ކަނޑު އުޅަނދުފަހަރު ޗެކުކުރުމަށް ކުރިއަށްގެންދާ ޚާއްސަ އޮޕަރޭޝަންތަކުގެ ރަނގަޅު ނަތީޖާ ފެނޭ: ކޯސްޓްގާޑް
15 މެއި 2023 | ހޯމަ 06:50މޫސުމަށް ވަރަށް ބޮޑަށް ސަމާލުވާކަން ފާހަގަކުރެވޭ
ކަނޑު އުޅަނދުފަހަރު ޗެކުކުރުމުގެ އޮޕަރޭޝަންގެ ތެރެއިން
ކަނޑު ދަތުރުކުރާ އުޅަނދުފަހަރު ޗެކުކުރުމަށް ކުރިއަށްގެންދާ ޚާއްސަ އޮޕަރޭޝަންތަކުގެ ރަނގަޅު ނަތީޖާ ފެންނަ ކަމަށް އެމްއެންޑީއެފް ކޯސްޓްގާޑުން ބުނެފިއެވެ.
ރާއްޖެޓީވީގައި ވާހަކަދައްކަވަމުން މޭޖަރ މުހައްމަދު ނައީމް ވިދާޅުވީ އުޅަނދުފަހަރު ޗެކުކުރުމަށް ކުރިއަށްގެންދާ ޚާއްސަ އޮޕަރޭޝަންތަކުގެ ރަނގަޅު ނަތީޖާ ފެންނަ ކަމަށެވެ. އެގޮތުން މިހާރު ގިނަ ކަނޑު ދަތުރުކުރާ އުޅަނދުފަހަރުތަކުގައި ލައިފްޖެކެޓް ހުންނަ ކަމަށާއި، މޫސުމަށް ވަރަށް ބޮޑަށް ސަމާލުވާކަން ފާހަގަކުރެވޭ ކަމަށެވެ. އަދި ވިދާޅުވީ ދޯނިފަހަރުތަކުގައި ގެންގުޅޭ އާލާތްތައް ފެންވަރު މަތިވެ، ހޭލުންތެރިކަން އިތުރުވާ ކަމަށެވެ.
މިފަހުން ހިނގާދިޔަ ކަނޑުމަތީގެ ހާދިސާތަކަށް އިޝާރާތް ކުރައްވައި ނައީމް ވިދާޅުވީ އުޅަނދުގައި ތިބި އެންމެން ތިބީ ލައިފް ޖެކެޓް އަޅައިގެން ކަމަށާއި، އެންމެން ތިބީ ވެސް އެއްކޮށް ކަމަށެވެ. އަދި ހާދިސާ ރިޕޯޓު ކުރިއިރު ވަރަށް ފުރިހަމައަށް މައުލޫމާތު ހިއްސާކުރި ކަމަށް އޭނާ ވިދާޅުވިއެވެ. އަދި ވިދާޅުވީ މިއީ އެފަދަ އޮޕަރޭޝަންތައް ކުރިއަށް ގެންދިއުމުގެ ރަނގަޅު ނަތީޖާ ކަމަށެވެ.
ކަނޑު ދަތުރުކުރާ އުޅަނދުފަހަރު ޗެކުކުރުމަށް ކުރިއަށްގެންދާ ޚާއްސަ އޮޕަރޭޝަންތަކުގެ ރަނގަޅު ނަތީޖާ ފެންނަ ކަމަށް ކޯސްޓްގާޑުން ބުނެފައިވާއިރު، މިފަހުން ފިތުރު އީދު ބަންދާ ދިމާކޮށް، އެމްއެންޑީއެފް ކޯސްޓްގާޑުން ވަނީ "އޮޕަރޭޝަން ފިތުރު 2023" ނަމުގައި، ކަނޑު ދަތުރުކުރާ އުޅަނދުފަހަރު ޗެކުކުރުމުގެ ޚާއްސަ އޮޕަރޭޝަނެއް ކުރިއަށް ގެންގޮސްފައެވެ. ސިލްސިލާކޮށް މިފަދަ އޮޕަރޭޝަންތައް ކުރިއަށް ގެންދާއިރު، އުޅަނދު ފަހަރުގެ ސަލާމަތީ ސެޓްފިކެޓްގައި ބަޔާންކޮށްފައި ހުންނަ ކަންކަން ފުރިހަމަކޮށްފައިވޭތޯ ބަލައެވެ.
އޭގެ ތެރޭގައި މެރިން ވީއެޗްއެފް ޗެކްކުރުމާއި އުޅަނދުގެ ކެޕްޓަންގެ އަތުގައި ކަނޑުގެ އުޅަނދު ދުއްވުމުގެ ލައިސަންސް އޮތްތޯ ބެލުމުގެ އިތުރުން، ދަތުރުވެރިންގެ ސަލާމަތާއި ރައްކާތެރިކަމާ ގުޅޭ ކަންކަން ބަލައެވެ. އަދި މާލޭގެ ބަނދަރުން ފުރާ އުޅަނދުފަހަރާއި މާލޭގެ ބަނދަރަށް ވަންނަ އުޅަނދު ފަހަރު ޗެކުކުރުމުގެ އިތުރުން މިފަދަ އޮޕަރޭޝަންތައް އަތޮޅުތެރޭގެ އެކި ސަރަހައްދުތަކުގައި ކޯސްޓުގާޑުން ކުރިއަށް ގެންދެއެވެ.
މީގެ އިތުރުން މޫސުންގޯސް ދުވަސްވަރު ދަތުރުކުރާނަމަ މޫސުމާބެހޭ އެންމެފަހުގެ މައުލޫމާތު ހޯދުމަށްފަހު ދަތުރުކުރުމަށާއި، ދުވާލުގެ ވަގުތު ދަތުރުކުރުމަށް ކޯސްޓްގާޑުން އިލްތިމާސްކުރެއެވެ. އަދި ދަތުރަށްފުރުމުގެ ކުރިން އެމައުލޫމާތު ކޯސްޓްގާޑަށް ހިއްސާކުރުމަށް ވެސް އެދިފައިވެއެވެ.
