ލީގުގެ ފެށުން ޓީސީއަށް، ވެލެންސިޔާގެ ޒުވާން ޓީމް ބަލި!
8 މެއި 2023 | ހޯމަ 13:40ޓީސީން މެޗު ކާމިޔާބުކުރީ 2-0 ން
ލީގުގެ ފުރަތަމަ މެޗުގައި ޓީސީއާއި ވެލެންސިޔާ ވާދަކުރި މެޗުގެ ތެރެއިން
ލީގަށް އަދި ތައްޔާރު ނުވެވޭކަމަށް ބުނި ޓީސީން ދިވެހި ޕްރިމިއަރ ލީގުގެ ފުރަތަމަ މެޗު ކާމިޔާބުކޮށްފިއެވެ.
ކުޅުންތެރިން ހަމަކޮށް ރަނގަޅަށް ޕްރެކްޓިސް ފަށައިނުގަނެވޭ ޓީސީން ލީގުގައި ކުޅުނު ފުރަތަމަ މެޗު ކާމިޔާބުކުރީ ވެލެންސިޔާއާ ވާދަކޮށް 2-0 ނެވެ. ގޯލްގެ ތަފާތުން ޕްރެޒިޑެންޓް ކަޕްގެ ސެމީފައިނަލުން ފުރުޞަތު ގެއްލުނު ޓީސީން ވެލެންސިޔާ ކޮޅަށް ދެ ލަނޑުވެސް ޖެހީ ފުރަތަމަ ހާފްގައެވެ. ފުރަތަމަ ލަނޑު ޖެހީ މުޙައްމަދު މުސްލިހުއެވެ. ދެވަނަ ލަނޑު ޖެހީ އަހުމަދު މާއިޝް ރަޝީދުއެވެ. ހެޑް ކޯޗެއް ނެތި ސީޒަނާ ކުރިމަތިލީ ޓީސީން ވަނީ ޕްރެޒިޑެންޓް ކަޕްގައި ބުރުވެސް ބަލިކޮށްފައެވެ. މިސީޒަންގައި ކުޅުނު ތިން މެޗުގެ ތެރެއިން ބަލިވީ މާޒިޔާ އަތުންނެވެ. ވެލެންސިޔާ ސީޒަންގައި ކުޅުނު ތިން މެޗުންވެސް ވަނީ ބަލިވެފައެވެ. ވެލެންސިޔާއިން އާސީޒަނަށް އެހެން ޓީމްތަކުން ގެނައި ސީނިއަރ ތިން ކުޅުންތެރިންނަށް އަދި ކުޅުމުގެ ފުރުޞަތު ނުލިބެއެވެ. ވެލެންސިޔާ ޓީމް ބިނާވެފައި އޮތީ އިންޓަރ ސްކޫލް ކުޅުނު ޅަ ކުޅުންތެރިންގެ މައްޗަށެވެ.
ލީގުގެ ދެވަނަ މެޗުގައި މިރޭ ވާދަކުރާނީ އީގަލްސްއާއި ބުރު ސްޕޯރޓްސް ކްލަބެވެ. ޕްރެޒިޑެންޓް ކަޕް ސެމީފައިނަލްގައި މިދެޓީމް ވާދަކުރިއެވެ. އެމެޗު ކާމިޔާބުކޮށް އީގަލްސް ފައިނަލަށް ދަތުރުކުރީ ނަތީޖާ ނެރުމަށް ކުޅުނު އިތުރު ވަގުތުގައި ކުރިހޯދައިގެންނެވެ.
