އިޓްލޮސްގެ ނިންމުމާއެކު ދެކުނުގެ މަސްވެރިންނަށް ވާނީ ފައިދާ ކަމަށް، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ރާއްޖެއާއި މޮރިޝަސްގެ ކަނޑުގެ ސަރަހައްދުން ފުށުއަރާ ސަރަހައްދުގެ އިން ވަކިކުރުމުގެ މައްސަލަ، ރާއްޖެއަށް ބޮޑު ބައި ލިބޭގޮތަށް، އިންޓަނޭޝަނަލް ޓްރައިބިއުނަލް ފޯރ ދަ ލޯ އޮފް ދަ ސީ (އިޓްލޮސްއިން)އިން ވަނީ ނިންމާފައެވެ.
މި ނިންމުމާ ގުޅިގެން ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސް ސާލިހު ވިދާޅުވީ ރާއްޖޭގެ ދެކުނުގެ ކަނޑުގެ ސަރަހައްދު މިއަދު ކަނޑައެޅިގެން ދިޔަ ދިއުމާ ގުޅިގެން ރާއްޖެއަށް ގެއްލުންވާނެކަމަށް ބައެއް ބޭފުޅުން ވިދާޅުވާކަމަށެވެ. ރައީސް ވިދާޅުވީ ފުރަތަމަ ކަމަކަށް؛ މިހާތަނަށް އައިއިރު ރާއްޖޭގެ ދެކުނުގެ އީއީޒެޑް ކަނޑައެޅިފައި ނެތްކަމަށެވެ. މިހާތަނަށް ދެކުނުގައި ރާއްޖެއަށް އޮތީ ގާނޫނު އަސާސީގައި ބުނާ 12 މޭލުގެ ސަރަހައްދު ކަމަށެވެ.
އޭގެ ބޭރުން ދާވެސް އަޅަންވީ އަދި މަސްވެރިކަންވެސް ކުރަންވީ. އަދި ގާނޫނާ ޚިލާފު ކިތަންމެ ކަމެއް ހިނގިޔަސް އަޅުގަނޑުމެންނަށް ނޯވޭ އެއްވެސް ބާރެއް. އެހެންނަމަވެސް އެ ނިންމި ނިންމުމާއެކީގަ ޗާގޯސްއާ އިންވާ ހިސާބު ކަނޑައެޅިގެން އެދިޔައީ. އާންމު އުސޫލަކީ، ފުށުއަރާ ކަމުގަ ވާނަމަ މެދުން ބައިކުރުން. އަޅުގަނޑުމެން ހުށަހެޅި ހުށަހެޅުންތަކަށް ބުރަވެ، އެ ކަނޑައެޅިގެން ދިޔައިރުގަ ރާއްޖެއަށް އިތުރަށް ލިބޭގޮތަށް އޮތީ ކަނޑައެޅިގެން ގޮސްފަ. މިއީ ކާމިޔާބީއެއް.ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު
ރައީސް ވިދާޅުވީ ދެކުނުގެ ސަރަހައްދުގައި ގަވާއިދާ ހިލާފު ކަމެއް ކުރިޔަނުދިނުމަށްޓަކައި ކޯސްޓްގާޑުން ބަލަހައްޓަމުން ގެންދާނެކަމަށެވެ. ރާއްޖޭގެ މަސްވެރިންނަށް އިތުރު ފައިދާތަކެއް ލިބިގެންދާނެކަމަށާއި، މި ނިންމުން ނިމިގެންދިޔައިރު އެ ސަރަހައްދަކީ ޕްރޮޓެކްޓެޑް އޭރިއާއެއްގެ ގޮތުގައި ބަހައްޓާނެކަމަށް މޮރިޝަސްއިން ހުށަހަޅާފައިވާ ކަމަށެވެ.
އެހެންކަމަށްވާނަމަ ރާއްޖޭގެ މަސްވެރިންނަށް ލިބިގެންދާނީ ފައިދާ ކަމަށާއި، އެއާ ގުޅިގެން އެންވަޔަރަމަންޓް މިނިސްޓްރީންވެސް ދެން ކުރަންޖެހޭ ކަންކަން، ބައިނަލްއަގުވާމީ ފަރާތްތަކާއި އަދި މޮރިޝަސްއާ އެކީގައި ކޮށް، އެއީ ހިމާޔަތްކޮށްފައިވާ ސަރަހައްދެއްގެގޮތުގައި ކުރަންޖެހޭ މަސައްކަތް ކުރައްވާނެ ކަމަށެވެ.
ރައީސް ވިދާޅުވީ އެމަނިކުފާނު ދެކެވަޑައިގަންނަވާ ގޮތުގައި މިއީ ކާމިޔާބީއެއް ކަމަށެވެ. ރާއްޖޭގެ ސަރަހައްދުން އެއްވެސް ތަނެއް އުނިވެގެން ނުދާކަމަށާއި، އިން ކަނޑައެޅިގެން މިދިޔައީ އަދިކިރިޔާ ކަމަށް ރައީސް ވިދާޅުވިއެވެ.
