ބާސެލޯނާގެ ޓްރާންސްފާ ޗީފް އެސްޓަންވިލާއަށް
3 މެއި 2023 | ބުދަ 10:16ޖޫން މަހުގެ ނިޔަލަށް އޭނާ ވަޒީފާ ދޫކޮށްލާނެ
މަތިއު އަލެމަނީ: ބާސެލޯނާ ދޫކޮށްލާނެ
ބާސެލޯނާގެ ޓްރާންސްފާ ޗީފް މަތިއު އަލެމަނީ އިނގިރޭސިވިލާތުގެ އެސްޓަންވިލާއަށް ބަދަލުވާން ނިންމައިފި އެވެ.
މިކަން އޭނާ އާއި ބާސެލޯނާއިން ވެސް ވަނީ ޔަގީންކޮށްދީފަ އެވެ. އަލެމަނީ ކުލަބު ދޫކޮށްލަނީ ބާސެލޯނާއާއެކު ހަދާފައިވާ ކޮންޓްރެކްޓްގައި ބާކީ އެއް އަހަރު އޮއްވަ އެވެ.
މިދިޔަ މާޗު މަހު އޭނާ ވަނީ އެސްޓަންވިލާެގެ އޮފިޝަލުންނާ ބައްދަލުކޮށްފަ އެވެ. އޭރު ސުވާލުކުރުމުން އަލެމަނީ ބުނީ އެއީ އަމިއްލަ ކަމެއްގައި ކަމަށާއި އޭނާ ހުންނާނީ ބާސެލޯނާގައި ކަމަށެވެ. ނަމަވެސް ކޮންޓްރެކްޓްގައި ބާކީ އެއް އަހަރު އޮއްވައި ބާސެލޯނާދޫކޮށްލަނީ އޭނާ އަށް ވަރަށް ބޮޑު މުސާރައެއް ލިބުމުން ކަމަށް ސްޕޭނުގެ ނޫސްތަކުން ދަނީ ބުނަމުންނެވެ. އަދި މިއީ މާލީ މައްސަލަތަކެއްގައި އުޅޭ ބާސެލޯނާ އަށް ދެވޭނެ މުސާރައެއްނޫން ކަމަށް ވެސް ވެއެވެ.
ޖޫން މަހުގެ ނިޔަލަށް ބާސެލޯނާ ދޫކޮށްލި ނަމަވެސް އަލެމަނީ ވަނީ އަންނަ ސީޒަނަށް ބާސެލޯނާއަށް ގަންނަ ކުޅުންތެރިންނާއި ވިއްކާ ކުޅުންތެރިންގެ މުއާމަލާތްތައް ފުރިހަމަކޮށްދިނުމަށް ކުލަބާއެކު އެއްބަސްވެފަ އެވެ.
ބާސެލޯނާއިން ރޭ ނެރުނު ބަޔާނުގައި ބުނެފައިވަނީ ކުލަބުގެ ޓްރާންސްފާ ޗީފް ވަކިވަނީ ޕްރޮފެޝަނަލް އައު މަސައްކަތެއް ފެށުމަށް ކަމަށެވެ. ނަމަވެސް ސްޕޭނުގެ ބައެއް ނޫސްތަކުން ބުނަނީ އަލެމަނީ އާއި ބާސެލޯނާއާ ހިޔާލުތަފާތުވެފައިވަނީ ކުރީގެ ކެޕްޓަން ލަޔޮނަލް މެސީ ގެނައުމާމެދުގައި ކަމަށެވެ. އަލެމަނީ މެސީ ގެންނަން ތާއިދުނުކުރާ ކަމަށްވެ އެވެ. އަދި ސާޖިއޯ ރޮބާޓޯގެ ކޮންޓްރެކްޓް އައުކުރީ ވެސް އޭނާގެ ރުހުމާ ދެކޮޅަށް ކަމަށްވެ އެވެ. މީގެ އިތުރުން ދުވަސްވީ ކުޅުންތެރިން ކަމަށްވާ ކެޕްޓަން ސާޖިއޯ ބުސްކެޓްސް އާއި ޖޯޑީ އަލްބާ އަދި ޒުވާން ޑިފެންޑަރު އެރިކް ގާސިއާއަކީ އަލެމަނީ ދޫކޮށްލަން ބޭނުންވާ ކުޅުންތެރިން ކަމަށްވެ އެވެ. ނަމަވެސް ކޯޗު ޒަވީ ހަނާންޑޭޒް އާއި ޓެކްނިކަލް އެކްސްޕާޓް ޖޯޑީ ކްރައިފްގެ ހިޔާލު މިކަމުގައި ތަފާތެވެ.
