ބޮޑުތަކުރުފާނު މަގު މަރާމާތުކުރަނީ 1،496،800 ރުފިޔާގެ އަގަކަށް

ބޮޑުތަކުރުފާނު މަގު މަރާމާތުކުރަނީ 1،496،800 (އެއް މިލިއަން ހަތަރުލައްކަ ނުވަދިހަ ހަ ހާސް އަށް ސަތޭކަ) ރުފިޔާގެ އަގަކަށް ކަމަށް ސިޓީ ކައުންސިލުން ބުނެފިއެވެ.

މާލެ ސިޓީގެ މޭޔަރު ޑރ. މުހައްމަދު މުއިއްޒު ވަނީ މާލޭގެ ބޮޑުތަކުރުފާނު މަގާއި އިއްޒުއްދީން މަގުގެ ތާރު އެޅި ބައި މަރާމާތުކުރުމުގެ މަސައްކަތް 10 ވަރަކަށް ދުވަހުގެ ތެރޭގައި ނިމޭނެކަމަށް އުންމީދުކުރައްވާކަމަށް އާދިއްތަ ދުވަހު ވިދާޅުވެފައެވެ.

މުއިއްޒު ވިދާޅުވީ ހުކުރު ދުވަހުން ފެށިގެން ކުރިއަށްދާ މި މަސައްކަތް ދިހަވަރަކަށް ދުވަހުގެ ތެރޭގައި ނިންމުމަށް މަސައްކަތް ކުރަމުންދާ ކަަމަށެވެ. އަދި ތާރު މަގުގައި ހަލާކުވެފައިވާ ތަންތަން މަރާމާތުކުރަން ހަވާލުކޮށްފައިވަނީ، މާލެއާއި ހުޅުމާލެ ގުޅުވައިދޭ ހައިވޭ ހެދި ކުންފުންޏާ ކަމަށްވެސް އޭނާ ވިދާޅުވިއެވެ. މި މަސައްކަތް ކުރަމުންދަނީ ޗައިނާގެ ހުނާން ކޮންސްޓްރަކްޝަން އިންޖިނިއަރިންގ ކުންފުނިންނެވެ.

މި މަސައްކަތުގެ ތެރެއިން ބޮޑުތަކުރުފާނު މަގުގެ 32 ތަނެއް މަރާމާތުކުރަން ވަނީ ހަމަޖެހިފައެވެ.

ބޮޑުތަކުރުފާނު މަގުގައި ތާރު އަޅާފައި އޮތް ހިސާބުގެ ހަލާކުވެފައިވާ ތަންތަން މަރާމާތުކޮށްދޭނެ ބަޔަކު ހޯދަން އިއުލާންކުރީ މި އަހަރުގެ ފެބްރުއަރީ މަހުއެވެ.