ރައްކާތެރި މާހައުލެއްގައި މަސައްކަތް ކުރުމަށް ބޭނުންވާ ހުރިހާ ވަސީލަތްތަކެއް ފޯރުކޮށްދެވިފައިވޭ: އެމްޑީ ޝަރީފް

ރައްކާތެރި މާހައުލެއްގައި މަސައްކަތް ކުރުމަށް ބޭނުންވާ ހުރިހާ ވަސީލަތްތަކެއް މުވައްޒަފުންނަށް ފޯރުކޮށްދީފައިވާ ކަމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)ގެ މެނޭޖިންގ ޑިރެކްޓަރު އަހުމަދު ޝަރީފު ވިދާޅުވެއްޖެއެވެ.

ބައިނަލްއަގުވާމީ މަސައްކަތްތެރިންގެ ދުވަހާއި ގުޅިގެން ތަހުނިޔާ ފޮނުއްވާ ޝަރީފް ވިދާޅުވީ ސްޓެލްކޯގެ މުވައްޒަފުންނަކީ ރައްޔިތުންނަށް ވަރަށް މުހިންމު ޚިދުމަތެއް ފޯރުކޮށްދޭ ބައެއް ކަމަށެވެ. އަދި ކުރިމަގުގައި މިހާރަށްވުރެ ވެސް ފެންވަރު ރަނގަޅު ޚިދުމަތެއް ފޯރުކޮށްދިނުމަށް މަސައްކަތް ކުރާ ކަމަށް ޝަރީފް ވިދާޅުވިއެވެ.

މީގެ އިތުރުން ޝަރީފް ވިދާޅުވީ ސިއްހީ ދުޅަހެޔޮކަމާއި އަދި ރައްކާތެރި މާހައުލެއްގައި މަސައްކަތް ކުރުމުގެ ހުރިހާ ވަސީލަތްތަކެއް ސްޓެލްކޯގެ މުވައްޒަފުންނަށް ފޯރުކޮށްދީފައިވާ ކަަމަށެވެ. ނަމަވެސް ކުރިއަށް އޮތްތަނުގައި އިތުރަށް ހަރުދަނާ ކުރުމަށް ކުރަންޖެހޭ މަސައްކަތްތައް ކުރާނެ ކަމަށް ޝަރީފް ވިދާޅުވިއެވެ.

ސްޓެލްކޯއަކީ ގިނަ އަދަދެއްގެ މުވައްޒަފުން މަސައްކަތް ކުރަމުންދާ ކުންފުންޏެކެވެ. މާލެސިޓީގެ އިތުރުން އަތޮޅުތެރޭގައި ވެސް ސްޓެލްކޯގެ މުވައްޒަފުން ހަރަކާތްތެރިވާއިރު، ރައްޔިތުންނާއި ގާތުން ވަރަށް ގިނަ ޚިދުމަތްތައް ފޯރުކޮށްދޭން ޖެހެއެވެ. އެހެންކަމުން ޚިދުމަތުގެ ފެންވަރު ރަނގަޅުކޮށް، ރައްޔިތުން އެދޭ ފަދަ ޚިދުމަތްތަކެއް ފޯރުކޮށްދިނުމަށް ސްޓެލްކޯއިން ދަނީ މަސައްކަތް ކުރަމުން ކަމުގައި އެ ކުންފުނިން ބުނެއެވެ.