ސްޓެލްކޯ އާއި އާބަންކޯ ކުޅުނު ފުރަތަމަ މެޗުން މޮޅުވެ ފެށުން ރަނގަޅުކޮށްފި

އިންޓަރ އޮފީސް ވޮލީބޯޅަ މުބާރާތުގައި ސްޓެލްކޯ އާއި އާބަންކޯ ކުޅުނު ފުރަތަމަ މެޗު ކާމިޔާބުކޮށް މުބާރާތުގެ ފެށުން ރަނގަޅުކޮށްފި އެވެ.

ހޯމަ ދުވަހުގެ ހަވީރު ހުޅުމާލެ ވޮލީބޯޅަ ކޯޓުގައި ފެށި މުބާރާތުގެ ފުރަތަމަ މެޗުގައި ބައްދަލު ކުރީ ސްޓެލްކޯ އާއި މޯލްޑިވްސް އެއާޕޯޓް ކޮމްޕެނީ ލިމިޓެޑު (އެމްއޭސީއެލް) އެވެ. ވާދާވެރި މެޗު ސީދާ ތިން ސެޓުން ކާމިޔާބު ކުރީ ސްޓެލްކޯ އެވެ. މެޗުގެ ފުރަތަމަ ސެޓުގެ ކުޅުން ފެނުނީ ވަރަށް ވާދަވެރިކޮށެވެ. ނަމަވެސް ފަހު ވަގުތު ސްޓެލްކޯ އިން ވަނީ 33-31 އިން ސެޓު ކާމިޔާބުކޮށްފަ އެވެ. ދެ ވަނަ ސެޓު ސްޓެކްލޯ އިން ކާމިޔާބު ކުރީ 25-19 އިންނެވެ. ދެ ވަނަ ސެޓު ސްޓެލްކޯ އިން ރަނގަޅު ލީޑެއްގައި ހޯދި ނަމަވެސް، ތިން ވަނަ ސެޓުގެ ކުޅުން ވެސް ވާދަވެރި އެވެ. މި ސެޓު ސްޓެލްކޯ އިން ކާމިޔާބު ކުރީ 27-25 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ސްޓެލްކޯގެ ބިދޭސީ ކުޅުންތެރިޔާ ގަގަންދީޕް ސިންގް އެވެ.

ދެ ވަނަ މެޗެގައި ހޯމަ ދުވަހުގެ ރޭ އާބަންކޯ އިން ނކުތީ މޯލްޑިވްސް ޕޯޓްސް ލިމިޓެޑް (އެމްޕީއެލް)އާ ދެކޮޅަށެވެ. ފަސޭހަކަމާއެކު އާބަންކޯ އިން މެޗު ކާމިޔާބު ކުރީ ތިން ސެޓުންނެވެ. މެޗުގެ ސެޓުތައް އެ ޓީމުން ކާމިޔާބު ކުރީ 25-20، 25-10، އަދި 25-18 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ އާބަންކޯގެ އިސްމާއީލް ސާޖިދު (ކުޑަކާއްޓޭ) އެވެ.

މުބާރާތުގައި އަންގާރަ ދުވަހުގެ ހަވީރު ފިއުލް ސަޕްލައި މޯލްޑިވްސް (އެފްއެސްއެމް) އިން ނިކުންނާނީ މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)އާ ދެކޮޅަށެވެ. އަންގާރަ ދުވަހުގެ ރޭ ކުޅޭ މެޗުގައި ސްޓެލްކޯ އިން ނިކުންނާނީ މޯލްޑިވްސް ޕޮލިސް ސާވިސް (އެމްޕީއެސް)އާ ދެކޮޅަށެވެ.

މުބާރާތް ކުރިއަށް ގެންދަނީ ރައުންޑްރޮބިން އުސޫލުންނެވެ. މުބާރާތުގައި ތިން ސެމީ ފައިނަލް މެޗު ކުޅޭނެ އެވެ. ފުރަތަމަ ސެމީ ގައި ބައްދަލު ކުރާނީ ޕޫލް އޭގެ އެއް ވަނަ އަދި ޕޫލް ބީގެ އެއް ވަނަ އެވެ. މި ސެމީން މޮޅުވާ ޓީމު ދާނީ ސީދާ ފައިނަލަށެވެ. ދެ ވަނަ ސެމީ ގައި ބައްދަލު ކުރާނީ ޕޫލް އޭގެ ދެ ވަނަ އަދި ޕޫލް ބީގެ ދެ ވަނަ އެވެ. މި ސެމީން މޮޅުވާ ޓީމު ޖެހޭނީ، ފުރަތަމަ ސެމީ އިން ބަލިވި ޓީމާއެކު ތިން ވަނަ ސެމީ ކުޅޭށެވެ. ފައިނަލްގެ ފަހު ޖާގަ ލިބޭނީ ތިން ވަނަ ސެމީން މޮޅުވާ ޓީމަކަށެވެ.