ގްރޫޕް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައަކާ ގުޅިގެން ހައްޔަރުކުރި ފައިހް ނިޒާމް (25އ) ގެ މައްޗަށް ޕްރޮސެކިއުޓަރ ޖެނެރަލް އޮފީހުން ދައުވާ އުފުލައިފިއެވެ.
ފައިހް އަމިއްލައަށް ފުލުހުންނާ ޙަވާލުވީ ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައަކާ ގުޅިގެން އޭނާ ހޯދާތާ މަހަކަށްވުރެ ގިނަ ދުވަސް ވެފައިވަނިކޮށެވެ. އޭނާ ހައްޔަރު ކުރިޔަ ނުދިނުމަށްޓަކައި ފޮރުވައިގެން ގެންގުޅޭ ކަމަށް ތުހުމަތުކުރެވޭ ބަޔަކު ހައްޔަރުވެސް ކުރިއެވެ.
އޭނާގެ މައްޗަށް އުފުލާފައިވަނީ ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގުމުގެ ކުށުގެ ދައުވާއެވެ.
އޭނާ ބަންދު ކުރުމަށް ކްރިމިނަލް ކޯޓުން ވަނީ އަމުރުވެސް ކޮށްފައެވެ. އެއީ މުޖުތަމައުގެ ސަލާމަތަށް ނުރައްކާވެދާނެތީއާއި، ހެއްކަށް ނުފޫޒު ފޯރުވަފާނެތީއެވެ.
އޭނާއާ ދެކޮޅަށް ހުށަހެޅި ހެކިތަކުގެ ތެރޭގައި މަންޒަރު ފެނުުނު ހެކިންގެ ބަޔާނާއި، އަނިޔާ ލިބުނު މީހާގެ ބަޔާނާއި، އޭނާގެ ކުށުގެ ރެކޯޑާއި، ވީޑިއޯ އެންޑް އިމޭޖް އެނާލިސިސް ރިޕޯޓު ހިމެނެއެވެ. ކްރިމިނަލް ކޯޓުގައި އެ އަމުރު ނެރުއްވީ ގާޒީ ހުސައިން ފާއިޒް ރަޝާދެވެ.
