މެޗުގެ އަދަދު ހަމަހަމަ، ސިޓީން އެއްވަނާގައި، ހަތަރު ޕޮއިންޓްގެ ލީޑެއް!

އިނގިރޭސި ޕްރިމިއަރ ލީގު ތާވަލްގެ އެއްވަނާގައި ގިނަ ދުވަސްތަކެއް ވަންދެން ހިފެހެއްޓި އާސެނަލްއާ އެއް އަދަދަކަށް މެޗު ކުޅެ, ޗެމްޕިއަން, ސިޓީން އެއްވަނާގައި ހަތަރު ޕޮއިންޓްގެ ލީޑެއް ނަގައިފިއެވެ.

ކޮންމެ ޓީމެއް 34 މެޗު ކުޅުނުއިރު ސިޓީ އެއްވަނާގައި އޮތީ 82 ޕޮއިންޓާއެކުއެވެ. ދެވަނާގައި އާސެނަލް އޮތީ 78 ޕޮއިންޓާއެކުއެވެ. ސިޓީން ހަތަރު ޕޮއިންޓްގެ ލީޑެއް ނެގީ އަމިއްލަ ދަނޑުގައި 2-1ން ލީޑްސް ޔުނައިޓެޑް ބަލިކޮށްގެންނެވެ. ރެލިގޭޝަންގައި ބިރާ ކުރިމަތިވެފައިވާ ލީޑްސް ޔުނައިޓެޑް ކޮޅަށް ފުރަތަމަ ހާފްގައި ސިޓީގެ ދެ ލަނޑުވެސް ޖެހީ ކެޕްޓަން ގުންޑޮގާންއެވެ. ދެލަނޑުވެސް ޖެހީ ރިޔާދު މާރޭޒް ތަނަވަސްކޮށްދިން ހިތްގައުމު ފުރުސަތުންނެވެ. ދެވަނަ ހާފްގައި ހެޓްރިކް ހަދަން ގުންޑޮގާންއަށް ރަނުގެ ފުރުސަތެއް ލިބުނެވެ. ފޮޑެންއަށް ކުރި ފައުލަށް ދިން ޕެނަލްޓީ ފޮނުވާލަން ދިނީ ގުންޑޮގާންއަށެވެ. އެކަމަކު އޭނާ ފޮނުވާލި ޕެނަލްޓީ އަމާޒުވީ އަރިމަތީ ދަނޑިއަށެވެ. ޖެހިގެން އައި މިނިޓްގައި ލީޑްސްއިން ފަރަގު ކުޑަކުރިއެވެ. އެއީ ރޮޑްރީގޯ ޖެހި ލަނޑުންނެވެ. އޭނާ ލަނޑު ޖެހީ އަކަންޖީއަށް ހެދުނު ގޯހެއްގެ ފައިދާ ނަގައިގެންނެވެ.

މެޗުގައި ލަނޑު ޖަހަން ހާލަންޑަށް ލިބުނު ފުރުސަތުތަކުގެ ބޭނުން މިމެޗުގައި ނުކުރެވުނެވެ. އޭނާއަށް މެޗު ފުރިހަމަކުރުމުގެ ފުރުސަތު ކޯޗު ގާޑިއޯލާ ދިނެވެ. ދެވަނަ ހާފް ފަށައިގެން ހަތަރުވަނަ މިނިޓްގައި ޑިފެންޑަރ ނަތަން އަކޭއަށް އަނިޔާވެ ބަދަލުކުރަން ޖެހުމަކީ ކޯޗު ގާޑިއޯލާއަށް ނުތަނަވަސް ކަމެކެވެ. މިސީޒަންގައި އެންމެ އިތުބާރާއެކު ސިޓީގައި ކުޅެމުން އަންނަ ޑިފެންޑަރަކީ އަކޭއެވެ.