުންނެވެ.
ނޭމާ ނެތްތަން ފޫބެއްދުމަށް ބާސާ އިން އަންނަނީ ލިވަޕޫލްގެ ފޯވާޑް ފިލިޕޭ ކުޓީނިއޯ ހޯދުމަށް މަސައްކަތް ކުރަމުންނެވެ. ލިވަޕޫލް އިން ކުޓީނިއޯ ވިއްކާލަން ދެކޮޅު ހަދަމުން އަންނައިރު، ކުޓީނިއޯ ވަނީ އޭނާ އަށް ރިލީޒް ދިނުމަށް ކްލަބުގައި އެދިފައިކަމަށް ރިޕޯޓްތައް ބުނެއެވެ.
