ހުދު ކަފުނުން ދަރިފުޅު ކަފުންކުރީ، ކައިވެނީގެ ހުދު ހެދުމުގައި އެ ދަރިފުޅު ދެކިލުމުގެ އުއްމީދުގައި ހުރި ބައްޕަގެ އަތުން!

ކިތަންމެ ދަތި ހާލެއްގައި އުޅެން ޖެހުނެއް ކަމަކު، ކޮންމެ މީހަކީވެސް ދިރިއުޅުމަށްޓަކައި ފޮނި ހުވަފެންތަކެއް ދެކި، ފޮނި އުއްމީދުތަކެއް ކުރާނެ މީހެއްކަން ޔަގީނެވެ. ވަކިން ޚާއްސަކޮށް، ޖަވާޖީ ހަޔާތެއްގެ ގޮށްޖަހާލައި، އަމިއްލަ ދިރިއުޅުމެއް އާރާސްތުކުރުމަށް ދެކޭނެ ހުވަފެންތަކަކީ ފޮނި ހުވަފެންތަކެއްކަން ގައިމެވެ. ނަމަވެސް، އެއީ ހަގީގީ ކުލަ ޖެހެން ނެތް ބިލާހަކަށް ވެގެން ދިއުމަށް ބައެއްފަހަރު މާ ގިނަ ވަގުތެއް ނުނަގައެވެ. މުޅި ދިރިއުޅުން ބަނަވެގެން ދަނީ، އެހެން ބައެއްގެ ދެބަސްވުމުގެ ތެރެއިން ބަދަލުކުރާ ވަޒަންތަކުގެ އަމާޒުފަތްގަނޑަކަށް ވެގެންނެވެ.

ޢުމުރުން އެންމެ 19 އަހަރުގެ މުހައްމަދު ސައީދަށް، އޭނާގެ މުސްތަގުބަލުގެ ރާނީ ނުވަތަ ހަޔާތުގެ ބައިވެރިޔާ އެންމެ ފަހުން ފެނުނީ، މެއި 9 ވަނަ ދުވަހު އިޒްރޭލުން ޣައްޒާއަށް ދިން ވައިގެ ހަމަލާތަކުގެ ކުޑަ ވަގުތުކޮޅެއް ކުރިންނެވެ. އެ ހަމަލާތަކުގައި ސައީދުގެ ރާނީ މި ދުނިޔެއާ ވަކިވެ ދިޔައިރު، އެ ދެ ޒުވާނުން ދިޔައީ ކައިވެންޏަށް އެންމެ ފަހުގެ ތައްޔާރީތައް ވަމުންނެވެ. އެކުގައި ހޭދަކުރި އެންމެ ފަހު ވަގުތުކޮޅުވެސް ހޭދަކުރީ، ރަންކިއުމުގެ ހަފުލާގައި ފޮޓޯއަށް ހުއްޓޭނެ ގޮތަކާމެދު މަޝްވަރާ ކުރުމުގައެވެ.

ސައީދުގެ ހިތުގެ ރާނީ، ދާނިއާ އަދާސް، 19، އާއި އޭނާގެ ކޮއްކޮ، އުމުރުން އެންމެ 16 އަހަރުގެ އީމާން މި ދުނިޔެއާ ވަކިވީ، އެ ކުދިން ދިރިއުޅެމުން ދިޔަ ގެއާ ޖެހިގެން ހުރި އިމާރާތަށް އިޒްރޭލުން ދިން ހަމަލާގައެވެ.

ބުނެވޭގޮތުގައި އެ އިމާރާތަކީ އިސްލާމިކް ޖިހާދުގެ ލީޑަރެއް ކަމަށްވާ ޚަލީލް އަލް-ބަހްތިނީއާއި އޭނާގެ އާއިލާ ދިރިއުޅުނު އިމާރާތެވެ. އެ ހަމަލާގައި އަލް-ބަހްތިނީއާއި، އޭނާގެ އަންހެނުންނާއި ދަރިފުޅުވެސް ވަނީ މަރުވެފައެވެ. އަންގާރަ ދުވަހުގެ ހަމަލާތަކުގައި އާންމުންގެ 10 މީހެއްގެ ފުރާނަ ގެއްލިފައިވާއިރު، އޭގެތެރޭގައި 5 އަންހެނުންނާއި 4 ކުޑަކުދިންވެސް ހިމެނެއެވެ.

ސައީދުއަށް ވާހަކަދެއްކެނީވެސް ކިރިޔާއެވެ. ނޭވާލުމަކީވެސް މިއަދު އޭނާއަށް ތަކުލީފެކެވެ. ވަރަށް ހާލުން ނޭވާލަމުން، އޭނާގެ ހަޔާތުގެ ވާހަކަތައް ކިޔައިދެމުން ސައީދު ބުނީ، އެ ދެލޯބިވެރިން އެކަކު އަނެކަކަށް ވައުދުވީ އުމުރު ދުވަހަށްވެސް އެކުގައި އުޅުމަށް ކަމަށެވެ.

މަރުވަންދެންވެސް އެކުގައި އުޅުމަށް ވީ ވައުދު، ހިތި ހަގީގަތަކަށް ވީއެވެ.

ދާނިއާއާއި އީމާންގެ މަންމަ ދުނިޔޭގައި އެބައިނެވެ. އޭނާ ކިޔައިދިންގޮތުގައި، ހަމަލާތަކަށްފަހު އޭނާގެ އަންހެން ދަރިންނަށް ގޮވައިހެދިއެވެ. ނަމަވެސް އެއްވެސް ދަރިއެއްގެ ފަރާތުން އިޖާބައެއް ނުލިބުނެވެ.

ހިތުހުރި ކަމެއް ކުރުމަށްފަހު އަބަދުވެސް ދިފާއަށް ކުޅޭ އިޒްރޭލުން ބުނާގޮތުގައި އަލް-ބަހްތިނީއަކީ، ވައިގެ ހަމަލާތަކުގައި މަރާލާފައިވާ އިސްލާމިކް ޖިހާދުގެ 3 (އިސް) ލީޑަރުންގެ ތެރެއިން އެކަކެވެ. އިޒްރޭލުން ބުނާގޮތުގައި މިދިޔަ ހަފުތާގައި އިޒްރޭލަށް އަމާޒުވި ހަމަލާތަކުގެ ޒިންމާ އުފުލަންޖެހޭ ކޮމާންޑަރަކީ އަލް-ބަހްތިނީއެވެ.

އަންގާރަ ދުވަހުގެ ހަމަލާތަކުގައި އަންހެނުންނާއި ކުޑަ ކުދިންގެ ފުރާނަ ގެއްލިދިޔަކަމަށް އިޒްރޭލުންވެސް ބުނެއެވެ. ނަމަވެސް، ދިފާއަށް ކުޅުމުގެގޮތުން، އާންމުންގެ ފުރާނަ ގެއްލޭ މިންވަރު މަދުކުރުމަށް މަސައްކަތްކުރާކަމަށް ވަނީ ބުނެފައެވެ.

ޣައްޒާގައި ހަރަކާތްތެރިވެވަޑައިގަންނަވާ ފަލަސްތީނުގެ އޮފިޝަލުން ވިދާޅުވާގޮތުގައި، އިޒްރޭލުގެ ހަމަލާތައް އަމާޒުކޮށްފައިވަނީ އާންމުން ދިރިއުޅެމުންދާ އިމާރާތްތަކަށެވެ. ޣައްޒާއަކީ 364 އަކަ ކިލޯމީޓަރުގެ ސަރަހައްދެއްގައި، 2.3 މިލިއަން މީހުން އިންތިހާ ދަތި ހާލުގައި ދިރިއުޅެމުންދާ، އަނގަމަތި ހާ ޖަލެކެވެ. އަންހެނުންނާއި ކުޑަކުދިންވެސް ދިރިއުޅެމުންދާ އިމާރާތްތަކަކަށް އަމާޒުކޮށް އިޒްރޭލުން ދިން ހަމަލާތަކަކީ، މަދަނީ ދިރިއުޅުމުގެ ކަރާމާތް ގެއްލޭ ގޮތަށް ދިން ހަމަލާތަކެއް ކަމަށްވެސް ފަލަސްތީނުގެ އޮފިޝަލުން ވަނީ ސިފަކުރައްވާފައެވެ.

ސިލްސިލާ ގޮތެއްގައި އިޒްރޭލުން ފަލަސްތީނަށް ހަމަލާތައް ދެމުން ދާއިރު، މެއި 9 ވަނަ ދުވަހު ވަރުގަދަކުރަންފެށި ހަމަލާތަކުގައި މިހާތަނަށް 20ށްވުރެ ގިނަ މީހުންގެ ފުރާނަ ވަނީ ގެއްލިފައެވެ. އޭގެތެރޭގައި، ދާނިއާ ފަދައިން ދިރިއުޅުމަށް އެތައް ހުވަފެނެއް ދެކެމުން ދިޔަ ބަޔަކު ހިމެނޭނެކަން ގައިމެވެ.