65% މީހުންނަށް ވަޒީފާގައި މައްސަލަތައް ދިމާވާ ކަމަށާއި މައްސަލަތައް ދިމާވާ ނިސްބަތާއި އަޅާ ކިޔާއިރު ރިޕޯޓްކުރާ ނިސްބަތް ވަރަށް މަދު ކަަމަށް ޕީއައިއެލްސީގެ ނައިބު ރައީސް އަބްދުﷲ ނާހިދު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްވަމުން އޭނާ ވިދާޅުވީ ވަޒީފާގެ އެއްބަސްވުމެއް އެކުލަވާނުލުމާއި ވަގުތީ މުވައްޒަފެއްގެ ގޮތުގައި ގިނަ ދުވަހު ގެންގުޅުން ފަދަ މައްސަލަތައް މަސައްކަތްތެރިންނަށް ދިމާވާކަމަށެވެ. މީގެ އިތުރުން އަރާމުކުރާނެ ދުވަހެއް ނުލިބި މެދު ނުކެނޑި ގިނަ ވަގުތު މަސައްކަތްކުރުވުމާއި ވަޒީފާގެ މަސްޢޫލިއްޔަތުތަކުގެ ތެރޭގައި ނުހިމެނޭކަންކަން ކުރުވާކަން ފާހަގަކުރެވޭ ކަމަށް އޭނާ ވިދާޅުވިއެވެ. މީގެ އިތުރުން އެހެން މައްސަލަތައް ވެސް ދިމާވާ ކަމަށާއި އެފަދަ މައްސަލަތައް ރިޕޯޓް ނުކުރާތީ އެ މައްސަލަތަކުގެ ގިނަ ކަން ދެނެގަންނަންވެސް ދަތިކަމަށް އޭނާ ވިދާޅުވިއެވެ.

މީގެ އިތުރުން ވަޒީފާގައި އުޅުނު ކަމުގެ ލިޔުން ނުދީ ހިފެހެއްޓުމާއި، އެ ލިޔުމުގައި މަސައްކަތް ރަނގަޅު ނޫން ކަމަށް ލިޔުމާއި، ވަޒީފާގެ މަސްޢޫލިއްޔަތުތައް ހިމަނާފައި ނެތުމަކީވެސް ދިމާވާ މައްސަލައެއް ކަމަށް ނާހިދު ވިދާޅުވިއެވެ. ނާހިދު ވިދާޅުވީ ވަޒީފާގެ ލިޔުމުގައި ޕަރފޯމެންސްގެ އެއްވެސް ވާހަކައެއް ހިމަނައިގެން ނުވާނެ ކަމަށެވެ. ހަމައެހެންމެ ޕްރޮބޭޝަންގައި ގިނަ ދުވަހު ބޭތިއްވުމުގެ މައްސަލަތައް ބައެއް ސިނާއަތުތަކުގައި ގިނަ ކަމަށް އޭނާ ވިދާޅުވިއެވެ.

ޕަބްލިކް އިންޓްރެސްޓް ލޯ ސެންޓަރ (ޕީއައިއެލްސީ)އަށް ހުށަހެޅޭ 80 އިންސައްތަ މައްސަލައަކީ ވަޒީފާއާބެހޭ މައްސަލަތައް ކަމަށް އެ ޖަމިއްުޔާއިން ބުނެއެވެ.