ވަގު ނޫޓު ގެންގުޅުނު މީހާގެ ބަންދަށް 7 ދުވަސް
ކްރިމިނަލް ކޯޓުގައި މި އަމުރު ނެރުއްވީ ގާޒީ މުހައްމަދު މިސްބާޙު
ކްރިމިނަލް ކޯޓް
ވަގު ނޫޓު ގެންގުޅުނު ކަމުގެ ތުހުމަތުގައި ހައްޔަރުކުރި މީހާގެ ބަންދަށް 7 ދުވަސް ކްރިމިނަލް ކޯޓުން ޖަހައިފިއެވެ.
މި މައްސަލައާ ގުޅިގެން ހައްޔަރުކޮށްފައިވަނީ 38 އަހަރުގެ ދިވެހި ފިރިހެނެކެވެ. އޭނާގެ މައްޗަށް ކުރަނީ ކައުންޓަރފީޓް ނޫޓު ގެންގުޅުމުގެ ކުށުގެ ތުހުމަތެވެ.
އޭނާ ބަންދުކޮށްފައިވަނީ 7 ދުވަހަށެވެ. އެގޮތުން އޭނާގެ ބަންދުގެ މުއްދަތު ހަމަވާނީ 12 މެއި 2023 އަށެވެ.
ބަންދުގައި ބެހެއްޓުމަށް އަމުރުކުރި ސަބަބެއް ކަމުގައި ކޯޓުން ބުނެފައިވަނީ އޭނާގެ މައްޗަށް ތުހުމަތު ކުރެވޭ ކޮންމެވެސް ވަރެއްގެ ހެކި ހުށައަޅާފައިވުމެވެ. އެގޮތުން ޙާދިސާގެ ރިޕޯޓު ވަނީ ހުށައަޅާފައެވެ.
އޭނާ ބަންދުކޮށްފައިވަނީ ޤާނޫނުއަސާސީއާއި، ޖިނާއީ އިޖުރާއަތުގެ ޤާނޫނަށް ރިއާޔަތްކޮށް މުޖުތަމައުގެ ސަލާމަތާއި ރައްކާތެރިކަމަށްޓަކައެވެ.
އަދި ޝަރީއަތް ކުރުމާބެހޭ ޖިނާއީ އިޖުރާއަތުގެ ޤަވާއިދުގައި ބަޔާންކޮށްފައިވާ ކަންކަން ފުރިހަމަވާކަމަށްވެސް ވަނީ ބަޔާންކޮށްފައެވެ.
ކޯޓު އަމުރުގައި ބަޔާންކޮށްފައިވާ ގޮތުގައި އޭނާގެ ހައްޔަރު އަދި ބަންދު ރެކޯޑުވެސް އެބަހުއްޓެވެ.
ކްރިމިނަލް ކޯޓުގައި މި އަމުރު ނެރުއްވީ ގާޒީ މުހައްމަދު މިސްބާޙުއެވެ.
ވަގު ނޫޓުގެ މައްސަލަ ފެންމަތިވެފައިވާއިރު، އެއްވެސް ނޫޓަކާ ދޭތެރޭ ޝައްކު އުފެދިއްޖެނަމަ ވީ އެންމެ އަވަހަކަށް އެ ނޫޓެއް ގެނެސްދިނުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މީގެ ކުރިން އެދިފައިވެއެވެ.
ވަގު ނޫޓާ ކަޅު ބާޒާރާވެސް ގުޅުމެއް ވާކަމަށް ބެލެވޭއިރު، ރާއްޖޭގައި ކަޅު ބާޒާރުގައި ޑޮލަރު ވިއްކާ މީހުންގެ އަދަދު ވެސް ދުވަހެއް ދުވަހަކަށް އަންނަނީ އިތުރުވަމުންނެވެ. މިކަމުގެ ތެރޭގައި ބިދޭސީން ވެސް ގިނަ އަދަދަކަށް ހަރަކާތްތެރިވަމުން ދާކަމަށް ރަސްމީ އިދާރާތަކުންވެސް މީގެ ކުރިން ބުނެފައި ވެއެވެ.
އަދި ވައިބާ ގްރޫޕުތަކާއި ޓެލެގްރާމް ގްރޫޕުތައް މެދުވެރިކޮށް މި ވިޔަފާރި ފުޅާކުރާ މީހުންވެސް އުޅެއެވެ.
