އިނގިރޭސި ޕްރިމިއާ ލީގުގެ ލިވަޕޫލަށް ކުޅެމުން އަންނަ އިންގްލެންޑުގެ މިޑްފީލްޑަރު ޖޭމްސް މިލްނާ އެ ކުލަބު ދޫކޮށްލަން ނިންމައިފި އެވެ.
އުމުރުން 37 އަހަރުގެ ކުޅުންތެރިޔާ ލިވަޕޫލް ދޫކޮށްލަނީ 8 އަހަރު ދުވަހަށް ފަހު އެވެ. އެ ކުލަބު ދޫކޮށްލުމަށް ފަހު އޭނާ ބަދަލުވާނީ ޕްރިމިއާ ލީގުގެ ބްރައިޓަން އަށެވެ. ބްރައިޓަން އަށް އޭނާ ބަދަލުވާނީ އެއް އަހަރު ދުވަހުގެ މުއްދަތަކަށެވެ. އެ ކުލަބުން ހުށަހަޅާފައިވާ ހުށަހެޅުން މިލްނާ މިހާރު ވަނީ ޤަބޫލުކޮށްފަ އެވެ. އެހެންކަމުން ބްރައިޓަނާއެކު އޭނާ ސޮއި ކުރާ އެއްބަސްވުމުގެ މުއްދަތު ހަމަވާނީ 2024 ވަނަ އަހަރުގެ ޖޫން މަހުގެ ނިޔަލަށެވެ. މިލްނާ ލިވަޕޫލް ދޫކޮށްލަނީ އެ ކުލަބާއެކު ހަދާފައިވާ އެއްބަސްވުން މި ސީޒަނުގެ ނިޔަލަށް ހަމަވުމުންނެވެ. މިލްނާގެ އިތުރުން ނަބީ ކެއިޓާ އަދި ޗެމްބާލައިން ވެސް މި ސީޒަނަށް ފަހު ލިވަޕޫލް ދޫކޮށްލާނެ ކަމަށް މީޑިއަ ތަކުގައި ވަނީ ބުނެފަ އެވެ.
ވާދަވެރި މެންޗެސްޓަރ ސިޓީ ދޫކޮށް މިލްނާ ލިވަޕޫލަށް ބަދަލުވީ 2015 ވަނަ އަހަރު އެވެ. އޭގެ ފަހުން އެ އަހަރު އޭނާ ވަނީ ލިވަޕޫލްގެ ވައިސް ކެޕްޓަނަކަށް ހަމަޖައްސައިފަ އެވެ. މިލްނާ ވަނީ ލިވަޕޫލްގެ ކެޕްޓަން ބޭންޑު އަޅައިގެން ވެސް ކުޅެފަ އެވެ. އަށް އަހަރުގެ ތެރޭގައި އޭނާ ވަނީ މިހާތަނަށް ލިވަޕޫލަަށް 328 މެޗު ކުޅެދީ 26 ލަނޑު ޖަހައިފަ އެވެ. މީގެ އިތުރުން އެ ކުލަބާއެކު އޭނާ ވަނީ ހަތް ތައްޓެއް ކާމިޔާބުކޮށްފަ އެވެ. އެއީ އިނގިރޭސި ޕްރިމިއާ ލީގު، އެފްއޭ ކަޕް، ކަރަބޯ ކަޕް، އެފްއޭ ކޮމިއުނިޓީ ޝީލްޑު، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބް ވޯލްޑް ކަޕް އެވެ. މީގެ އިތުރުން ކަރަބޯ ކަޕްގެ ފައިނަލެއްގައި އެއް ފަހަރު، ޗެމްޕިއަންސް ލީގު ފައިނަލްގައި ދެ ފަހަރު އަދި ޔުއެފާ ޔޫރޮޕާ ލީގު ފައިނަލްގައި އެއް އަހަރު ވަނީ ކުޅެފަ އެވެ.
