މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން 2022 ވަނަ އަހަރު ނިންމާލީ އެ ކުންފުނީގެ ތާރީހުގައި ވެސް އެންމެ ބޮޑު އާމްދަނީއާއުގައި ކަމަށް ރިޕޯޓުތަކުން ދައްކައިފިއެވެ.

އެމްޓީސީސީން ބުރާސްފަތި ދުވަހު އާއްމު ކުރި އެ ކުންފުނީގެ އަހަރީ ރިޕޯޓު ދައްކާ ގޮތުން މިދިޔަ އަހަރު ނިމުނުއިރު އެ ކުންފުންޏަށް އާމްދަނީގެ ގޮތުގައި 2.47 ބިލިއަން ރުފިޔާ ވަނީ ލިބިފައެވެ. މިއީ އޭގެ ކުރީ އަހަރާ އަޅާ ބަލާއިރު 26 އިންސައްތައިގެ ކުރިއެރުމެކެވެ. 2021 ވަނަ އަހަރު އެ ކުންފުންޏަށް އާމްދަނީގެ ގޮތުގައި ލިބުނީ 1.9 ބިލިއަން ރުފިޔާއެވެ.

ރިޕޯޓު ދައްކާ ގޮތުގައި އެންމެ ބޮޑު އާމްދަނީއެއް އެ ކުންފުންޏަށް ލިބިފައިވަނީ ކޮންޓްރެކްޓިންގ އެންޑް ޑްރެޖިންގެ ދާއިރާއިންނެވެ. އެ ދާއިރާއިން އެކަނިވެސް ދެ ބިލިއަން ރުފިޔާގެ އާމްދަނީއެއް ވަނީ ލިބިފައެވެ. އެ ދާއިރާގެ އިތުރުން ޓްރޭޑިންގ އިން 297 މިލިއަން ރުފިޔާ ލިބުނުއިރު ޓްރާންސްޕޯޓުން 110 މިލިއަން ރުފިޔާ އަދި އިތުރު ވިޔަފާރިތަކުން 24 މިލިއަން ރުފިޔާ ވަނީ ލިބިފައެެވެ.

އެމްޓީސީސީގެ މިދިޔަ އަހަރުގެ އާމްދަނީ ރެކޯޑު އަދަދަކަށް އަރާފައިވާއިރު މިދިޔަ އަހަރު އެ ކުންފުނީގެ ހިންގުމުގެ ފައިދާ ވެސް ވަނީ އޭގެ ކުރީ އަހަރާ އަޅާ ބަލާއިރު އިތުރުވެފައެވެ. އެގޮތުން، 2021 ވަނަ އަހަރު ހިންގުމުގެ ފައިދާގެ ގޮތުގައި 319 މިލިއަން ރުފިޔާ ލިބުނުއިރު މިދިޔަ އަހަރު ލިބިފައިވަނީ 324 މިލިއަން ރުފިޔާއެވެ. މިއީ ގާތްގަނޑަކަށް 1.5 އިންސައްތައިގެ ކުރިއެރުމެކެވެ.

އަހަރީ ރިޕޯޓުން ދައްކާ ގޮތުގައި މިދިޔަ އަހަރު އެމްޓީސީސީގެ އެޑްމިނިސްޓްރޭޓިވް ޚަރަދު ވަނީ 52 އިންސައްތަ އިތުރުވެފައެވެ. މި ބަދަލު އައީ ކުންފުނީގެ އޮޕަރޭޝަންތައް ފުޅާކޮށް އާ މުވައްޒަފުން އިތުރު ކުރުމުގެ ސަބަބުން ކަމަށް އެމްޓީސީސީން ބުނެއެވެ.

ޚަރަދުތައް އިތުރުވުމުގެ ސަބަބުން މިދިޔަ އަހަރު އެމްޓީސީސީއަށް ލިބުނު ސާފު ފައިދާ ވަނީ ދަށްވެފައެވެ. އެ ކުންފުންޏަށް މިދިޔަ އަހަރު ސާފު ފައިދާގެ ގޮތުގައި ލިބުނީ 195.7 މިލިއަން ރުފިޔާއެވެ. މިއީ 2021 ވަނަ އަރާ އަޅާ ބަލާއިރު 15 އިންސައްތައިގެ ދަށްވުމެކެވެ. 2021 ވަނަ އަހަރު އެ ކުންފުންޏަށް ލިބުނީ 231.3 މިލިއަން ރުފިޔާއެވެ.

އެމްޓީސީސީން ބުނެފައިވާ ގޮތުގައި އެ ކުންފުނީގެ ސާފު ފައިދާ މިދިޔަ އަހަރު ދަށްވެފައިވަނީ ދުނިޔޭގެ ބާޒާރުގައި ތަކެތީގެ އަގަށް އައި ބަދަލާއެކު ޚަރަދުތައް ބޮޑުވުމުން ކަމަށެވެ.

މިދިޔަ އަހަރު އެމްޓީސީސީން ރެކޯޑު އާމްދަނީއެއް ހޯދާފައިވާއިރު މިދިޔަ އަހަރުގެ ހިއްސާގެ ފައިދާގެ ގޮތުގައި ވެސް އެހެން އަހަރުތަކަށްވުރެ ބޮޑު އަދަދެއް ބެހުމަށް އެ ކުންފުނީގެ ބޯޑުން ވަނީ ނިންމާފައެވެ. އެގޮތުން، ބުރާސްފަތި ދުވަހު ބޭއްވި އެ ކުންފުނީގެ ބޯޑު ބައްދަލުވުމުގައި، މިއަހަރު އޮންނަ އަހަރީ އާއްމު ޖަލްސާއަށް ހުށަހެޅީ ހިއްސާއަކަށް 4 ރުފިޔާ ބެހުމަށެވެ. އެއީ ޖުމްލަ 8،037،749 (އަށް މިލިއަން ތިރީސް ހަތްހާސް ހަތްސަތޭކަ ސާޅީސް ނުވަ ރުފިޔާ) އެވެ.

އެމްޓީސީސީގެ މިދިޔަ އަހަރުގެ ރިޕޯޓުން އިތުރަށް ދައްކާ ގޮތުގައި އެކުންފުނިން ވަނީ އަހަރު ނިމުނުއިރު 22 މަޝްރޫއެއްގެ މަސައްކަތް އެއްކޮށް ނިންމާލައިފައެވެ. އަދި ކުންފުނީގެ އިޖުތިމާއީ ޒިންމާގެ ދަށުން 20 އަތޮޅެއްގެ 92 ރަށެއްގައި 420 ޕްރޮޖެކްޓެއް ވަނީ ކުރިއަށްގެންގޮސްފައެވެ. އެއީ 43،239،619 (ސާޅީސް ތިން މިލިއަން ދެ ލައްކަ ތިރީސް ނުވަ ހާސް ހަސަތޭކަ ނަވާރަ ރުފިޔާ) ގެ ޕްރޮޖެކްޓުތަކެވެ.