މިއަހަރުގެ އޮގަސްޓް މަހުގެ ތެރޭގައި މާލޭގެ ވޭސްޓް ޓްރާންސްފަރ ސްޓޭޝަން ބޭނުންކުރަން ފެށި، ކުނި މެނޭޖް ކުރުމުގައި އައު ހަރުފަތަކަށް ދެވޭނެ ކަމަށް ވޭސްޓް މެނޭޖްމެންޓް ކޯޕަރޭޝަން (ވެމްކޯ)ގެ މެނޭޖިން ޑިރެކްޓަރު ޔޫސުފް ސިރާޖް ވިދާޅުވެއްޖެއެވެ.
ރާއްޖެޓީވީގައި ވާހަކަދައްކަވަމުން އެމްޑީ ސިރާޖް ވިދާޅުވީ މާލެސިޓީގެ ކުނި މެނޭޖް ކުރުމަށް ކުރަމުން އައި މަސައްކަތްތައް ތަންފީޒު ކުރެވިގެންދިޔައީ ތާވަލް ކުރެވުނު ތަރީހުތަކަށް ވުރެ ލަސްކޮށް ކަމަށެވެ. 2022 ވަނަ އަހަރު ނިމިގެން ދިޔައިރު އެ ތަސައްވުރަށް ވާސިލްވުމަށް ގިނަ މަސައްކަތްތައް ކުރެވުނު ކަމަށް ސިރާޖް ވިދާޅުވިއެވެ. އެގޮތުން 01 އޭޕްރީލް 2023ން ފެށިގެން ވެމްކޯގެ ބިލު، ސްޓެލްކޯގެ ކަރަންޓު ބިލުގެ ތެރޭގައި ހިމަނައި ކުރެވުނު މަސައްކަތް ސިރާޖު ފާހަގަކުރެވިއެވެ.
މީގެ އިތުރުން ސިރާޖް ވިދާޅުވީ ކުނި ރައްކާތެރި ގޮތުގައި ނައްތާލައި، މާލެސިޓީ ސާފުތަނަކަށް ހެދުމަކީ ވެމްކޯގެ އެންމެ ބޮޑު އަމާޒު ކަމަށެވެ. މާލޭގެ ވޭސްޓް ޓްރާންސްފަރ ސްޓޭޝަނަށް އިޝާރާތް ކުރައްވައި ސިރާޖް ވިދާޅުވީ މިއަހަރުގެ އޮގަސްޓް މަހުގެ ތެރޭގައި އާ ޓްރާންސްފަރ ސްޓޭޝަންގައި މަސައްކަތް ކުރަން ފެށޭނެ ކަަމަށެވެ.
ޚާއްސަކޮށް އަގުތަކަށް ގެނުވުނު ބަދަލު އިންޕްލިމެންޓް ކުރުމުގައި އަޅުގަނޑުމެންނަށް ވަރަށް ބައިވަރު ދުވަސްތަކެއް ލަސްވެގެން ހިނގައްޖެ. ގާތްގަނޑަކަށް އަޅުގަނޑުމެން އޭރު އުންމީދު ކުރަމުން ދިޔައީ ޖެނުއަރީ ފެބްރުއަރީ ހިސާބުގައި އައު ބަދަލާއެކު އަޅުގަނޑުމެންނަށް މަސައްކަތް ފެށޭނެ ކަމަށް. ނަމަވެސް އަޅުގަނޑުމެން އިންޕްލިމެންޓް ކުރަން ފެށުނީ މާޗް 20 ގައި. ބިލް ކުރެވުނީ އޭޕްރީލްގައި. އެހެންވީމަ ފުރަތަމަ ކުއާޓަރު ނިމުނު ފަހުން ގާތްގަނޑަކަށް އަމަލީ މަސައްކަތް ފެށިގެން ދިޔައީ. އެހެންވީމަ އަހަރުމެންގެ ޓަރގެޓަކީ ސެންކަންޑް ކުއާޓަރު ނިމޭއިރުގައި ކުރިން ދެންނެވި ބަދަލުތަކަށް އަޅުގަނޑުމެންނަށް ދެވޭނެ. އަދި ތި ވިދާޅުވިހެން ސެންކަންޑް ކުއާޓަރު ނިމިފައި އޮގަސްޓް ހިސާބުގައި މާލޭ ވޭސްޓް ޓްރާންސްފަރ ސްޓޭޝަންގެ މަސައްކަތް ނިމި އަޅުގަނޑުމެން އާ ޓްރާންސްފަރ ސްޓޭޝަންގައި މަސައްކަތް ކުރަން ފެށޭނެ.ވެމްކޯގެ މެނޭޖިން ޑިރެކްޓަރު ޔޫސުފް ސިރާޖް
މާލޭގައި ގާއިމްކުރެވޭ އައު ވޭސްޓް ޓްރާންސްފަރ ސްޓޭޝަނަކީ ޒަމާނުއްސުރެ މާލޭގައި ކުނި މެނޭޖްކުރުމަށާއި، އެކުނި ތިލަފުއްޓަށް އުފުލުމަށް ހުރި ދަތިތަކަށް އެކަށީގެންވާ ހައްލެއް ގެނައުމުގެ މަގުސަދުގައި އިމާރާތްކުރެވޭ ސްޓޭޝަނެކެވެ. މިގޮތުން، އޭޝިއަން ޑިވެލޮޕްމަންޓް ބޭންކް (އޭ.ޑީ.ބީ) އާއި ދިވެހި ސަރުކާރުން ޚަރަދުކޮށްގެން ޒޯން 3 ގެ ސަރަހައްދަށް އަމާޒުކުރެވިގެން ހިންގަމުންދާ ގްރޭޓަރ މާލެ އެންވަޔަރަމަންޓަލް އިމްޕްރޫވްމަންޓް އެންޑް ވޭސްޓް މެނޭޖްމަންޓް ޕްރޮޖެކްޓްގެ ދަށުން، އަލަށް އިމާރާތްކުރެވިފައިވާ މާލެ ވޭސްޓް ޓްރާންސްފަރ ސްޓޭޝަނަކީ މިދެންނެވެނު ކުނީގެ މައްސަލައަށް ފުރިހަމަ ހައްލެއް ގެނައުމަށްޓަކައި އިމާރާތްކުރެވިފައިވާ ޖުމްލަ 184 މިލިއަން ދިވެހި ރުފިޔާ ގެ (11.97 މިލިއަން އެމެރިކާ ޑޮލަރު) އަގުހުރި ޒަމާނީ ކުނި މެނޭޖްކުރާ މަރުކަޒެކެވެ.
މާލޭގެ އައު ވޭސްޓް ޓްރާންސްފާ ސްޓޭޝަން ހުންނާނީ މާލެ އިންޑަސްޓްރިއަލް ވިލެޖް ސަރަހައްދުގެ ހުޅަނގު ފަރާތުގައި ވެމްކޯގެ އޮޕަރޭޝަން މިވަގުތު ކުރިޔަށްދާ ސައިޓުގައެވެ. މި ޓްރާންސްފާރ ސްޓޭޝަނަކީ ކުދި އަދި މެދު ސައިޒްގެ ޕިކަޕްގެ އިތުރުން، ޑަމްޕް ޓްރަކް އަދި ބޮޑެތި، ބަރު ކުނި އުފުލާ ބޮޑެތި ޑަމްޕް ޓްރަކްތަކާއި އެކު، ތަފާތު އެކި ސައިޒުގެ ކުނި އުފުލާ ވެހިކަލް ތަކަށް ދަތިކަމެއް ނެތި ޚިދުމަތްދެވޭ ގޮތަށް ފަރުމާކުރެވިފައިވާ، 65،000 އަކަފޫޓުގެ ޖާގަ ތަނަވަސް މަރުކަޒެކެވެ.
ކުރިޔާ ޚިލާފަށް، މި އައު ވޭސްޓް ޓްރާންސްފަރ ސްޓޭޝަން ފަރުމާކުރެވިފައި ވަނީ ކޮންޓޭނަރައިޒް ކޮށްގެން ތިލަފުއްޓަށް ކޮންޓޭނަރުގައި ކުނި އުފުލާ ގޮތަށެވެ. މީގެ ސަބަބުން ބަރު އަދި ބޮޑެތި ކުނި (ސީއެންޑީ) ފިޔަވައި އެހެނިހެން ކުނި އުކާލުމަށް، ކުނި އުފުލާ ބާޖަށް ވެހިކަލް އެރުން ހުއްޓުމަކަށް ގެނެވޭނެއެވެ. މީގެ ބަދަލުގައި، ކުނި އުފުލާ ވެހިކަލްގައި ހުރި ކުނި ކިރުމަށް ހާއްސަ 'ވެއި ބްރިޖަކުން' ކިރާލުމަށްފަހު ފަހު، ޓްރާންސްފަރ ސްޓޭޝަންގެ ފުރަތަމަ ފަންގިފިލާގައި ހުންނަ ވޭސްޓް ޓިޕިންގ ޕްލެޓްފޯމް މެދެވެރިކޮށް ކޮންޓޭނަރަށް ކުނި އުކާލެވޭނެއެވެ. އަދި ހުރިހާ ވެހިކަލަކުން ވެސް ޓިޕިން ޕްލެޓްފޯމުން ކުނި އުކާލާނީ ސްޓޭންޑަޑް ކޮންޓެއިނަރުތަކަށެވެ. އެގޮތުން ވަކިކުރެވިފައިވާ (ސެގްރިގޭޓް) ކުނި އުކާލުމަށް 5 ޓިޕިން ބޭ ވަނީ ގާއިމްކުރެވިފައެވެ.
މީގެ އިތުރުން މޮބައިލް ކޮމްޕެކްޓިން ޔުނިޓް (ރޯލް ޕެކަރ) މެދުވެރިކޮށް ދުވަހު ކުނީގެ ގޮތުގައި ސައިޓަށް ގެނެވޭ ކުނި، ތިލަފުއްޓަށް ގެންދިޔުމުގެ ކުރިން ކޮންޓެއިނަރުގައި އިތުރަށް ކޮމްޕެކްޓް ކުރެވިގެންދާނެއެވެ. އަދި މިއިމާރާތަށް ވެހިކަލްތައް ވަދެ ނިކުތުމަށް ދެ ލޭންގެ ކޮންކްރީޓް ކެރިޖްވޭއެއްވާނީ ގާއިމްކުރެވިފައެވެ.
ކުނި މެނޭޖްކުރުމުގެ މަސައްކަތް އިތުރަށް ހަރުދަނާ ކުރުމަށްޓަކައި، ވޭސްޓް މެނޭޖްމަންޓް އެންޑް ޕޮލިއުޝަން ކޮންޓްރޯލް ޑިޕާޓްމަންޓާއި، އެންވަޔަރަމަންޓަލް ޕްރޮޓެކްޝަން އޭޖެންސީގެ މަސައްކަތަށް ޚާއްސަ ލެބެއްގެ އިތުރުން، ވެމްކޯގެ މަސައްކަތަށް ޚާއްސަ ކުރެވިގެން މާލޭ ވޭސްޓް ޓްރާންސްފަރ ސްޓޭޝަންގައި އަލަށް ގާއިމްކުރެވިފައިވާ 6 ފަންގިފިލާގެ އެޑްމިނިސްޓްރޭޓިވް ބިލްޑިންގއަށް މި އިދާރާތަށް ބަދަލުކުރެވިގެންދާނެއެވެ. އަދި އެކޯޕަރޭޝަންގެ ވެހިކްލަތައް ޕާކްކުރުމަށް ދިމާވެފައިވާ މައްސަލައަށް ހައްލެއް ގެނައުމަށް ވޭސްޓް ޓްރާންސްފަރ ސްޓޭޝަންގެ އެންމެ މަތީ ފަންގިފިލާގެ ރޫފް ޑެކްގައި ވަނީ ޕާކިންގއަށް ޖާގަ ޚާއްސަ ކުރެވިފައެވެ.
މި އިމާރާތުގެ އެންމެ ތިރީ ފަންގިފިލާގައި ކުނި އުކާލުމުގެ އޮޕަރޭޝަނުގައި ހަރަކާތްތެރިވާ މުވައްޒަފުންނަށް ޚާއްސަ ޖާގައަކާއި، ވެމްކޯގެ ވެހިކަލް މެއިންޓެނެންސް ގަރާޖެއްގެ އިތުރުން، ވެމްކޯގެ ޚިދުމަތް ހޯދާ ކަސްޓަމަރުންނަށް ޚާއްސަ ފްރަންޓް އޮފީހެއް ޤާއިމްކުރުމަށް ޖާގަ ވަނީ ހަމަޖެހިފައެވެ.
މާލޭގެ އައު ވޭސްޓް ޓްރާންސްފަރ ސްޓޭޝަނާއި އެޑްމިން ބިލްޑިންގ އަކީ އޭޑީބީގެ ސޭފްގާޑްސް މިންގަނޑުތަކަށް ފެތޭ ގޮތަށް، ކާރިސީ އަދި މޫސުމީ ހިރާސްތަކުން ރައްކާތެރިވާނެ ގޮތަށް ބެލުމަށްފަހު ފަރުމާކުރެވިފައިވާ އިމާރާތެކެވެ. މިގޮތުން، ކުނި އުކާލުމާއި އުފުލުމުގެ ހުރިހާ މަސައްކަތެއް މިސްޓޭޝަންގައި ކުރުމަށް ހަމަޖެހިފައިވަނީ ތިމާވެއްޓާއި ރައްޓެހި ބައިނަލްއަގުވާމީ މިންގަނޑުތަކާއި އެއްގޮތަށެވެ.
