ރީޖަނަލް އެއަރޕޯޓްސްގެ "އެއަރޕޯޓް ރެސްކިއު އެންޑް ފަޔަރފައިޓިންގ ކޯސް" ފަށައިފި
މިއީ އާރުއޭސީއެލްގެ މިއަހަރުގެ މިފަދަ ފުރަތަމަ ކޯސް
އާރުއޭސީއެލްގެ ކޯހުގައި ބައިވެރިވާ ފަރާތްތައް
ރީޖަނަލް އެއަރޕޯޓްސް ކޮމްޕެނީ ޕްރައިވެޓް ލިމިޓެޑް (އާރުއޭސީއެލް)ގެ, އެއަރޕޯޓް ރެސްކިއު އެންޑް ފަޔަރފައިޓިންގ ކޯސް ފަށައިފިއެވެ.
މި ކޯސް ފަށާފައިވަނީ މި މަހުގެ ހަތްވަނަ ދުވަހުއެވެ. މިއީ އާރުއޭސީއެލްގެ މިއަހަރުގެ މިފަދަ ފުރަތަމަ ކޯހެވެ.
މި ކޯހުގައި 20 ދަރިވަރުން ބައިވެރިވާކަމަށް އާރުއޭސީއެލުން މައުލޫމާތުދެއެވެ. މިއީ އާރުއޭސީއެލާ ގުޅުނު ފަޔަރުގެ ސްޓާފުންނަށް އަމާޒުކޮށްގެން ކުރިއަށްގެންދާ ބޭސިކް ލެވެލްގެ ކޯހެކެވެ.
މި ކޯހުގައި، އާރުއޭސީއެލުން ހިންގާ އެއަރޕޯޓުތަކުގައި އަމަލުކުރުމަށް ގާއިމުކޮށްފައިވާ އެއަރޕޯޓް އިމަރޖެންސީ ޕްލޭނަށް އަމަލުކުރުމާއި، އެއަރޑްރޯމްގައި ދިމާވެދާނެ އަލިފާނާ ގުޅުންހުރި އެކި ހާދިސާތަކުން ރައްކާތެރިވެ، ސަލާމަތްވުމަށް ބޭނުންވާ އިލްމާއި ހުނަރާއި ގާބިލުކަން ދަސްކޮށްދޭނެއެވެ.
އެއް މަސްދުވަހުގެ މުއްދަތަކަށް ކުރިއަށްގެންދާ މި ކޯހުގައި ޕްރެކްޓިކަލް އަދި ތިއަރީ އިމްތިހާނުކުރާނެއެވެ. މި ކޯހުގައި ކިޔަވައިދޭ އާރުއޭސީއެލްގެ ޓްރެއިނަރުންނަކީ ސިވިލް އޭވިއޭޝަން އޮތޯރިޓީން ހުއްދަ ލިބިފައިވާ ތަޖުރިބާކާރު ޓްރެއިނަރުންތަކެކެވެ.
އާރުއޭސީއެލުން ބުނިގޮތުގައި ކުރިއަށްއޮތްތަނުގައި އެ ކުންފުނިން ހިންގާ ކޯސްތަކުގައި ބައިވެރިވުމުގެ ފުރުސަތު އެހެން ކުންފުނިތަކާއި އާއްމުންނަށްވެސް ހުޅުވާލާނެއެވެ.
ރާއްޖޭގައި ގާއިމުކޮށްފައިވާ ހަމައެކަނި އެއަރޕޯޓް ފަޔަރ ސިމިއުލޭޓަރވެސް ގާއިމުކޮށްފައިވަނީ އާރުއޭސީއެލުން ހިންގާ އެއަރޕޯޓެއްގައެވެ. އެއީ ހޯރަފުށީ އެއަރޕޯޓެވެ.
