މިނިވަން މުސްތަގިއްލު ކޮމިޝަނަކުން ތިމާވެށީގެ ކަންކަން ބެލެހެއްޓުމަކީ އެކަށީގެންވާ ނިޒާމެއް ނޫން - ޝައުނާ
މިނިސްޓަރު ވިދާޅުވީ މިހާރުވެސް އީޕީއޭގެ ޒިންމާތައް އަދާކުރުމުގެ ފުރުސަތު ލިބޭ ކަމަށް ޤަބޫލުކުރައްވާ ކަމަށް
މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާއާ ސުވާލުކުރެއްވުން
މިނިވަން މުސްތަގިއްލު ކޮމިޝަނަކުން ރާއްޖޭގެ ތިމާވެށީގެ ކަންކަން މެނޭޖްކުރުމަކީ ރާއްޖެ ފަދަ ތަރައްޤީވަމުން އަންނަ ޤައުމަކަށް އެންމެ އެކަށީގެންވާ ނިޒާމް ނޫން ކަމަށް ގަބޫލުކުރަން ޖެހޭ ކަަމަށް އެންވައިރޮމެންޓް މިނިސްޓަރ އާމިނަތު ޝައުނާ ވިދާޅުވެއްޖެއެވެ.
އަންގާރަ ދުވަހުގެ ރައްޔިތުންގެ ޖަލްސާގައި އެޖެންޑާކޮށްފައި އޮތީ އުނގޫފާރު ދާއިރާގެ މެންބަރު މުޙައްމަދު ވަޙީދު، މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީ އާމިނަތު ޝައުނާ އާ ކުރައްވާ ސުވާލަށް ޖަވާބު ހޯއްދެވުމެވެ. އޭނާ ކުރައްވާފައިވާ ސުވާލަކީ އެންވަޔަރަންމަންޓް ޕްރޮޓެކްޝަން އޭޖެންސީ މިނިވަން މުސްތަޤިއްލު ތަނަކަށް ހެދުމަކީ ރައީސުލްޖުމްހޫރިއްޔާގެ ރިޔާސީ ވައުދަކަށްވާ އިރު، އަދި ފުރަތަމަ 100 ދުވަސްތެރޭގައި ކުރަން ކަނޑައެޅި ކަމަކަށްވާއިރު، މި ވައުދު ނުފުއްދައި މިހާ ދިގުލަނީ ކީއްވެތޯއެވެ.
ޖަވާބުގައި މިނިސްޓަރ ވިދާޅުވީ އީޕީއޭ ބާރުވެރިކުރުވުމަށް ސަރުކާރުން ވީ ވައުދު ފުއްދާފައިވާ ކަމަށެވެ. އީޕީއޭ ބާރުވެރިކުރުވުމުގެ އަޑު އެންމެ ގަދަވެގެން އައީ 2015 ވަނަ އަހަރު، ފަތުރުވެރިކަމުގެ މަޝްރޫޢުތަކުގައި އެންވައިރޮމެންޓް އިމްޕެކްޓް (އީއައިއޭ) އެސެސްމެންޓް ހެދުމާއި ފާސްކުރުމުގެ ކަންކަން އީޕީއޭގެ ދަށުން އުނިކޮށް އެ މަސްޢޫލިއްޔަތުތައް ޓުއަރިޒަމް މިނިސްޓްރީގެ ބެލުމުގެ ދަށަށް ބަދަލުކުރި ހިސާބުން ކަމަށެވެ. އެ ބަދަލާއި ގުޅިގެން އެ ދުވަސްވަރު ފަތުރުވެރިކަމުގެ މަޝްރޫޢުތައް ހިންގީ ތިމާވެއްޓަށް ނުރައްކާ ނުވާގޮތަށް ރަނގަޅަށް ނުބަލާ ކަމަށާއި، ސިނާއަތެއް ޕްރޮމޯޓްކުރާ ވުޒާރާއަކުން އެ ދާއިރާގެ ކަންކަން ރެގިއުލޭޓްކުރުމަކީ އެންމެ ރަނގަޅު ގޮތް ނޫން ކަމަށް ވެސް ޝައުނާ ވަނީ ވިދާޅުވެފައެވެ. އެހެންކަމުން ސަރުކާރުގެ މެނިފެސްޓޯގައި އާއި 100 ދުވަހުގެ ވައުދުތަކުގެ ތެރޭގައި ވެސް އީޕީއޭ ބާރުވެރިކުރުވާ މިނިވަންކަމާއި އެކު ހިންގުމަށް ހިމަނާފައިވާ ކަމަށެވެ.
އެގޮތުން އީޕީއޭ އަކީ ބާރުވެރި މިނިވަންކަމާއި އެކު ހިނގާ މުއައްސަސާއަކަށް ހެދުމަށް ސަރުކާރުން ގިނަ މަސައްކަތްތަކެއް ކޮށްފައިވާ ކަމަށް ޝައުނާ ވިދާޅުވިއެވެ. އެ މަގްސަތުގައި ކޮށްފައިވާ ކަންކަމުގެ ތެރޭގައި 20 ޑިސެމްބަރު 2018 ވަނަ އަހަރު ފަތުރުވެރިކަމުގެ މަޝްރޫޢުތަކުގައި އެންވައިރޮމެންޓް އިމްޕެކްޓް އެސެސްމެންޓް (އީއައިއޭ) ހެދުމުގެ ބާރު އީޕީއޭ އަށް އަލުން ދިނުމަށް ޓުއަރިޒަމް ޤާނޫނަށް ބަދަލު ގެނައިކަމަށް ޝައުނާ ވިދާޅުވިއެވެ. 27 ޑިސެމްބަރު 2018 އިގައި އެ ބާރު އަލުން އީޕީއޭ އަށް ދީފައިވާ ކަމަށް ޝައުނާ ވިދާޅުވިއެވެ.
ސަރުކާރުން ވައުދުވެފައި ވަނީ އީޕީއޭ އަކީ މިނިވަން، ބާރުވެރި މުއައްސަސާއަކަށް ހެދުމަށް ކަމަށާއި، އެފަދަ ކަންކަން ކުރިއަރާފައިވާ ޤައުމުތަކުގައި ހިނގާ ގޮތް ބަލާލުން މުހިންމު ކަމަށް ޝައުނާ ވަނީ ވިދާޅުވެފައެވެ. ތިމާވެށީގެ ކަންކަން ރެގިއުލޭޓްކުރާ މޮޑެލްތަކުގެ ތަފްސީލްތައް މިނިސްޓަރ މަޖިލީހާއި ހިއްސާކުރެއްވިއެވެ. އެގޮތުން އެމެރިކާގައި މިފަދަ ކަންކަން ބަލަހައްޓަވާ އެންމެ އިސް ފަރާތް ޖަވާބުދާރީ ވަނީ ރައީސަށް ކަމަށާއި އޭނާ ޖަވާބުދާރީވާން ޖެހޭ ވަޒީރެއް ނުހުންނަ ކަމަށް އޭނާ ވިދާޅުވިއެވެ. ތިމާވެށީގެ ވަޒީރުގެ ޒިންމާ އަދާކުރަނީ އީޕީއޭގެ އެޑްމިނިސްޓްރޭޓަރ ކަމަށް ވެސް މިނިސްޓަރ ވިދާޅުވިއެވެ. އިނގިރޭސިވިލާތުގައި ތިމާވެށީގެ ކަންކަން ބަލަހައްޓަނީ އެގައުމުގެ އެންވައިރޮމެންޓް އެޖެންސީން ކަަމަށާއި، އެ މަސައްކަތް ކުރަނީ ވަކި ބޯޑެއްގެ ދަށުން ކަމަށް ޝައުނާ ވިދާޅުވިއެވެ. އެ ބޯޑު މެމްބަރުން ރިޕޯޓްކުރަނީ ކެބިނެޓް މެމްބަރަކަށް ކަމަށް ވެސް މިނިސްޓަރ ވިދާޅުވިއެވެ. މިނިސްޓަރ ދެން މިސާލު ނެންގެވީ ސިންގަޕޫރުގެ މިސާލުންނެވެ. އެ ގައުމުގައި ތިމާވެށީގެ ކަންކަން ބަލަހައްޓަނީ ބޯޑެއްގެ ދަށުން ކަމަށް މިނިސްޓަރ ވިދާޅުވިއެވެ.
ތިމާވެއްޓާއި ގުޅޭ ވުޒާރާ އެއް ނެތް ގައުމެއްގައި ތިމާވެށީގެ ކަންކަން ބަލަހައްޓާ އިދާރާގެ ދައުރު ބޮޑު ކަމަށާއި، ގައުމުތަކުގައި އެފަދަަ އެޖެންސީތައް ހިނގަނީ ސަރުކާރުގެ ތެރެއިން ކަމަށް ޝައުނާ ވިދާޅުވިއެވެ. އެކަން އެގޮތަށް ކުރަނީ ތަރައްޤީ އަށް ހިންގާ މަޝްރޫޢުތަކުން ތިމާވެއްޓަށް އަސަރުކުރާނެތީ ކަމަށާއި ރާއްޖެ ފަދަ ޖަޒީރާ ޤައުމެއްގައި އެކަން ވަރަށް ބޮޑު ކަމަށް މިނިސްޓަރ ވިދާޅުވިއެވެ. އެހެންކަމުން ވެރިކަން ހިންގާ ފަރާތުގެ ބާރު ނުހިނގާގޮތަށް މިނިވަން މުސްތަގިއްލު ކޮމިޝަނަކުން ތިމާވެށީގެ ކަންކަން މެނޭޖްކުރުމަކީ އެންމެ އެކަށީގެންވާ ނިޒާމް ނޫން ކަމަށް ގަބޫލުކުރަން ޖެހޭ ކަަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ މިހާރުވެސް އީޕީއޭގެ ޒިންމާތައް އަދާކުރުމުގެ ފުރުސަތު ލިބޭ ކަމަށް ޤަބޫލުކުރައްވާ ކަމަށެވެ.
