އަލް ހިލާލްގެ ކޯޗަކަށް ލުއިސް އެންރީކޭ ހަމަޖައްސަން މަސައްކަތް ކުރަނީ

ސައުދީ ޕްރޯ ލީގުގެ އަލް ހިލާލްގެ ކޯޗަކަށް ސްޕެއިންގެ ލުއިސް އެންރީކޭ ހަމަޖައްސަން މަސައްކަތް ކުރަމުން އަންނަ ކަމަށް މީޑިއާ ރިޕޯޓުތައް ބުނެފި އެވެ.

ދާދި ފަހުން ނިމުނު އޭއެފްސީ އޭޝިއަން ޗެމްޕިއަންސް ލީގުގެ ފައިނަލުން އަލް ހިލާލް ބަލިވުމުން އެ ޓީމުގެ އިސްވެރިން ވަނީ ކޯޗުކަމުން ރާމޯން ޑިއާޒް ވަކިކުރުމަށް މަޝްވަރާ ކުރަމުން ކަމަށް މީޑިއާ ތަކުގައި ވަނީ ބުނެފަ އެވެ. ޑިއާޒް ވަކި ކުރުމަށް ފަހު އެ މަގާމަށް އަލް ހިލާލް އިން ގެންނަން ބޭނުންވަނީ ޔޫރަޕުގައި މީގެ ކުރިން ކާމިޔާބު މަސައްކަތްތަކެއް ކޮށްފައިވާ އެންރީކޭ ކަމަށް ވަނީ ބުނެފަ އެވެ. އުމުރުން 52 އަހަރުގެ އެންރީކޭ އެންމެ ފަހުން ހުރީ ސްޕެއިން ޤައުމީ ޓީމުގެ ކޯޗުކަމުގެ މަޤާމުގަ އެވެ. ނަމަވެސް މިދިޔަ އަހަރު ނިމުނު ފީފާ ވޯލްޑް ކަޕްގެ ގަދަ 16 އިން ސްޕެއިން ކެޓުމާއެކު އެންރީކޭ ވަނީ މަގާމުން ވަކިވެފަ އެވެ. ވޯލްޑް ކަޕަށްފަހު އެންރީކޭ ސްޕެއިންގެ އެތުލެޓިކޯ މެޑްރިޑުގެ ކޯޗުކަމާ ހަވާލުވާނެ ކަމަށް އޭރު މީޑިއާ ރިޕޯޓުތައް ބުންޏެވެ. ނަމަވެސް މިހާތަަނަށް އެކަމާ ގުޅޭ އެއްވެސް މަޝްވަރާއެއް ކުރިއަކަށް ނުދެ އެވެ.

އަލް ހިލާލް އިން މިހާރު އަންނަނީ އެކަމާ ގުޅޭ މަޝްވަރާތައް އެންރީކޭއާ ކުރަމުން ކަމަށް މީޑިއާތަކުގައި ބުނެފައިވާއިރު، އެކަމާ މެދު އެންރީކޭ ނިންމާނެ ވަކި ގޮތެއް އެނގިފައެއް ނުވެ އެވެ. ސްޕެއިންގެ ކޯޗުކަމުން ވަކިވުމަށް ފަހު އެންރީކޭ ބުނެފައި ވަނީ އޭނާ ބޭނުންވަނީ އަލުން އަނބުރާ ކުލަބު ފުޓުބޯޅަ އަށް އަންނަން ކަމަށާއި، އެކަމަށް ޝައުޤުވެރިކަން ހުންނަ ކަމަށެވެ. އޭގެ ފަހުން އިނގިރޭސި ޕްރިމިއާ ލީގުގެ ޗެލްސީގެ ކޯޗަކަށް އެންރީކޭ ހަމަޖެއްސުމަށް މަސައްކަތް ކުރި ނަމަވެސް، އެ ލިސްޓުން ފަހު ވަގުތު އޭނާ ބޭރުވެފައިވާ ކަމަށް ރިޕޯޓުތަކުގައި ވަނީ ބުނެފަ އެވެ.

އެންރީކޭ އެންމެ ކާމިޔާބު މަސައްކަތެއް ކޮށްފައި ވަނީ 2014 އިން 2017 އަށް ބާސެލޯނާގަ އެވެ. އެ މުއްދަތުގައި އޭނާ ވަނީ އެކުލަބާއެކު ނުވަ ތައްޓެއް ކާމިޔާބުކޮށްފަ އެވެ. އޭގެ ތެރޭގައި ދެ ސްޕެނިޝް ލީގު، ތިން ކޮޕަ ޑެލް ރޭ، އެއް ސްޕެނިޝް ސުޕަ ކަޕް، އެއް ޔުއެފާ ޗެމްޕިއަންސް ލީގު، އެއް ޔުއެފާ ސުޕަ ކަޕް އަދި އެއް ފީފާ ކުލަބު ވޯލްޑް ކަޕް ހިމެނެ އެވެ.