މަޖިލީހުގައި އަޑުގަދަކުރެއްވުމުން ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމުގެ ނަން އިއްވާ ރައްޔިތުންގެ މަޖިލީހުގެ ޖަލްސާއިން ނެރެފިއެވެ.
ބުރާސްފަތި ދުވަހުގެ ޖަލްސާގައި ޝިޔާމް އަޑުގަދަކުރައްވަން ފެއްޓެވީ މާވަށު ދާއިރާގެ މެންބަރު މުހައްމަދު ސައީދު ހުށަހަޅުއްވާފައިވާ ލ. ހިތަދޫ އާއި ކުނަހަންދޫ ގުޅުވާލުމަށް ހަމަޖެހިފައިވާ ކޯޒްވޭގެ މަސައްކަތް އަވަސްކޮށްދިނުމަށް ގޮވާލާ ގަރާރުގެ އިބްތިދާއީ ބަހުސް ފެށުމަށްފަހު ދެން އޮންނަ ޖަލްސާއެއްގައި މެމްބަރުންނަށް ފުރުސަތު ދިނުމަށް ނިންމުމުންނެވެ. މަޖިލީހުގެ ރައީސް މުހައްމަދު ނަޝީދު ވިދާޅުވީ އެ ގަރާރުގެ ބަހުސް އަށް ފުރުސަތު ހުޅުވާލާނީ ދެން އޮންނަ ޖަލްސާއެއްގައި ކަމަށެވެ.
އަދި ކުޅިވަރުގެ ޤާނޫނުގެ ބަހުސް މަޖިލީހުގައި ކުރިއަށް ގެންދެވިއެވެ. ހުޅުމަލޭ ދާއިރާގެ މެމްބަރު އަލީ ނިޔާޒް ވާހަކަދައްކަަވަނިކޮށް ޝިޔާމް ވަނީ މަޖިލީހުގައި އަޑުގަދަކުރައްވާފައެވެ. ޝިޔާމް އަށް ނަސޭހަތްތެރިވުމުން ވެސް އިށީނދެވަޑައިގެންފައި ނުވާތީ މަޖިލީހުގެ ރިޔާސަތުން ވަނީ އޭނާގެ ނަން އިއްވާ ތަޅުމުން ބޭރުކުރައްވާފައެވެ. އަދި ޝިޔާމް ވަނީ ރާއްޖެ ވިއްކާލާފައިވާ ކަމަށް ބުނެ ސަރުކާރަށް ފާޑުކިޔާފައެވެ. ޝިޔާމް އެހެން ވިދާޅުވީ ޗާގޮސް އާއި ރާއްޖޭގެ ސަރަހައްދީ މައްސަލަ އަށް އިޝާރާތްކުރައްވައެވެ.
ބުރާސްފަތި ދުވަހު ބާއްވަނީ މަޖިލީހުގެ ފަހު ޖަލްސާއެވެ. އެހެންކަމުން ދެން ސައީދުގެ ގަރާރަށް ބަހުސް ކުރެވޭނީ މަޖިލީހުގެ ޗުއްޓީ ނިމުމުންނެވެ. މަޖިލީހުގެ ދެވަނަ ދައުރުގެ ޖަލްސާތައް ފަށާނީ ދެ ހަފުތާގެ ޗުއްޓީއަކަށްފަހު އެވެ.
