ދެ ޤައުމު ގުޅިގެން ރާއްޖެއާއި އިންޑިއާގެ ލަނޑުދަނޑިތައް ހާސިލުކުރެވޭނެ: މާރިޔާ
2 މެއި 2023 | އަންގާރަ 02:56މިއަދާ ހަމައަށް ރާއްޖެއާއި އިންޑިއާގެ ވަރުގަދަ ގުޅުން ބިނާވެފައިވަނީ އެއް ޤައުމު އަނެއް ޤައުމަށް ކުރާ އިހުތިރާމާއި އިތުބާރުގެ މައްޗަށް
ދެ ޤައުމުގެ ދިފާއީ ވަޒީރުން
އިންޑިއާ އާއި ރާއްޖެއިން ގަބޫލު ކުރާ އުސޫލުތަކާއި ހަމަތަކުގެ މަތިން ދެ ޤައުމުގެ ގުޅިގެން މަސައްކަތް ކޮށްފިނަމަ ގިނަ ލަނޑުދަނޑިތަކެއް ހާސިލު ކުރެވޭނެ ކަމަށް ދިވެހިރާއްޖޭގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ އިންޑިއާގެ ދިފާއީ ވަޒީރު ރާޖުނާތު ސިންގެ ޝަރަފުގައި ހޯމަ ދުވަހުގެ ރޭ ކުރުނބާ މޯލްޑިވްސްގައި ބޭއްވި ހާއްސަ ފަރިއްކޮޅުގައި ވާހަކަފުޅުދައްވަމުންނެވެ. އެގޮތުން، ދެ ޤައުމުގެ ގުޅުމާ ގުޅޭގޮތުން މާރިޔާ ވަނީ ވާހަކަފުޅުދައްކަވާފައެވެ.
މާރިޔާ ވިދާޅުވީ އިންޑިއާގެ ދިފާއީ ވަޒީރުގެ ޝަރަފުގައި ހަފްލާއެއް ބޭއްވުމަކީ ލިބޭ ވަރަށް ބޮޑު އުފަލެއް ކަަމަށާއި އެއިން ރަމްޒުކޮށްދެނީ ޒަމާނުއްސުރެ ދެ ޤައުމުގެ ދެމެދުގައި އޮންނަ އެކުވެރިކަމާއި ބަދަހިގުޅުން ކަމަށެވެ. އަދި އިންޑިއާ އާއި ރާއްޖެއާ ދެމެދު އޮތް ދުވަސްވީ ލާމަސީލު ޒަމާންވީ ގުޅުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު އާއި އިންޑިއާ ބޮޑުވަޒީރު މޯދީގެ ޒައާމަތުގައި އިތުރަށް ފުޅާވެ، ރައްޔިތުންނަށް ފާގަތިކަމާއި އަމާންކަން ކަށަވަރުކޮށްދެމުން އަންނަ ކަމަށް ވެސް މާރިޔާ ވިދާޅުވިއެވެ.
ދެ ޤައުމުގެ ދިފާއީ ވަޒީރުންގެ ހައިސިއްޔަތުން އިންޑިއާ ކަނޑުގެ ސަލާމަތާއި ރައްކާތެރިކަން ކަށަވަރުކޮށް، ދެ ދައުލަތާއި ރައްޔިތުންނާއި، މުޅި ސަރަޙައްދު ބަލަހައްޓާ، ސަރަޙައްދުގެ މަސްލަހަތުތައް ކުރިއަރުވައި ހިމާޔަތް ކުރުމަށް އޮތް ޒިންމާ ބޮޑުކަން މާރިޔާ ފާހަގަކުރެއްވިއެވެ. އަދި ބަވަނަވެފައިވާ މި ދުނިޔޭގައި ގިނަ ގޮންޖެހުންތަކާއި ކުރިމަތިލާންޖެހޭކަމަށާއި ނަމަވެސް ދެ ޤައުމުންވެސް ގަބޫލުކުރާ އުސޫލުތަކާއި ހަމަތަކުގެ މަތިން މަސައްކަތް ކޮށްފިނަމަ، ބޭނުންވާ ގިނަ ލަނޑުދަނޑިތައް ހާސިލުކުރެވޭނެކަމަށް އޭނާ ވިދާޅުވިއެވެ.
މާރިޔާ ވަނީ އޭނާގެ ވާހަކަފުޅުގައި އިންޑިއާގެ ދިފާއީ ވަޒީރު ބަހައްޓަވާ ގާތް ގުޅުން ފާހަގަކުރައްވާފައެވެ. އަދި މިއަދާ ހަމައަށް ރާއްޖެއާއި އިންޑިއާގެ ވަރުގަދަ ގުޅުން ބިނާވެފައިވަނީ އެއް ޤައުމު އަނެއް ޤައުމަށް ކުރާ އިހުތިރާމާއި އިތުބާރުގެ މައްޗަށްކަން ވެސް ފާހަގަކުރެއްވިއެވެ.
މީގެ އިތުރުން މިއީ ދެ ޤައުމުގެ ދެމެދުގައި އޮންނަ ގުޅުން އިތުރަށް ބަދަހި ކުރުމަށް އެކުގައި މަސައްކަތް ކުރާ ކުރުން ކުރިއަށް އޮތްތަނުގައި އިތުރަށް ވަރުގަދަކުރުމުގެ އަޒުމު އައުކުރަން ވަރަށް މުނާސަބު ވަގުތެއްކަމަށްވެސް މާރިޔާ ފާހަގަކުރެއްވިއެވެ.
ހޯމަ ދުވަހުގެ ރޭ ބޭއްވި މި ފަރީއްކޮޅުގައި ދެ ޤައުމުގެ ދިފާއި ވަޒީރުންގެ އިތުރުން ދައުލަތުގެ ބައެއް ވަޒީރުންނާއި އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރު އާއި ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ވެސް ބައިވެރިވެވަޑައިގެންނެވިއެވެ. މި ފަރީއްކޮޅުގެ ތެރެއިން ދިވެހި ސަގާފީ ހަރަކާތްތައް ވެސް ވަނީ ދައްކާލައިފައެވެ.
