އުފަން ވަޒަނަށް އެނބުރިދިއުން، އަމިއްލައަށް އަރުވައިލެވުން ކަހަލަ ކަމަކަށް!

ސޫދާނުގެ ވެރިކަންކުރާ ޚާރްތޫމްގައި ގަދަވެފައިވާ ހަމަލާ ބަދަލުކުރުންތަކުން ސަލާމަތްވުމަށް، ލުބްނާންގެ ވިޔަފާރިވެރިޔާ އަހުމަދު ޝަމްސް ފިލައި އިނީ އޭނާ ހިންގާ ހޮޓަލުގައެވެ. ބޮމާއި ބަޑީގެ ހަމަލާތަކުން ރައްކާތެރިވުމަށްޓަކައި ހޮޓާތެރޭގައި ފިލައި އިންއިރު، ޝަމްސްގެ ހަނދާނަށް ވެރިވަމުން ދިޔައީ އޭނާގެ އެންމެ ޒުވާން ދުވަސްވަރު، ލުބްނާންގެ ވެރިރަށް ބެއިރޫތު ސުންނާފަތިކޮށްލި ވަރުގަދަ ދާޚިލީ ހަނގުރާމައިގެ މަންޒަރުތަކެވެ.

ޚާރްތޫމް ދޫކޮށް އަނބުރައި ބެއިރޫތަށް މިހާރު ދިރިއުޅުން ބަދަލުކޮށްފައިވާ ޝަމްސް ސިފަކުރިގޮތުގައި، ޚާރްތޫމްއިން ފެންނަމުން ދިޔައީ އޭރުގެ ބެއިރޫތުންވެސް ހަމަ ފެނުނު މަންޒަރުތަކެވެ. ހުރިހާ ތަނެއްގައި ހަނގުރާމަވެރިންނެވެ. ބައިނަލްއަގުވާމީ މަސްލަހަތުތަކެވެ.

މިހާރު އުމުރުން 59 އަހަރު ފުރިފައިވާ ޝަމްސް، ފާއިތުވީ 17 އަހަރު ދުވަހު ދިރިއުޅުނީ ސޫދާނުގައެވެ. ސޫދާނުގައި ދިރިއުޅުން އާރާސްތުކުރަމުން ގޮސް، ޚާރްތޫމް މައި އެއަރޕޯޓްއާއި ސަރުކާރުގެ ވުޒާރާތަކާ ދާދި ކައިރީގައި ހޮޓަލަކާއި ރެސްޓޯރަންޓެއް ހުޅުވައި، ވިޔަފާރިވެސް ފުޅާކުރިއެވެ. ސޫދާނުގެ އަސްކަރިއްޔާއާއި ޕެރަމިލިޓްރީ ފައުޖުތަކާ ދެމެދު އޭޕްރިލް 15 ދުވަހު ހަމަލާ ބަދަލުކުރުންތައް ފެށުމާއެކު، ޝަމްސްގެ ހޮޓަލާއި ރެސްޓޯރަންޓަށްވެސް ހަމަލާތައް އަމާޒުވާން ފެށިއެވެ.

ސޫދާނުގައި ދިރިއުޅެމުންދިޔަ ލުބްނާނުގެ އެހެން ރައްޔިތުންނާއި، އޭނާގެ އަންހެނުންނާއި، 10 އަހަރުގެ ދަރިފުޅުގެ އިތުރުން، އޮޅުކޮށްގެން ގެންގުޅުނު ބުޅާވެސް ގޮވައިގެން ޝަމްސް އެނބުރި ބެއިރޫތަށް ދަތުރުކުރީ، ސައޫދީ ޢަރަބިއްޔާގެ ކަމާބެހޭ ފަރާތްތަކުގެ އެހީތެރިކަމާ އެކުގައެވެ. އެކަމުގައި ލުބްނާނުގެ އެހީ ނުލިބޭކަން ޝަމްސް ފާހަގަކުރިއެވެ.

ލުބްނާނަކީވެސް ހަމަޖެހިފައި އޮތް ގައުމެއް ކަމަކަށް ދެންނެވޭކަށް ނެތެވެ. މިއަދު އެ ގައުމު ތަޖުރިބާކުރަމުން އެދަނީ 1975ން 1990ށް ކުރި ވަރުގަދަ ހަނގުރާމައަށްފަހު، އެ ގައުމުގެ ތާރީޚު ދުށް އެންމެ ނުތަނަވަސް އިގްތިސާދީ އަދި ސިޔާސީ ކާރިސާއެވެ.

އެތައް އަހަރެއް ވަންދެން ގައުމުން ބޭރުގައި އުޅުމަށްފަހު، އެފަދަ ހާލެއްގައި އޮތް ގައުމަކަށް އެނބުރި ދެވުމުން، އުފަން ވަޒަނަށް އާދެވުނުކަމުގެ ފުރިހަމަ އުފާ އިހުސާސް ނުކުރެވޭކަމަށް ޝަމްސް ބުނެއެވެ. އިތުރު ގޮތެއް އޮތްނަމަ ލުބްނާނަށް ބަދަލުނުވީސް ކަމަށްވެސް އޭނާ ބުންޏެވެ.

ޝަމްސް ސިފަކުރިގޮތުގައި، އުފަން ވަޒަނަށް އެނބުރި ދިއުމަކީ، އަރުވައިލެވިގެން އުޅުން ކަހަލަ އިހުސާސެއް ކުރުވާ ކަމެކެވެ.

ސޫދާންގައި ގަދަވަމުން ދާ ހަނގުރާމައާ ގުޅިގެން ލުބްނާނުގެ 60އްހާ މީހުން ވަނީ ސޫދާން ދޫކޮށް، ލުބްނާނަށް ބަދަލުވެފައެވެ. އޭގެތެރޭގައި ވިޔަފާރީގެ ބޭނުމަށް ސޫދާނަށް ގޮސް ތިބި މީހުންނާއި، ސޫދާނުގައި ވަޒަންވެރިވެގެން އުޅުނު މީހުންވެސް ހިމެނެއެވެ.