"މެސީއާ އެއްވެސް ކުޅުންތެރިޔަކު އަޅާ ނުކިޔޭނެ!"

ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީއާ އެއްވެސް ކުޅުންތެރިޔަކާ އަޅާ ނުކިޔޭނެ ކަމަށް މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފި އެވެ.

ގާޑިއޯލާ މިހެން ބުނީ ސިޓީ އަށް ކުޅެމުން އަންނަ ނޯވޭގެ އާލިން ހާލަންޑު މި ސީޒަނުގައި 50 ލަނޑު ޖެހުމާ ގުޅިގެން ކުރި ސުވާލަކަށް ޖަވާބު ދެމުންނެވެ. ގާޑިއޯލާ ބުނީ، މެސީ އަކީ އޭނާ އަށް ފެނުނު އެންމެ ފުރިހަމަ ކުޅުންތެރިޔާ ކަމަށެވެ. އެއީ ޑްރިބަލް ކުރުމާއި، ޕާސް ކުރުން އަދި ވާދަވެރިކަމުގެ ގޮތުން އުނދަގޫ އެތައް ކަމެއްގެ ސަބަބުން ކަމަށެވެ. އޭނާ ބުނީ ހާލަންޑަށް މެސީއާ ގާތަށް ޖެހިލެވިދާނެ ކަމަށާއި، އެއީ ސިޓީ އަށް ލިބޭނެ އުފަލެއް ކަމަށެވެ. ނަމަވެސް މެސީއާ އެހެން ކުޅުންތެރިޔަކާ އަޅާ ކިޔަން އޭނާ އެހީނުވާނެ ކަމަށެވެ. މީގެ އިތުރުން ހާލަންޑުތޯ ނުވަތަ މެސީތޯ ސުވާލު ކުރުމުން ގާޑިއޯލާ ބުނީ، އެއްވެސް ކުޅުންތެރިޔާ މެސީއާ އަޅާ ނުވެސް ކިޔޭނެ ކަމަށެވެ.

މީގެ އިތުރުން ގާޑިއޯލާ ބުނީ ހާލަންޑަކީ ވެސް މޮޅު ކުޅުންތެރިޔެއް ކަމަށެވެ. ގާޑިއޯލާ ބުނީ އޭނާ އަށް ހާލަންޑު ވެސް އެނގޭ ކަމަށާއި، ހާލަންޑުގެ ވިސްނުމުގައި ވާދަވެރި އަދި ޕޮޒިޓިވް ގޮތެއް ހުންނާނެ ކަމަށެވެ. މީގެ އިތުރުން އޭނާގެ ކިބައިގައި ގަބޫލުނުކުރެވޭ ފަދަ ޕޮޒިޓިވް ސެލްފް ކޮންފިޑެންސް ހުރި ކަމަށް ވެސް ގާޑިއޯލާ ބުންޏެވެ. ނަމަވެސް އެއީ ކިބުރުވެރިކަމެއް ނޫން ކަމަށެވެ. ގާޑިއޯލާ ބުނީ ހާލަންޑަކީ އަމިއްލަ ނަފްސަަށް އިތުބާރު އޮންނަ ކުޅުންތެރިޔެެއްކަން އެނގެނީ ސިޓީއާ ގުޅުނު ފުރަތަމަ ސީޒަނުގައި ވެސް އޭނާ 50 ލަނޑު ޖަހާފައިވާތީ ކަމަށެވެ. އަދި އިނގިރޭސި ޕްރިމިއާ ލީގުގެ ދެ ލެޖެންޑުން ކަމަށްވާ އެންޑީ ކޯލް އާއި އެލަން ޝިއަރާގެ ރެކޯޑާ އަރާ ހަމަ ކުރުމުން ވެސް އެކަން އެނގޭ ކަމަށެވެ.

މެސީއާއެކު ކުރިން ބާސެލޯނާގައި ދުވަސްތައް ހޭދަކުރި ގާޑިއޯލާ އަކީ އަބަދުވެސް މެސީގެ މޮޅު ވާހަކަ ދައްކާ ކޯޗެކެވެ. މީގެ ކުރިން އެތައް ފަހަރެއްގެ މަތިން އޭނާ ވަނީ މެސީގެ މޮޅު ކުޅުމަށް ތައުރީފުކޮށްފަ އެވެ.