ޕްރެޒިޑެންޓްސް ކަޕްގެ ފައިނަލްގައި މާޒިޔާ ސްޕޯޓްސް އެންޑް ރެކްރިއޭޝަން އަތުން ބަލިވުމުން އެކަމުގެ އަސަރު ކުލަބު އީގަލްސްގައި ހުންނާނެ ކަމަށާއި، ނަމަވެސް އެ ޓީމަށް ލީގަށް ވާދަކުރެވޭނެ ކަމަށް އެ ޓީމުގެ އެސިސްޓެންޓް ކޯޗު މުއާވިޔަތު އިލްހާމް ބުނެފި އެވެ.
ދިވެހި ޕްރިމިއާ ލީގުގައި އީގަލްސް އިން ބުރު ސްޕޯޓްސް ކުލަބާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސް އަށް ކޯޗު އިޙުސާން ޢަބްދުލް ޣަނީ (ސާންތީ) އަށް ޙާޟިރުވެވިފައެއް ނުވެ އެވެ. އެހެންކަމުން ޕްރެސްގައި ބައިވެރިވީ މުއާވިޔަތު އެވެ. ޕްރެސް ފަށަމުން ވެސް އޭނާ ބުނީ، މާޒިޔާ އަތުން 2-0 އިން ބަލިވި މެޗާއެކު ޓީމުގައި ކޮންމެވެސް ވަރެއްގެ އުނދަގޫތަކެއް ހުންނާނެ ކަމަށެވެ. އެހެން ނަމަވެސް ކުރިއަށް އޮތް ލީގުގައި އީގަލަސްގެ ހިތްވަރަކީ ކުޅުންތެރިންގެ ހިތްވަރު ކަމަށް މުއާވިޔަތު ވަނީ ބުނެފަ އެވެ. އެގޮތުން ކުރިއަށް އޮތް މެޗަށް އީގަލްސް އިން ނިކުންނާނީ އެ މެޗު ކާމިޔާބު ކުރުމުގެ އަޒުމުގައި ކަމަށް ވެސް އޭނާ ވަނީ ބުނެފަ އެވެ.
ލީގުގައި އީގަލްސްގެ ޕްލޭނަކީ މެޗަކަށް ފަހު މެޗެއް ކާމިޔާބު ކުރުން ކަމަށާއި، ލީގަށް ވާދަކުރެވޭނެ ފެންވަރު އީގަލްސް ޓީމުގައި އޮތް ކަމަށް ޤަބޫލު ކުރާ ކަމަށް ވެސް މުއާވިޔަތު ވަނީ ބުނެފަ އެވެ. މުއާވިޔަތު ފާހަގަ ކުރި ގޮތުގައި އެކަމަކީ ފުޓުބޯޅަ ބަލާ އެންމެން ވެސް ޤަބޫލު ކުރާނެ ކަމެކެވެ. އޭގެ އިތުރަށް ޕްރެޒިޑެންޓްސް ކަޕްގައި އީގަލްސްގެ ކުޅުންތެރިންގެ ފަރާތުން ފެނުނު ކުޅުމާއި، ކުޅުންތެރިން ކުރި ބުރަ މަސައްކަތް ފާހަގަ ކުރާ ކަމަށް ވެސް މުއާވިޔަތު ވަނީ ބުނެފަ އެވެ. ޓީމުގައި ތިބި ބިދޭސީ ކުޅުންތެރިންގެ ފަރާތުން އެންމެ އެކަށީގެންވާ ފެންވަރުގެ ކުޅުމެއް ނުފެނުނު ކަމަށް ސުވާލު ކުރުމުން މުއާވިޔަތު ބުނީ، އެ ކުޅުންތެރިންނަށް ވަގުތު ބޭނުންވާނެ ކަމަށެވެ. ޚާއްސަކޮށް ރާއްޖޭގެ މަހައުލަށް ހޭނެއް ވަގުތު ބޭނުންވާނެ ކަމަށާއި، އެކަމުގައި ދަތިތަކެއް ހުރި ކަމަށް ވެސް އޭނާ ވަނީ ފާހަގަކޮށްފަ އެވެ. އޭނާ ބުނީ މިވަގުތު މަސައްކަތް ކުރަމުން ދަނީ ޓީމުގައި ހުރި އަނިޔާތަކަށް ކަމަށާއި، ކުރިއަށް އޮތް ތަނުގައި ކުޅުންތެރިންގެ އަނިޔާ ރަނގަޅުވާނެ ކަމަށް އުންމީދު ކުރާ ކަމަށެވެ.
ދެން ފޮރިން ޕްލޭޔަރުންނަށް ވަގުތު ކޮޅެއް ނަގާނެތާ، ރާއްޖޭގެ މާހައުލަށް ހޭނެން. އަދި ވެސް އޭގެ ދަތިތަކެއް އެބަހުރި އަޅުގަނޑުމެންގެ ތެރޭގައި. ދެން އިރާދަކުރެއްވިއްޔާ މިވަގުތު އަޅުގަނޑުމެން މި ދަނީ އެންޖަރީތައް ރިކަވާ ކުރުމުގެ މަސައްކަތް ކުރަމުން. ކުރިއަށް އޮތް ތަނުގައި އެބައި ވެސް ވަރަށް އަވަހަށް ރަނގަޅުވެގެން ދާނެ ކަމަށް މި އުންމީދު ކުރަނީ.މުއާވިޔަތު އިލްހާމް / ކުލަބު އީގަލްސްގެ އެސިސްޓެންޓް ކޯޗު
ބުރު މެޗާ ގުޅޭ ގޮތުން މުއާވިޔަތު ބުނީ، އީގަލްސް އިން އެ މެޗު އެއްވެސް ވަރަކަށް ފަސޭހަ ނުކުރާނެ ކަމަށެވެ. އޭނާ ފާހަގަ ކުރި ގޮތުގައި އީގަލްސް އަށް އެކަން ތަޖުރިބާ ކުރެވިއްޖެ އެވެ. ޚާއްސަކޮށް ދެ ވަނަ ޑިވިޝަނުން އައި ޓީމަކާ އަޅާ ބަލާއިރު، ބުރުން ދެއްކީ ފުރަތަމަ ޑިވިޝަންގައި ޤަބޫލު ކުރެވޭ ފެންވަރުގެ ކުޅުމެއް ކަމަށް ވެސް އޭނާ ވަނީ ބުނެފަ އެވެ. މީގެ އިތުރުން އީގަލަސްގެ އަޙުމަދު ރިޒުވާން (ރިޒޭ)، ހިސާމް ސަލީމް (ކޮކީ) އަދިވެސް ހުރީ އަނިޔާގައި ކަމަށް މުއާވިޔަތު ބުންޏެވެ.
އީގަލްސް އަކީ މިއަހަރުގެ ފުޓުބޯޅަ ސީޒަނަށް ދެ ވަނަ އަށް އެންމެ ކުރިން ފަރިތަކުރުން ފެށި ޓީމެވެ. އީގަލްސް އާއި ބުރު ބައްދަލު ކުރާ މެޗު ފަށާނީ ހޯމަ ދުވަހުގެ ރޭ 21:00 ގައެވެ.
