ދިވެހިންގެ އެހީގައި ފަލަސްތީނުގައި މިސްކިތެއް ބިނާ ކުރުމަށް ނިންމައި ބިންގާ އަޅައިފިއެވެ.
"މަސްޖިދުލް ގުއްދޫސް" ގެ ނަމުން ނަން ދީފައިވާ މި މިސްކިތް ބިނާ ކުރުމަށް ނިންމާފައިވަނީ ފަލަސްތީނުގެ ގާޒާގައެވެ. ބިންގާ އެޅުމަށް ހޮނިހިރު ދުވަހު ބޭއްވި ރަސްމިއްޔާތުގައި އެ ސަރަހައްދުގެ އިސްވެރިންނާއި ރައްޔިތުން ވަނީ ބައިވެރިވެފައެވެ.
ދިވެހިންގެ އެހީގައި ފަލަސްތީނުގައި މި މިސްކިތް ބިނާ ކުރަނީ އިންޓަރނޭޝަނަލް އެއިޑް ކެމްޕޭން (އައިއޭސީ) އިންނެވެ. "ރާއްޖެ އެމްވީ" އަށް މައުލޫމާތު ދެމުން އައިއޭސީން ބުނީ މި މިސްކިތް ބިނާކުރުމަށް ހަމަޖެހިފައިވަނީ ގާޒާގައި މިސްކިތެއް ނުހުންނަށް ސަރަހައްދެއްގައި ކަމަށެވެ. އެ ސަރަހައްދަކީ 50،000 މީހުންގެ އާބާދީއެއް ދިރިއުޅެމުން އަންނަ ސަރަހައްދެއް ކަމަށް ވެސް އެ ޖަމިއްޔާއިން ބުންޏެވެ.
އައިއޭސީން ބުނީ މިއީ ދިވެހިންގެ އެހީގައި ފަލަސްތީނުގައި ބިނާ ކުރާ ފުރަތަމަ މިސްކިތް ކަމަށެވެ. ތިން ބުރިއަށް ހަދާ މި މިސްކިތުގައި އެއްފަހަރާ 1100 އެއްހާ މީހުންނަށް ނަމާދު ކުރެވޭނެ ކަމަށާއި އެ މިސްކިތް ތަރައްގީ ކުރުމަށް ހަމަޖެހިފައިވަނީ ޒަމާނީ ފެންވަރަށް ކަމަށް ވެސް އެ ޖަމިއްޔާއިން ބުންޏެވެ.
މި މިސްކިތް ބިނާ ކުރުމަށް ފަންޑު ހަމަޖައްސަނީ އައިއޭސީން ހުޅުވާފައިވާ "ތަޖުރީ" ފަންޑުންނެވެ. މިއީ ކްރައުޑް ފަންޑެކެވެ. މިއީ އެކި ޤައުމުތަކުގައި ދިރިއުޅޭ ފަރާތްތަކަށް އެހީތެރިކަން ފޯރުކޮށްދޭން ބޭނުންވާ ދިވެހިންނަށް އެ އެހީ ފޯރުކޮށްދިނުމަށް ހުޅުވާލާފައިވާ ފަންޑެކެވެ.
ދިވެހިންގެ އެހީއާއެކު އައިއޭސީން ވަނީ މިހާތަނަށް އެކި ޤައުމުތަކުގައި އަށަކަށްވުރެ ގިނަ މިސްކިތް ބިނާ ކޮށްފައެވެ. އަދި މިހާރު ވެސް ގާޒާ ހިމެނޭހެން ހަތަރު މިސްކިތެއް ބިނާ ކުރުމުގެ މަސައްކަތް ކުރަމުން އަންނަ ކަމަށް އައިއޭސީން ބުންޏެވެ. އެއީ ސޯމާލީ ލޭންޑާއި އިންޑޮނޭޝިއާ އާއި ކެންޔާގައެވެ.
އައިއޭސީ މެދުވެރިކޮށް ދިވެހިންގެ ތެރެއިން އަމިއްލަ ޚަރަދުގައި އެހެން ޤައުމެއްގައި މިސްކިތެއް ބިނާ ކުރުން ފަދަ ބޮޑު ސަދަގާތެއް ކުރަން ބޭނުންވާ ފަރާތްތަކަށް އެ ޖަމިއްޔާއިން ވަނީ ފުރުސަތު ހުޅުވާލައިފައެވެ. އެ ޖަމިއްޔާއިން މިހާތަނަށް ބިނާ ކޮށްފައިވާ މިސްކިތްތަކުގެ ތެރޭގައި ވެސް އެކަކު އަމިއްލައަށް ޚަރަދުކޮށްގެން ބިނާ ކޮށްފައިވާ މިސްކިތް ވެސް ހިމެނެއެވެ.
