މޯލްޑިވްސް ރިފޯމް މޫވްމެންޓް (އެމްއާރްއެމް)ގެ ހުސްވެފައިވާ މަގާމުތަކަށް ކުރިމަތިލުމުގެ ފުރުސަތު ހުޅުވާލައިފިއެވެ.
އެމްއާރްއެމްއިން ވަނީ އެ ޕާޓީގެ ހުސްވެފައިވާ މަގާމުތަކަށް މެމްބަރުން އިންތިޚާބުކުރުމަށް، 24 މެއި ވާ ބުދަ ދުވަހު އިންތިޚާބު ބޭއްވުމަށް ނިންމާފައެވެ. އެގޮތުން ހުސްވެފައިވާ މަގާމުތަކަށް ކުރިމަތިލުމުގެ ފުރުސަތު 14 މެއިން 18 މެއިގެ 16:00ގެ ނިޔަލަށް ހުޅުވާލާފައިވާކަމަށް އެމްއާރްއެމްއިން ބުނެފައިވެއެވެ.
އެމްއާރްއެމްއިން ކުރިމަތިލުމަށް ހުޅުވާލާފައިވާ މަގާމުތަކަކީ:
- ނާއިބުރައީސް
- ޒުވާނުންގެ ކައުންސިލުގެ ރައީސް
- އެގްޒެކެޓިވް ކޮމިޓީގެ މެމްބަރު (އަންހެން)
- އެގްޒެކެޓިވް ކޮމިޓީގެ މެމްބަރު (ފިރިހެން)
- ޒުވާނުންގެ ކައުންސިލް މެމްބަރު- ފިރިހެން (10 މަގާމު)
- ޒުވާނުންގެ ކައުންސިލް މެމްބަރު- އަންހެން (10 މަގާމު)
- އަންހެނުންގެ ކައުންސިލްގެ މެމްބަރު (13 މަގާމު)
އެމްއާރްއެމްއިން ބުނީ ފިރިހެން ޒުވާނުންގެ ކައުންސިލް މެމްބަރުންގެ ތެރެއިން އެންމެ ގިނަ ވޯޓު ލިބޭ 1 މެމްބަރު، އެކްސްކޯއިން ހުސްވެފައިވާ ޒުވާނުންގެ ކައުންސިލް (ފިރިހެން) މެމްބަރުކަމުގެ މަގާމަށް އިންތިޚާބުވާނެ ކަމަށާއި، އަދި އަންހެން ޒުވާނުންގެ ކައުންސިލް މެމްބަރުންގެ ތެރެއިން އެންމެ ގިނަ ވޯޓު ލިބޭ 2 މެމްބަރު، އެކްސްކޯއިން ހުސްވެފައިވާ ޒުވާނުންގެ ކައުންސިލް (އަންހެން) މެމްބަރުކަމުގެ މަގާމަށް އިންތިޚާބުވާނެ ކަމަށެވެ. ޒުވާނުންގެ ކައުންސިލް މެމްބަރުކަމަށް ކުރިމަތިލެވޭނީ އުމުރުން 31 އަހަރު ނުފުރޭ މެމްބަރުންނަށެވެ.
އެމްއާރްއެމްއިން ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ސަރުކާރާ ދެކޮޅަށް މަސައްކަތް ކުރާކަމަށް ބުނެ، އެ ޕާޓީގައި ތިބި ގިނަ އަދަދެއްގެ މެމްބަރުން ވަނީ ޕާޓީ ދޫކޮށް ގޮސްފައެވެ. މީގެ ތެރޭގައި މިހާރު ސަރުކާރުގެ އިސް މަގާމުތަކުގައި ތިއްބެވި ބޭބޭފުޅުން ފާހަގަކޮށްލެވެއެވެ.
