ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ އެކުލަބާއެކު ހަދާފައިވާ އެއްބަސްވުން އައު ނުކުރާނެ ކަމަށް މީޑިއާ ރިޕޯޓުތައް ބުނެފި އެވެ.

މީގެ ދެ އަހަރު ކުރިން ޕީއެސްޖީ އަށް ބަދަލުވި މެސީއާ ކުލަބާ ދެމެދު މިހާރު ވަނީ މައްސަލަ ގަނޑެއް ޖެހިފަ އެވެ. ޕީއެސްޖީގެ ހުއްދަ ނެތި މެސީ ސައުދީ އަރަބިއްޔާ އަށް ދަތުރު ކުރުމުން ކުލަބުން ވަނީ ދެ ހަފްތާގެ މުއްދަތަކަށް މެސީ ސަސްޕެންޑުކޮށްފަ އެވެ. އެ މުއްދަތުގައި މެސީ އަށް ޕީއެސްޖީގެ ކުޅުންތެރިންނާއެކު ފަރިތަކުރުންތަކުގައި ބައިވެރި ނުވެވޭއިރު، އެ މުއްދަތުގައި ޕީއެސްޖީން އޭނާ އަށް މުސާރަ ވެސް ނުދޭން ވަނީ ނިންމައިފަ އެވެ. މެސީ ސައުދީ އަށް ދިޔައީ ފްރާންސް ލީގުގައި ލޮރިއެންޓު އަތުން ބަލިވި މެޗަށްފަހު، ތީމުގެ ފަރިތަކުރުމަށް ކުޅުންތެރިންނަށް އަންގާފައި ވަނިކޮށެވެ. އަދި މެސީ ސައުދީ އަށް ދިޔައީ ކޯޗު ކްރިސްޓޮފާ ގަލްޓިއޭ އާއި ސްޕޯޓިން ޑިރެކްޓަރު ލުއިސް ކަމްޕޯސް އެކަމާ ދެކޮޅު ހަދާފައި ވަނިކޮށެވެ. މެސީ އަކީ ސައުދީން އެ ޤައުމުގެ ފަތުރުވެރިކަން ކުރިއެރުވުމަށް ކަނޑައަޅާފައިވާ ޚާއްސަ އެމްބެސެޑަރެވެ.

މީޑިއާތަކުގައި ބުނެފައިވާ ގޮތުން މިއަހަރުގެ ޖޫން މަހަށް އެއްބަސްވުމުގެ މުއްދަތު ހަމަވުމުން މެސީ އެ ކުލަބު ދޫކޮށްލާނެ އެވެ. މީގެ އިތުރުން މީގެ އެއް މަސް ދުވަސް ކުރިން މެސީގެ ބައްޕަ ޖޯޖު ވަނީ އެކަމާ ގުޅޭ ގޮތުން ޕީއެސްޖީއާ މަޝްވަރާކޮށް އެކަން އެ ކުލަބަށް އަންގާފައި ކަމަށް ވެސް ރިޕޯޓުތައް ބުނެ އެވެ. ނަމަވެސް މިހާތަނަށް މެސީ ބަދަލުވާނެ ވަކި ކުލަބެއް ހާމަކޮށްފައެއް ނުވެ އެވެ. އެހެން ނަމަވެސް ސައުދީ ޕްރޯ ލީގުގެ އަލް ހިލާލުން ވަނީ މެސީ ހޯދުމަށް ބިޑު ހުށަހަޅައިފަ އެވެ.

ބާސެލޯނާގެ އެއްބަސްވުން އައު ނުކުރެވި އެ ކުލަބު ދޫކޮށްލަން ޖެހުމުން މެސީ ޕީއެސްޖީ އަށް ބަދަލުވީ 2021 ވަނަ އަހަރު އެވެ. މިއަހަރު އެއްބަސްވުމުގެ މުއްދަތު ހަމަވާއިރު، ބާސެލޯނާ އިން އަންނަނީ މެސީ އަލުން ހޯދުމުގެ މަސައްކަތް ގަދައަޅާ ކުރަމުންނެވެ. އެކަމުގައި ބާސެލޯނާ އަށް މިހާތަނަށް އަލިމަގެއް ފެނިފައި ނުވެ އެވެ.