އެސްޓީއޯގެ އަހަރީ އާއްމު ޖަލްސާ މެއި 31 ގައި

އެސްޓީއޯގެ އަހަރީ އާއްމު ޖަލްސާ މި މަހުގެ 31 ގައި ބާއްވަން އެ ކުންފުނިން ތާވަލު ކޮށްފިއެވެ.

އެ ކުންފުނިން ބުނެފައިވާ ގޮތުގައި މި ޖަލްސާގައި ބައިވެރިވެވޭނީ 24 އޭޕްރިލް 2023 ވީ ހޯމަ ދުވަހުގެ ނިޔަލަށް ކުންފުނިގެ ހިއްސާދާރުންގެ ދަފްތަރުގައި ރަޖިސްޓްރީ ކޮށްފައިވާ ހިއްސާދާރުންނަށެވެ. މި ހިއްސާދާރުންގެ ތެރެއިން އަހަރީ އާއްމު ޖަލްސާގައި ބައިވެރިވާން ބޭނުންވާ ހިއްސާދާރުންނަށް މިހާރު ވަނީ ޖަލްސާގައި ރަޖިސްޓްރީވުމުގެ ފުރުސަތު ހުޅުވާލައިފައެވެ.

އެސްޓީއޯއިން މައުލޫމާތު ދޭ ގޮތުގައި އެކުންފުނީގެ އަހަރީ އާއްމު ޖަލްސާގައި ތިން ގޮތަކުން ހިއްސާދާރުންނަށް ބައިވެރިވެވޭނެއެވެ. އެއީ ހިއްސާދާރު އަމިއްލައަށް ޖަލްސާއަށް ހާޒިރުވެގެން ނުވަތަ އޮންލައިންކޮށް ބައިވެރިވެގެން ނުވަތަ ޕްރޮކްސީ މެދުވެރިކޮށެވެ. އެހެންކަމުން ޖަލްސާގައި ބައިވެރިވާން ބޭނުންވާ ހިއްސާދާރުން މި މަހުގެ 30 ވަނަ ދުވަހުގެ ރޭ 8:30 ގެ ކުރިން އެ ކުންފުނީގެ ރަޖިސްޓްރޭޝަން ޕޯޓަލް (portal.sto.mv) މެދުވެރިކޮށް ރަޖިސްޓްރީވުމަށް ވަނީ އެދިފައެވެ.

މިއަހަރު ބާއްވާ އެސްޓީއޯގެ 2022 ވަނަ އަހަރުގެ އަހަރީ އާއްމު ޖަލްސާގައި 2022 ވަނަ އަހަރުގެ އަހަރީ ރިޕޯޓް އަދި މާލީ ހިސާބުތައް ފާސް ކުރުމާއި ހިއްސާގެ ފައިދާ ފާސް ކުރުމާއި ކުރިއަށް އޮތް އަހަރަށް އާއްމު ހިއްސާދާރުންގެ ތެރެއިން ބޯޑަށް ޑިރެކްޓަރަކު އައްޔަން ކުރުމަށް ވޯޓުލުން ކުރިއަށްދާނެއެވެ.

އެސްޓީއޯގެ ބޯޑުން ވަނީ މިދިޔަ އަހަރު އެ ކުންފުނީގެ ހިއްސާގެ ފައިދާގެ ގޮތުގައި ހިއްސާއަކަށް 77 ރުފިޔާ ބަހަން އަހަރީ އާއްމު ޖަލްސާއަށް ހުށަހަޅައިފައެވެ. ހިއްސާގެ ފައިދާ ލިބޭނީ 24 އޭޕްރިލް 2023 އާ ހަމައަށް އެ ކުންފުނީގެ ހިއްސާދާރުންގެ ދަފުތަރުގައި ހިމެނޭ ފަރާތްތަކަށެވެ.