އުމުރުން 40 އަހަރުގައި ޕޯޗުގަލްގެ ޑިފެންޑަރު ޕެޕޭ، ޕޯޓޯއާއެކު ހަދާފައިވާ އެއްބަސްވުން އައުކޮށްފި އެވެ.

ބެސިކްޓާސް ދޫކޮށް ޕެޕޭ ޕޯޓޯ އަށް ބަދަލުވީ 2019 ވަނަ އަހަރު އެވެ. އޭރު އޭނާ ޕޯޓޯ އަށް ބަދަލުވީ ދެ އަހަރާ ބައިގެ މުއްދަތަކަށެވެ. އޭގެ ފަހުން ޑެނީލޯ ޕެރެއިރާ ޕޯޓޯ ދޫކޮށް، ޕެރިސް ސެއިންޓް ޖާމަން (ޕީއެސްޖީ) އަށް ބަދަލުވުމާއެކު، 2020 ވަނަ އަހަރު ޕެޕޭ އަށް ވަނީ ޕޯޓޯގެ ކެޕްޓަން ބޭންޑު ހަވާލުކޮށްފަ އެވެ. އޭގެ ފަހުން ޕެޕޭ ވަނީ ޕޯޓޯގެ އެއްބަސްވުން އިތުރު އެއް އަހަރަށް އައުކޮށްފަ އެވެ. އެ އެއްބަސްވުމުގެ މުއްދަތު ހަމަވާން އޮތީ މިއަހަރުގެ ޖޫން މަހުގެ ނިޔަލަށެވެ. ނަމަވެސް ޕެޕޭ މިހާރު ވަނީ އިތުރު އެއް އަހަރަށް ޕޯޓޯގައި މަޑު ކުރުމަށް ނިންމައި، އެއްބަސްވުމެއްގައި ސޮއިކޮށްފަ އެވެ. އެ އެއްބަސްވުމުގެ މުއްދަތު ހަމަވާނީ 2024 ވަނަ އަހަރުގެ ޖޫން މަހުގެ ނިޔަލަށެވެ.

ޕޯޓޯގެ އެއްބަސްވުމުގައި ސޮއިކުރުމަށްފަހު ޕެޕޭ ބުނީ، އޭނާ އަބަދު ވެސް ޕޯޓޯ ތަމްސީލު ކުރުމުގައި އެންމެ މޮޅު ކުޅުން ދައްކާނެ ކަމަށެވެ. އޭނާ ބޭނުން ވަނީ ޕޯޓޯއާއެކު އަދިވެސް ގިނަ ކާމިޔާބީތަކެއް ހޯދަން ކަމަށާއި، މަތީ ފަންތީގައި ފުޓުބޯޅައިގައި އޭނާ އަށް އެކަން ކުރެވޭނެ ކަމުގެ ޔަޤީންކަން ވެސް އޮތް ކަމަށެވެ. އިތުރަށް ޕެޕޭ ބުނީ، އޭނާގެ ހަށިގަނޑުގައި އަދި ވެސް ފުޓުބޯޅަ ކުޅެވޭނެ ބުންވަރު ހުރި ކަމަށާއި، ކުރިއަށް އޮތް ތަނުގައި ވެސް އޭނާގެ އެންމެ މޮޅު ކުޅުން ދެއްކުމަށް މަސައްކަތް ކުރާނެ ކަމަށެވެ. ޕެޕޭ ވަނީ މިހާތަނަށް ޕޯޓޯ އަށް 158 މެޗު ކުޅެދީ، ހަ ލަނޑު ޖަހައިފަ އެވެ.

ޕެޕޭ އަކީ ކުލަބު ފުޓުބޯޅައިގައި ވެސް އަދި ޤައުމީ ފެންވަރުގައި މޮޅު ކުޅުމެއް ދައްކާފައިވާ ޑިފެންޑަރެކެވެ. މިދިޔަ އަހަރުގެ ޑިސެމްބަރު މަހު ޤަތަރުގައި ނިމުނު ފީފާ ވޯލްޑް ކަޕްގައި ވެސް ޕެޕޭ ވަނީ ޕޯޗުގަލާއެކު މުބާރާތުގައި ކުޅެފަ އެވެ. މީގެ އިތުރުން އަންނަ އަހަރު އޮންނަ ޔޫރޯ ފުޓުބޯޅަ މުބާރާތުގައި ޕޯޗުގަލާއެކު ޕެޕޭ ފެންނާނެ ކަމުގެ ފުރުސަތު ބޮޑެވެ. ޔޫރޯ ކޮލިފައިންނަށް ޕޯޗުގަލް އިން އެކުލަވާލި ސްކޮޑުގައި ވެސް ޕެޕޭ ހިމެނެ އެވެ.