މުޅިދުނިޔޭގައިވެސް އެންމެ އާބާދީ ބޮޑު ގައުމުގެ ގޮތުގައި މިވަގުތު އޮތް ޗައިނާ ފަސްދީ އިންޑިޔާއިން ދިއުމަށް ތައްޔާރު ވެއްޖެ އެވެ. އެކި އަންދާޒާތައް ދައްކާފައިވާގޮތުން, އިންޑިޔާގެ އާބާދީ މި އެޕްރިލް މަހުގެ ފަހުކޮޅު 1,425,775,850ށް އަރާނެއެވެ. އދ.ގެ އޭޖެންސީއަކުންވެސް ކުރިން އަންދާޒާކޮށްފައިވާގޮތުގައި، އާބާދީގެގޮތުން މިއަހަރުގެ މެދެއްހާ ތަނުގައި އިންޑިޔާއިން ޗައިނާއަށްވުރެ ކުރިއަރާނެއެވެ. މުޅި ދުނިޔޭގައިވެސް އާބާދީ، ނިސްބަތުން އެންމެ ގިނައީ އޭޝިޔާގެ ގައުމުތަކުގައި ކަމަށް ރިކޯޑްތަކުން ދައްކައެވެ. މިގޮތުން ފާއިތުވި 70 އަހަރު ތެރޭގައިވެސް މުޅި ދުނިޔޭގެ އާބާދީގެ ތިންބައިކުޅަ އެއްބައި ހިއްސާކޮށްފައިވަނީ އޭޝިޔާގެ ގައުމުތަކުން ކަމަށް ވެއެވެ.
އދ.ގެ ޑިޕާޓްމެންޓް އޮފް އިކޮނޮމިކް އެންޑް ސޯޝަލް އެފެއަރޒުން ނެރުނު ބަޔާނެއްގައި ބުނެފައިވާގޮތުން، ޒަމާންތަކެއް ވަންދެން ދުނިޔޭގެ އެންމެ ބޮޑު އާބާދީގެގޮތުގައި ޗައިނާ އޮތް އޮތުން ދާދި އަވަހަށް ބަދަލުވާނެއެވެ. ނަމަވެސް އާބާދީ އިތުރުވާވަރު މިންކުރުމުގައި ޔަގީންކަން ނޯންނަ ދިމަދިމާ ހުރުމާއެކު މިބަދަލު އަންނާނެ ސީދާ ދުވަހެއް ބުނަން ނޭނގޭކަމަށް އެބަޔާނުގައި ބުނެފައިވެއެވެ.
އދ.ގެ ޕޮޕިއުލޭޝަން ފަންޑުންވެސް މިދިޔަ ހަފުތާގައި ބުނެފައިވާގޮތުގައި، 2023ގެ މެދާހައަށް ދާއިރު، ޗައިނާއަށްވުރެ އިންޑިޔާގައި 2.9 މިލިއަން މީހުން އިތުރުވާނެއެވެ.
ތަފާސްހިސާބުތަކުން ދައްކާގޮތުގައި، 1961 ވަނަ އަހަރަށްފަހު ފުރަތަމަ ފަހަރަށް ޗައިނާގެ އާބާދީ އިތުރުވާ ރޭޓް ވަނީ ދަށަށް ދާން ފަށާފައެވެ. އަދި މިދިޔަ އަހަރު ވަނީ އާބާދީ ކުރިޔަށްވުރެ މަދުކަމަށް ދައްކާފައެވެ. އާބާދީގެ ހިސާބުތައް ބަލަހައްޓާ ފަރާތްތަކުން އަންދާޒާކޮށްފައިވާގޮތުގައި، މި ގަރުނު ނިމުމުގެ ކުރިން ޗައިނާގެ އާބާދީ އެއްބިލިއަނަށްވުރެ ދަށަށް ދިއުމަކީ އެކަށީގެންވާ ކަމެކެވެ. މިއާ ޚިލާފަށް، އިންޑިޔާގެ އާބާދީ އިތުރުވުން އެތައް ދަހަރަކަށް ކުރިޔަށް ދާނެކަމަށް ދަނީ ބެލެމުންނެވެ.
އެހެންނަމަވެސް އަންހެނުން ދަރިމައިވާ މިންވަރު(ފަރޓިލިޓީ ރޭޓް) އަންނަނީ އިންޑިޔާގައިވެސް ދަށްވަމުންނެވެ. ކުރިން އެވްރެޖްކޮށް އަންހެނަކަށް 5.7 ދަރިން ލިބޭކަމަށް ރިކޯޑް ތަކުން ދައްކާއިރު, މިހާރު އެ އަދަދު ވަނީ 2.2ށް ދަށްވެފައެވެ.
މުޅި ދުނިޔޭގެ އާބާދީ 8 ބިލިއަން ފަހަނައަޅައި ދިޔައީ މިދިޔަ ނޮވެމްބަރު މަހުއެވެ. ނަމަވެސް މާހިރުން ވިދާޅުވާ ގޮތުގައި، އާބާދީ އިތުރުވުން މިހާރު ކުރިންހާ ހަލުތްވެއްނޫނެވެ. އަދި މިހާރުގެ އާބާދީ އިތުރުވާ ރޭޓަކީ 1950ގެ އަހަރު ތަކަށްފަހު ރިކޯޑް ކުރެވުނު އެންމެ ދަށް ރޭޓެވެ.
