ޕެންޝަން ފައިސާއިން ހައްޖަށް މީހުން ގެންދިއުމުގެ ފުރުސަތު ހުޅުވާލައިފި
އެއްބަސްވުން ހަދާނީ އިސްލާމިކް މިނިސްޓްރީން ހުއްދަ ދީފައިވާ ފަރާތްތަކާއެކު
މައްކާގެ ހަރަމް
ފަރުޟު ހައްޖުވުމަށް މޯލްޑިވްސް ރިޓަޔަރމަންޓް ޕެންޝަން ސްކީމުން ފައިސާ ދޫކުރުމާ ބެހޭ ގަވާއިދުގެ ދަށުން، މިއަހަރު މީހުން ހައްޖަށް ގެންދިއުމުގެ ޚިދުމަތް ދިނުމަށް ޝައުގުވެރިވާ ފަރާތްތަކަށް އެކަމަށް ކުރިމަތިލުމުގެ ފުރުސަތު ހުޅުވާލައިފިއެވެ.
މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން ބުނީ ފަރުޟު ހައްޖުވުމަށް މޯލްޑިވްސް ރިޓަޔަރމަންޓް ޕެންޝަން ސްކީމުން ފައިސާ ދޫކުރުމާ ބެހޭ ގަވާއިދުގެ ދަށުން ހައްޖަށް ގެންދިއުމުގެ ޚިދުމަތް ފޯރުކޮށްދެވޭނީ ޕެންޝަން އޮފީހާއެކު އެއްބަސްވުން ގާއިމުކޮށްފައިވާ ހައްޖަށް ގެންދިއުމުގެ ޚިދުމަތް ފޯރުކޮށްދޭ ފަރާތްތަކަށް ކަމަށެވެ.
އެހެންކަމުން އިސްލާމިކް މިނިސްޓްރީން މިއަހަރުގެ 20 އޭޕްރީލްގައި ކުރި އިއުލާނުގެ ދަށުން 1444 ވަނަ އަހަރު މީހުން ހައްޖަށް ގެންދިއުމުގެ ހުއްދަ ދީފައިވާ ފަރާތްތަކުގެ ތެރެއިންް، ފަރުޟު ހައްޖުވުމަށް މޯލްޑިވްސް ރިޓަޔަރމަންޓް ޕެންޝަން ސްކީމުން ފައިސާ ދޫކުރުމާ ބެހޭ ގަވާއިދުގެ 9 ވަނަ މާއްދާގެ (ހ) ގައި ބަޔާންކޮށްފައިވާ އެއްބަސްވުން ގާއިމުކޮށް ޚިދުމަތް ދިނުމަށް ބޭނުންވާ ފަރާތްތަކުން މި ހިނގާ މެއި މަހުގެ 14 ވަނަ ދުވަހުގެ 14:00 ގެ ކުރިން ސިޓީ ނުވަތަ އީމެއިލް މެދުވެރިކޮށް އެ އޮފީހަށް އެކަން އެންގުމަށް ޕެންޝަން އޮފީހުން ވަނީ އެދިފައެވެ.
ޕެންޝަން ފައިސާއިން ހައްޖުގެ އަޅުކަން އަދާކުރެވެނީ ޕެންޝަން ފަންޑުގައި މަދުވެގެން 336،000 ރުފިޔާ ހުރިނަމައެވެ. އެއީ ޕެންޝަން ލިބޭ އުމުރު ހަމަވާއިރު މަހަކު 2،000 ރުފިޔާ ޕެންޝަން ސްކީމުން ދިނުމަށް ބޭނުންވާ އެންމެ މަދު މިންވަރެވެ. އަދި ގެދޮރު ގަތުމަށް ޕެންޝަން ފަންޑުގައި ހުރި ފައިސާ ކޮލެޓަރަލައިޒް ކޮށްފައިވާ ފަރާތެއްނަމަ، އެ އަދަދު ނުހިމަނައި އެންމެ މަދުވެގެން 336،000 ރުފިޔާ އެކައުންޓަށް ޖަމާވެފައި ހުންނަންޖެހޭނެ ކަމަށް ގަވާއިދުގައި ބުނެއެވެ.
އަދި އެމީހަކީ ޙައްޖުވުމަށް އެދި ހުށަހަޅާ އަހަރު، ހައްޖުވުމަށް ޖާގަ ކަށަވަރުވެފައިވާ މީހަކަށް ވާންޖެހޭނެ ކަމަށާއި، ރިޓަޔަރމަންޓް ސޭވިންގްސް އެކައުންޓުގައިވާ ފައިސާ ބޭނުންކުރުމަށް އެއްބަސްވާ ބައިވެރިއަކަށް ވާންޖެހެއެވެ. އަދި ހުރިހާ ޝަރުތުތަކަށާއި، ކަންކަމަށް އެއްބަސްވާންޖެހެއެވެ.
މި ގަވާއިދުގައި ވާގޮތުން ހައްޖުގެ އަޅުކަން އަދާކުރުމަށް ޕެންޝަން ފަންޑުން ދޫކުރާނީ ހައްޖަށް ގެންދިއުމުގެ ރަސްމީ އަގުގެ ގޮތުގައި ސަރުކާރުން އެ އަހަރަކަށް ކަނޑައަޅައިފައިވާ އަދަދުގެ 50 އިންސައްތައަށްވުރެ އިތުރުނުވާ މިންވަރެކެވެ.
މީގެ އިތުރުން ޕެންޝަން އޮފީހާއި ޙައްޖަށް ގެންދިއުމުގެ ޚިދުމަތް ފޯރުކޮށްދޭ ފަރާތްތަކާ ދެމެދު މިކަމާބެހޭ އެއްބަސްވުމެއް އެކުލަވައިލަންވާނެކަމަށް މި ގަވާއިދުގައި ވެއެވެ. އަދިި ހައްޖަށް ގެންދިއުމުގެ ޚިދުމަތް ހަމައެކަނި ފޯރުކޮށްދެވޭނީ ޕެންޝަން އޮފީހާއެކު އެއްބަސްވުން ޤާއިމްކޮށްފައިވާ ޙައްޖަށް ގެންދިއުމުގެ ޚިދުމަތް ފޯރުކޮށްދޭ ފަރާތްތަކަށް ކަމަށް މި ގަވާއިދުގައި ބުނެފައިވެއެވެ.
