ކ. ފުށިދިއްގަރު ފަރަށް ދެ އުޅަނދެއް އެރި މައްސަލައިގައި އިންޑިއާ ކުންފުންޏެއް 100 މިލިއަން ރުފިޔާއިން ޖޫރިމަނާކޮށް، އެ ޖޫރިމަނާ ފައިސާ ދައްކާފައިނުވާ މައްސަލައިގައި އެ ކުންފުންޏާ ދެކޮޅަށް ދައުވާކޮށްފިއެވެ.

"މުތާ ރޯޔަލް" ކިޔާ ޓަގު ބޯޓާއި "މުތާ ގްރޭސް" ކިޔާ ބާޖު ފުށިދިއްގަރު ފަޅަށް އަރާފައިވަނީ 2015 ވަނަ އަހަރުގެ ޑިސެމްބަރު މަހުގެ 27 ވަނަ ދުވަހުއެވެ. އޭރު އުޅަނދުތައް ނަގައި އެންވަޔަރމަންޓް ޕްރޮޓެކްޝަން އޭޖެންސީ (އީޕީއޭ) އަށް އަންގާފައިވަނީ 19 މާރޗު 2017 ގައެވެ.

އީޕީއޭއިން އެ ސަރަޙައްދު ބެލުމަށްފަހު ސާރވޭއެއް ކޮށްފައިވެއެވެ. އަދި ސާރވޭގެ މަސައްކަތް ނިންމާފައިވަނީ 18 ސެޕްޓެމްބަރު 2017 ގައެވެ. އެއަށްފަހު އެ ފަރާތް ޖޫރިމަނާ ކޮށްފައިވަނީ 14 މާރޗު 2018 ގައެވެ. އެއީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާއި ބެހޭ ޤާނޫނުގެ ދަށުން ހެދިފައިވާ ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލުހޯދުމުގެ ޤަވާޢިދުގެ ދަށުންނެވެ.

އަދި ޖޫރިމަނާއަށްވާ 100 މިލިއަން ރުފިޔާ 30 ދުވަހުގެ ތެރޭގައި ދެއްކުމަށް އެ ދެ އުޅަަނދުގެ ލޯކަލް އޭޖެންޓުގެ ގޮތުގައި ހަރަކާތްތެރިވަމުން އައި މެއިންލޭންޑް ޝިޕިން ޕްރައިވެޓް ލިމިޓެޑަށް އޭރު އީޕީއޭއިން އެންގިއެވެ.

އެ ފައިސާ އަދިވެސް ދައްކާފައިނުވާތީ މިދިޔަ އަހަރުގެ އޮކްޓޯބަރު މަހުގެ ތެރޭގައި އީޕީއޭއިން ވަނީ އެ ކުންފުންޏާ ދެކޮޅަށް ދައުވާކޮށްދިނުމަށް އެދި ބަންޑާރަ ނައިބުގެ އޮފީހަށް ހުށަހަޅާފައެވެ. މި މައްސަލަ ޑިސެމްބަރު 28 ވަނަ ދުވަހު ކޯޓަށް ހުށަހަޅައި ކޯޓުގައި މައްސަލަ ކުރިއަށްދާކަމަށް ބަންޑާރަނައިބު އޮފީހުން ބުނެފައިވެއެވެ.

އީޕީއޭއިން ބުނީ އުޅަނދުތައް ފަރަށް އެރުމުގެ ސަބަބުން ފަރުގެ 4،370 އަކަމީޓަރުގެ ސަރަހައްދަކަށް ގެއްލުންވިކަމަށެވެ. އަދި، ތިމާވެއްޓަށް ލިބުނު ގެއްލުންތައް ބަލައި ވަޒަންކޮށް ކަނޑައެޅުނު ޖުމްލަ ޖޫރިމަނާގެ ޢަދަދަކީ 110.39 މިލިއަން ރުފިޔާ ކަމަށް އީޕީއޭއިން ބުނެ އެވެ. ނަމަވެސް، ޖޫރިމަނާގެ ގޮތުގައި ކަނޑައެޅެން އޮންނަ އެންމެ ބޮޑު ޢަދަދަކީ 100 (އެއްސަތޭކަ) މިލިއަން ރުފިޔާ ކަމުގައިވާތީވެ، ޖޫރިމަނާކޮށްފައިވަނީީ 100 މިލިއަން ރުފިޔާއިންކަމަށް އެޖެންސީން ބުނެ އެވެ.