ޖޯކަރަކަށް ޣައްޒާ ހެއްވާލެވިދާނެތަ؟

ހާސްކަމާއި މާޔޫސްކަމާއި ނުތަނަވަސްކަމަކީ މީހާގެ ޢުމުރުން ވަކި އަހަރެއް ފުރުމުން ކުރިމަތިވާ ކަންތައްތަކެއް ނޫނެވެ. ދިރިއުޅެން ޖެހިފައި ވާ ހާލެއްގެ ސަބަބުން، އިންތިހާ ޅަ ޢުމުރުގައިވެސް މި ތަކުލީފުތައް އުފުލަން ޖެހެއެވެ. އެފަދަ ހާލެއްގައި ދުވަސްތައް ގުނަމުންދާ ކުދިބަޔަކު ދިރިއުޅެމުންދާ އެއް ސަރަޙައްދަކީ، ޔަހޫދީ އިޒްރޭލުގެ ގޮށްމޮށު ތެރޭގައި ފިއްތާލާފައި ވާ ފަލަސްޠީނުގެ ޣައްޒާއެވެ. ހާސްކަމާއި މާޔޫސްކަމާއި ނުތަނަވަސްކަމުން ސަލާމަތްވެ، ޚިޔާލާއި ފިކުރު ތާޒާކޮށްލަން ގޮސް އުޅޭނެ ކާނިވާލެއް ނޫނީ ފެއަރއެއްވެސް ޣައްޒާގައި ނޯވެއެވެ. އެއަށްވުރެ ބޮޑަށް، ޣައްޒާ ވަށާލާފައި ވަނީ ހަނގުރާމައާއި އިންތިހާ ފަޤީރު ކަމުގެ ދަންތުރަތަކުންނެވެ.

މިއިން އެއްވެސް ކަމަކީ ޢަލާ މިޤްދާދްއާއި ފިދާ ލިދާވީގެ މަސައްކަތަށް އޮތް ހުރަހެއް ކަމުގައި އެ މީހުން ނުދެކެއެވެ. ކާނިވަލެއް ނުވަތަ ކުޑަކުދިންގެ ހާއްސަ ހަވީރެއް ނެތެއް ކަމަކު، މިޤްދާދްއާއި ލިދާވީ ހެދުން އަޅައިގެން ތިބެނީ، ކުޑަކުދިންގެ މެދުގައި އެތައް ޒަމާނެއްސުރެ ބޮޑު މަޤްބޫލު ކަމެއް ހޯދާފައި ވާ ކްލައުން ނުވަތަ ދިވެހިން ކިއާ އުޅޭ ގޮތުން ނަމަ ޖޯކަރެއްގެ ގޮތަށެވެ. ޖޯކަރު ހެދުން އަޅައިގެން މިޤްދާދްއާއި ލިދާވީ ދަނީ ތުއްތު ކުދިންނަށް ކިޔަވާ ދޭ ސްކޫލްތަކާއި، ޕާކުތަކަށެވެ. ބައެއް ފަހަރު، ހޮސްޕިޓަލުތަކަށް ގޮސް، އެތާ ތިބޭ ކުދިންގެ ހިތް އުފާކޮށްދީވެސް ހަދައެވެ.

"ޕަލަސްޓައިން ޓްރޯމާ ސެންޓަރ (ޔޫކޭ)"ގެ މެންބަރުންގެ މަސައްކަތަކީ މިއެވެ. ޖޯކަރުން ގޮތަށް ހެދުން އަޅާ، މޭކަޕް ކޮށްގެން، ކުޑަކުދިންނާއެކު ނަށާ، ލަވަކިއާ، ކުޅެ ހެދުމެވެ. އެކުދިންގެ މޫނުތަކަށް ހިނިތުންވުން ގެނެސްދިނުމުގެ މަޤްޞަދުގައެވެ. ދިރިއުޅުމުގެ މައިދާނުގައި ކުރިމަތިލާން ޖެހިފައި ވާ ހާސްކަމާއި ނުތަނަވަސްކަމުން، ކުޑަ ވަޤުތު ކޮޅަކަށް ނަމަވެސް، މިންޖުވެލާނެ ފުރުޞަތެއް ހޯދާ ދިނުމުގެ ބޭނުމުގައެވެ.

މި ދުވަސްވަރަކީ އިޒްރޭލުގެ ހަމަލާތައް އަނެއްކާވެސް ވަރުގަދަ ކޮށްފައި ވާ ދުވަސްވަރަކަށް ވާ އިރު، ލިދާވީއާއި މިޤްދާދް ފަދަ މީހުންގެ އެހީއަށް، ފަލަސްޠީނު ވަނީ ނުހަނު ބޭނުންވެފައެވެ.

އިޒްރޭލާއި ޣައްޒާއާ ދެމެދު ސިލްސިލާ ގޮތެއްގައި ކުރަމުންދާ ހަނގުރާމަތަކުގެ ނަތީޖާއެއްގެ ގޮތުން ޣައްޒާގެ ގިނަ ޢަދަދެއްގެ ކުޑަކުދިންނަކީ ނަފްސާނީ ބިރުވެރިކަމުގެ ނޭދެވޭ އަސަރުތަކުގެ ވޭން ތަޙައްމަލު ކުރަމުންދާ ކުދިންނެވެ. ޖަޒުބާތީ ނުތަނަވަސްކަންވެސް އޭގެ އެންމެ އިންތިހާއެވެ.

އިންތިހާ ބިރުވެރިކަމާއި ހާސްކަމާއި ނުތަނަވަސްކަމުގެ ސަބަބުން ނަފްސާނީ ފަރުވާ ބޭނުންވާ ފަރާތްތަކަށް އެ ޚިދުމަތްތަކެއްވެސް "ޕަލަސްޓައިން ޓްރޯމާ ސެންޓަރ (ޔޫކޭ)" އިން ފޯރުކޮށްދެއެވެ. ތެރަޕީ ސެޝަންތައް ހިންގައިދެއެވެ.

ފިޒިއޮލޮޖިސްޓް ސަމާރު އަވާދު ފާހަގަ ކުރެއްވި ގޮތުގައި، ޣައްޒާގެ ރަށްވެހިންނަކީ އެތައް އަހަރެއް ވަންދެން އިންތިހާ ބިރުވެރިކަން، ތަކުރާރުކޮށް ތަޙައްމަލު ކުރަމުންދާ ބައެކެވެ.

މިދިޔަ އަހަރުގެ ހޫނު މޫސުމުގައި، ސޭވް ދަ ޗިލްރަންއިން އާންމު ކުރި ހޯދުންތަކުން ދައްކާ ގޮތުގައި، ފާއިތުވީ 15 އަހަރު ދުވަސް، އެއް ގޮތަށްވުރެ ގިނަ ގޮތް ގޮތުން ފިއްތާލާފައި އޮތް ޣައްޒަގައި ދިރިއުޅޭ ކޮންމެ 5 ކުޑަކުއްޖަކުން 1 ކުއްޖަކީ ޑިޕްރެޝަން، އިންތިހާ ހިތާމަ އަދި ބިރުވެރިކަމުގައި ދިރިއުޅެމުންދަ ކުއްޖެކެވެ.