އަރބަންކޯއިން ހުޅުމާލޭގައި ތަރައްގީ ކުރަމުން އަންނަ އަރބަން އައިލްއާ ގުޅޭ މައުލޫމާތު ބޭރުގެ އިންވެސްޓަރުންނާ ހިއްސާކޮށްފިއެވެ.
މި މައުލޫމާތު ހިއްސާކޮށްފައިވަނީ "ބްރިޖިންގ ޓޫރިޒަމް ޑެސްޓިނޭޝަންސް" ގެ ނަމުގައި ބާއްވާ އިންޓަނޭޝަނަލް ކޮންފަރެންސްގައެވެ. މި ކޮންފަރެންސުގައި ރާއްޖޭގެ ފަތުރުވެރިކަން ފުޅާކުރުމަށް ކަމާ ބެހޭ ފަރާތްތަކުން ކުރަމުން އަންނަ މަސައްކަތްތަކުގެ ތެރެއިން، ޓޫރިޒަމް މިނިސްޓްރީ އާއި، ފަތުރުވެރިކަމުގެ ދާއިރާގައި ޚިދުމަތްކުރާ ވަފުދެއް ވަނީ ބައިވެރިވެފައެވެ.
މި ކޮންފަރެންސްގައި އަރބަން އައިލްއާ ގުޅޭ މައުލޫމާތު ހިއްސާ ކުރެއްވީ އަރބަންކޯގެ ޗީފް ހޮސްޕިޓަލިޓީ އޮފިސަރ އިބްރާހިމް އިނާޒްއެެވެ. އެގޮތުން، އަރބަންކޯއިން ހުޅުމާލޭގައި ތަރައްގީކުރަމުން އަންނަ އަރބަން އައިލްގެ ސަބަބުން ފަތުރުވެރިކަމުގެ ދާއިރާއަށް އިތުރުވެގެންދާ ފުރުސަތުތަކާއި، ލިބިގެންދާނެ ފައިދާތަކާ ގުޅޭގޮތުން މި ކޮންފަރެންސްގައި މައުލޫމާތު ހިއްސާކުރެއްވިއެވެ.
"ބްރިޖިންގ ޓޫރިޒަމް ޑެސްޓިނޭޝަންސް" ބާއްވާފައިވަނީ މި މަހުގެ 11 އަދި 12 އަށް މޮންޓެގްރޯގެ ބުޑްވާގައެވެ. މި ކޮންފަރެންސަކީ މޮންޓެގްރޯގެ މިނިސްޓްރީ އޮފް އިކޮނޮމިކް ޑެވެލޮޕްމަންޓް އެންޑް ޓޫރިޒަމާއި، ރާއްޖޭގެ ޓޫރިޒަމް މިނިސްޓްރީ އާއި ގުޅިގެން ކުރިއަށްގެންދިޔަ ކޮންފަރެންސެކެވެ.
އިންޓަރގްރޭޓެޑް އަރބަން ޓޫރިޒަމް ޕްރޮޖެކްޓް "އަރބަން އައިލް" އަކީ ހުޅުމާލޭގެ އެންމެ އުތުރުން އޮންނަ ފަތުރުވެރިކަމަށް ހާއްސަ ކުރެވިފައިވާ ރަށެކެވެ. ހުޅުމާލެއާއި ރާއްޖޭގެ އިގުތިސާދީ މައި ހަބާ، އަރބަން އައިލް ގުޅިފައިވުމުން އެތަނުގެ ފަތުރުވެރިކަމަށް އިތުރު ފުރިހަމަ ކަމެއް ގެނެސްދޭނެ ކަމަށް އަރބަންކޯއިން ދެކެއެވެ.
ގާތްގަނޑަކަށް 23 ހެކްޓަރުގެ މި ރަށުގައި ފަތުރުވެރިންނަށް ހާއްސަ ތަފާތު ގިނަ އެކޮމޮޑޭޝަން ފެސިލިޓީތަށް ހިމެނޭނެއެވެ. އެގޮތުން ޗުއްޓީ ހޭދަކުރުމަށް އަންނަ ފަތުރުވެރިންގެ އިތުރުން، ކުރުމުއްދަތަކަށް ނުވަތަ ޓްރާންސިޓްކޮން މަޑުކުރާ ފަތުރުވެރިންނަށާއި، ވިޔަފާރި ކަންކަމު އަންނަ ފަތުރުވެރިން، އަދި، ޑިޖިޓަލް ނޮމެޑްސް ފަދަ ދިގު މުއްދަތަކަށް މަޑުކުރަން ބޭނުންވާ ފަރާތްތަކަށްވެސް ބޭނުންވާ ފަދަ އެކޮމޮޑެޝަންތައް ހިމެނެއެވެ. މީގެ ތެރޭގައި ލަގްޒަރީ ވިލާ، ސާވިސް އެޕާޓްމަންޓް، ސިޓީ ހޮޓެލް، މިޑްސްކޭލް އަދި އަޕްސްކޭލް ހޮޓެލާއި ގެސްޓް ހައުސްތަކުގެ އިތުރުން ބްރޭންޑަޑް ރީޓެއިލް އަދި މަތީ ފަންތީގެ ރެސްޓޯރަންޓްތައް ވެސް ހުންނާނެއެވެ.
މިފަދަ ގިނަ ޑިވަލޮޕްމަންޓުތަކެއް ހިމެނިފައިވުމުން، އަރބަން އައިލް ވެގެންދާނީ ދިވެހި އަދި ބޭރުގެ ވިޔަފާރިވެރިންނަށްވެސް އިންވެސްޓު ކުރަން ރަނުގެ ފުރުސަތަކަށެވެ. ވެލާނާ އިންޓަރނޭޝަލަން އެއާޕޯޓު، ހުޅުމާލެ، އަދި މާލެއާއި އަރބަން އައިލް ގުޅިފައި ވުމުގެ އިތުރުން، މިތަނުގައި ގާއިމުކޮށްފައިވާ އަދި ކުރަމުންދާ އިންފްރާސްޓްރަކްޗަރގެ ސަބަބުން މިތަނުގައި އިންވެސްޓް ކުރާ ފަރާތްތަކަށް ގިނަގުނަ މަންފާ ލިބިގެންދާނެ ކަމަށް އަރބަންކޯއިން ބުންޏެވެ. އަރބަން އައިލްގައި ހިމެނޭ ޔޫޓިލިޓީ ނެޓްވޯކާއި، އޯޕަން އެކްސެސް ނެޓުވޯކަކާއެކު ވާ ސްމާޓް އިންފްރާސްޓްރަކްޗަރއެއް، އަރަބަންކޯއިން ދަނީ މިހާރު ގާއިމު ކުރަމުންނެވެ.
އަރބަންކޯއިން ބުނީ މި މަސައްކަތް ކުރިއަށްދަނީ ވަރަށް ބޮޑަށް ތިމާވެއްޓާ ރައްޓެހި ގޮތަކަށް މުޅި ޕްރޮޖެކްޓު ތަރައްގީ ކުރުމަށް އިސްކަންދީގެން ކަމަށެވެ. އަދި އިންވެސްޓަރުންނަށް ލީސް މޮޑެލް، އަދި ޖޮއިންޓް-ވެންޗަރ މޮޑެލްގެ އިތުރުން އެހެނިހެން މޮޑެލްތަކަށްވެސް ޕްރޮޕޯސަލް ހުށަހެޅޭނެހެން ވަރަށް ލުއި ގޮތްތަކެއް އެ ކުންފުނިން ރާވާފައިވާ ކަމަށް އަރބަންކއޯއިން ބުންޏެވެ.
