އީޕީއޭއިން، އާރަށް އިންވެސްޓްމަންޓް 20،000 ރުފިޔާއިން ޖޫރިމަނާކޮށްފި
4 މެއި 2023 | ބުރާސްފަތި 14:00ސަރުކާރު ބަންދު ދުވަސްތައް ހިމަނައިގެން 30 ދުވަހުގެ ތެރޭގައި ޖޫރިމަނާ ފައިސާ ދައްކަންޖެހޭ
ވ. ހުޅިދޫ
ވ. ހުޅިދޫގައި ދަނޑުވެރިކަން ތަރައްގީކުރުމުގެ މަޝްރޫއުގެ މަސައްކަތް އީ.އައި.އޭ އާ ޚިލާފަށް ކުރުމާ ގުޅިގެން, އާރަށް އިންވެސްޓްމަންޓް 20،000 ރުފިޔާއިން ޖޫރިމަނާކޮށްފިއެވެ.
އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ)އިން ބުނީ، އެ އެޖެންސީން ފާސްކޮށްފައިވާ ތިމާވެއްޓަށް އަސަރުފޯރާނެ މިންވަރު ބަޔާންކުރާ ރިޕޯޓް (އީ.އައި.އޭ)އާ ޚިލާފަށް މަޝްރޫއުގެ މަސައްކަތްތަކެއް ކޮށްފައިވާކަން، އެޖެންސީން ކުރިޔަށް ގެންދިޔަ ވ. ހުޅިދޫގެ އީ.އައި.އޭ އިންސްޕެކްޝަން ދަތުރުންނާއި، މައްސަލައާ ގުޅުންހުރި ލިޔެކިޔުންތަކުން ސާބިތުވާތީ، ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުން ލިބިދޭ ބާރުގެ ދަށުން ހަދާފައިވާ، ތިމާވެއްޓަށް އަސަރުފޯރާ މިންވަރު ބަޔާންކުރާ ރިޕޯޓް ހެދުމާބެހޭ ގަވާއިދުގެ ދަށުން، 20,000.00ރ (ވިހި ހާސް) ދިވެހި ރުފިޔާއިން އާރަށް އިންވެސްޓްމަންޓް ޕްރައިވެޓް ލިމިޓެޑް ޖޫރިމަނާކޮށްފައިވާ ކަމަށެވެ.
އީޕީއޭއިން ބުނީ ސަރުކާރު ބަންދު ދުވަސްތައް ހިމަނައިގެން 30 ދުވަހުގެ ތެރޭގައި ޖޫރިމަނާގެ ފައިސާ ދައްކައި ޚަލާސްކުރުމަށާއި، ހުޅިދޫގައި ދަނޑުވެރިކަން ކުރުމުގެ މަޝްރޫއާ ގުޅިގެން މިހާރު ކުރެވިފައިވާ މަސައްކަތްތަކާއި ރަށުގެ ތިމާވެށީގެ މިހާރުގެ ހާލަތު އީ.އައި.އޭ ކޮންސަލްޓަންޓެއް މެދުވެރިކޮށް ވަޒަންކުރުމަށްފަހު އެކަމާގުޅޭ ރިޕޯޓެއް، ސަރުކާރު ބަންދު ދުވަސްތައް ހިމަނައިގެން 30 ދުވަހުގެ ތެރޭގައި އެ އެޖެންސީއަށް ހުށަހަޅަންޖެހޭނެ ކަމަށެވެ.
އަދި މިހާރު ކުރެވިފައިވާ މަސައްކަތްތައް އީ.އައި.އޭ މޮނިޓަރިންގ ޕްލޭންގައި ހިމަނައި އަދި އިސްލާހުކޮށް، އައު މޮނިޓަރިންގ ޕްލޭން ހުށަހަޅާނެކަމުގެ ލިޔުމެއްވެސް ހުށަހެޅުމަށް 26 އޭޕްރީލް 2023ގައި އާރަށް އިންވެސްޓްމަންޓް ޕްރައިވެޓް ލިމިޓެޑަށް އަންގާފައިވާކަމަށް އީޕީއޭއިން ބުނެއެވެ.
