ޔުއެފާ ކޮންފަރެންސް ލީގު ސެމީ ފައިނަލްގެ ފުރަތަމަ ލެގު ކާމިޔާބުކޮށް ވެސްޓް ހޭމް އިން ފައިނަލާގާތަށް ޖެހިލައިފިއެވެ.

ބުރާސްފަތި ދުވަހުގެ ރޭގައި ކުޅެވުނު ސެމީގެ ފުރަތަމަ ލެގުން އޭޒެޑް އަލްކްމާ އަތުން ވެސްޓް ހޭމް މޮޅުވީ 2-1 ގެ ނަތީޖާ އަކުންނެވެ. ލަންޑަން ސްޓޭޑިއަމްގައި ކުޅެވުނު މެޗުގެ ފުރަތަމަ ހާފު ނިމެން ހަރަތު މިނެޓަށް ވެފައިވަނިކޮށް މެޗުގެ ފުރަތަމަ ލަނޑު އަލްކްމާއަށް ކާމިޔާބުކޮށްދިނީ ރެއިންޑާސްއެވެ.

ފުރަތަމަ ހާފު ނިމުނުއިރު ބަލިކޮށް އޮތް ވެސްޓް ހޭމް ދެވަނަ ހާފު ފެށީ ކުޅުން އިތުރަށް ރަނގަޅުކޮށްގެނެވެ. މެޗުގެ 65 ވަނަ މިނެޓުގައި ވެސްޓް ހޭމްއަށް ލިބުނު ޕެނަލްޓީއެއް ކާމިޔާބުކޮށް ނަތީޖާ ހަމަހަމަކޮށްދިނީ ބެންރަހްމާއެވެ. އެ ލަނޑާއެކު ދެޓީމުގެ ކުޅުމަށް ބޮޑު ބަދަލެއް އައިސް، ވެސްޓް ހޭމްއަށް ފުރަތަމަ ފަހަރަށް ލީޑު ނަގައިދިނީ އެންޓޯނިއޯއެވެ. މި ސީޒަނުގައި އެންޓޯނިއޯ ޖެހި 14 ވަނަ ލަނޑާއެކު ވެސްޓް ހޭމްއިން ވަނީ މެޗު ކާމިޔާބުކޮށް އެޑްވާންޓޭޖް ހޯދާފައެވެ.

މެޗު ނިމުމަށްފަހު ވެސްޓް ހޭމްގެ ކޯޗު، ޑޭވިޑް މޮއިސް ބުނީ ލަނޑު ޖެހުމުގެ ކުރިން އޭނާ އުޅުނީ އެންޓޯނިއޯގެ ބަދަލުގައި ޑެނީ އިންގްސް ކުޅެން ނެރުމަށްކަމަށެވެ.

1976ގެ ފަހުން ޔޫރަޕް ފައިނަލެއް ކުޅެފައިނުވާ ވެސްޓް ހޭމް ވަނީ ފައިނަލާ ފިޔަވަޅަކަށް ގާތަށް ޖެހިލާފައެވެ. ސެމީ ފައިނަލްގެ ދެވަނަ ލެގު ކުޅޭނީ މެއި 19 ގައެވެ.