މެމްބަރު ޝަހުދީވެސް ޕީޕީއެމްއިން ވަކިވެވަޑައިގެންފި
7 ޖުލައި 2017 | ހުކުރު 17:16ޝަހުދީ ވަނީ ޕާޓީން ވަކިވިކަން އަންގާ ސިޓީއެއް ފޮނުއްވާފަ
މެމްބަރު ޝަހުދީ
ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރުން ހުސައިން ޝަހުދީ ޕީޕީއެމުން ވަކިވެ ވަޑައިގެންފިއެވެ.
ޝަހުދީ ޕީޕީއެމްއިން ވަކިވެވަޑައިގެންފައި މިވަނީ، ރައްޔިތުންގެ މަޖިލީހުގެ މެންބަރުންގެ ތެރެއިން، ވެރިކަންކުރާ މައި ޕާޓީ، ޕީޕީއެމްއަށް ނިސްބަތްވެވަޑައިގަންނަވާ ބައެއް މެންބަރުން ޕާޓީން ވަކިވެވަޑައިގަންނަވަމުން ގެންދަވާ ދަނޑިވަޅެއްގައެވެ.
ޕީޕީއެމުން ވަކިވެވަޑައިގަންނަވަން ނިންމަވައި ޝަހުދީ ވަނީ އެކަން ޕީޕީއެމްގެ ސެކްރެޓަރީ ޖެނަރަލް ޑރ. ޢަބްދުﷲ ޚަލީލަށް އަންގަވާފައެވެ.
ޑރ. ޚަލީލަށް ފޮނުއްވި ސިޓީގައި ޝަހުދީ ވިދާޅުވީ، ޕަޓީން ވަކިވެވަޑައިގަންނަވަން ނިންމެވީ، "މިވަގުތު އެއްވެސް ސިޔާސީ ޕާޓީއެއްގައި ހަރަކާތްތެރިވުމަށް ބޭނުން ނުވާތީ" ކަމަށެވެ.
"މިއަދުން ފެށިގެން ތިޔަ ޕާޓީގެ ދަފުތަރުން އަޅުގަނޑު އުނިކޮށްދެއްވުން އެދެމެވެ" ސިޓީގައި ޝަހުދީ ވިދާޅުވެފައިވެއެވެ.
ޕާޓީން ވަކިވެވަޑައިގަންނަވަން ނިންމަވައި ޕީޕީއެމްގެ ސެކެޓްރީ ޖެނެރަލަށް ޝަހުދީ ފޮނުއްވެވި ސިޓީފުޅު
ރައްޔިތުންގެ މަޖިލީހުގެ ހަނިމާދޫ ދައިރާގެ ގޮނޑި ޝަހުދީ ކާމިޔާބު ކުރެއްވީ ޖުމްހޫރީ ޕާޓީގެ ޓިކެޓްގައެވެ. ނަމަވެސް ފަހުން ޕީޕީއެމްއާ ގުޅިވަޑައިގެން ސަރުކާރުގެ ދިފާއުގައި އޭނާ ވަނީ ގިނަ މަސައްކަތްތަކެއް ކުރައްވާފައެވެ. ޕާޓީން ވަކިވެވަޑައިގަތުމަށް ނިންމަވާފައިވާއިރު، ރައްޔިތުންގެ މަޖިލީހުގެ ރައީސް އަބްދުﷲ މަސީހްގެ އިތުބާރު ނެތްކަމުގެ މައްސަލަ މަޖިލީހަށް ހުށައެޅުއްވުމަށް ސޮއި ކުރެއްވި ޕީޕީއެމް ޕާލިމެންޓްރީ ގްރޫޕްގެ މެމްބަރުންގެ ތެރޭގައިވެސް ޝަހުދީ ހިމެނިވަޑައިގަންނައެވެ.
ޕީޕީއެމްގެ ބައެއް މެޖިލިސް މެމްބަރުން މި ދުވަސްވަރު ގެންދަވަނީ ޕާޓީންނާއި ޕާޓީގެ މަޤާމްތަކުން ވަކިވެވަޑައިގަންނަވަމުންނެވެ. އެގޮތުން ދަނގެތީ ދާއިރާގެ މެމްބަރު އިލްހާމް އަޙުމަދު ޕީޕީއެމްގެ ޑެޕިއުޓީ ޕީޖީ ލީޑަރުކަމުން އިސްތިއުފާ ދެއްވާފައިވާއިރު، ދިއްދޫ ދާއިރާގެ މެމްބަރު އަބްދުލް ލަތީފާއި މައްޗަންގޮޅި ދެކުނު ދާއިރާގެ މެންބަރު ޢަބްދުﷲ ސިނާންވެސް ވަނީ ދާދިފަހުން ޕީޕީއެމް އިން ވަކިވެވަޑައިގެންފައެވެ.
ރައްޔިތުންގެ މަޖިލީހުގެ ރައީސް އަބްދުﷲ މަސީހްގެ އިތުބާރު ނެތްކަމަށް ހުށަހެޅި މައްސަލާގައި ޕީޕީއެމްގެ 11 މެމްބަރަކު ސޮއި ކުރައްވާފައި އޮތެވެ.
